“ახალგაზრდები ლაზარესთვის” ამ სახელით დღეს მარტის აქციებზე დაკავებული აქტივისტის მხარდამჭერი პროტესტი დაანონსდა. აქცია დღეს, დღეს, 29 სექტემბერს, 19:00-ზე პრეზიდენტის ადმინისტრაციასთან გაიმართება.
სოციალურ ქსელში დაანონსებული ღონისძიების აღწერაშია ნათქვამია, რომ ახალგაზრდების მთავარი მოთხოვნა ლაზარე გრიგორიადისის გათავისუფლებაა, ხოლო მოთხოვნის მთავარი ადრესატები საქართველოს პრეზიდენტი, სალომე ზურაბიშვილი და “ქართული ოცნება” არიან.
“ახალგაზრდები ვიკრიბებით ლაზარესთვის პრეზიდენტის ადმინისტრაციასთან, რათა პრეზიდენტსა და “ქართულ ოცნებას” კიდევ ერთხელ ვუთხრათ, რომ საქართველო არასდროს არ იქნება “რუსეთის გუბერნია” და დაუყოვნებლივ გაათავისუფლონ საქართველოს ევროპული მომავლისთვის მებრძოლი ლაზარე გრიგორიადისი.
საქართველო აუცილებლად იქნება ევროპული ოჯახის ღირსეული წევრი,” — წერია ღონისძიების ტექსტში.
შეგახსენებთ, რომ ლაზარე გრიგორიადისი რუსული კანონის საწინააღმდეგო აქციაზე 29 მარტს დააკავეს. შსს-ს მტკიცებით, გრიგორიადისმა 7-9 მარტის აქციებზე პოლიციელების წინააღმდეგ ქვები და ე.წ. მოლოტოვის კოქტეილები გამოიყენა. 31 მარტს სასამართლომ გრიგორიადისს აღკვეთი ღონისძიების სახით პატიმრობა შეუფარდა.
მოგიანებით ცნობილი გახდა, რომ სასამართლო ლაზარეს მამის დაჭრაშიც ადანაშაულებდა. საუბარია 2021 წლის საქმეზე, რომელშიც მამის, ბექა გრიგორიადისის ჯანმრთელობის განზრახ მსუბუქ დაზიანებასა და კუთვნილი ავტომანქანის დაზიანებას ედავებოდნენ. 25 სექტემბერს გრიგორიადისი ამ საქმეზე სასამართლომ დამნაშავედ ცნო და 1 წლითა და 6 თვით თავისუფლების აღკვეთა მიუსაჯა. ბექა გრიგორიადისი ამბობდა, რომ ამ საქმის ახლა წამოწევა პოლიტიკური ნიშნით მოხდა.
სასამართლო პროცესების პარალელურად, მმართველი პარტია მუდმივად ცდილობდა ლაზარესთვის რეპუტაციული ზიანი მიეყენებინა და მის წინააღმდეგ დისკრედიტაციის კამპანიას აწარმოებდა. კერძოდ, “ქართული ოცნების” წევრებმა გრიგორიადისი მყისიერად დაუკავშირეს ოპოზიციას. გარდა ამისა, ლაზარეს წინააღმდეგ მმართველი პარტიის თავმჯდომარემ ჰომოფობიური ქვეტექსტით გამოიყენა სიტყვა “ორიენტაციაარეული”.