საქართველოს ახალგაზრდა იურისტთა ასოციაცია შინაგან საქმეთა სამინისტროს მიმართავს და აცხადებს, რომ ამ დროისთვის (00:08) არ არსებობს მშვიდობიანი აქციის დაშლის კანონისმიერი წინაპირობა. ორგანიზაცია მოუწოდებს უწყებას, არ გამოიყენოს აქტიური სპეციალური საშუალებები მშვიდობიანი დემონსტრანტების მისამართით.
“საჯაროდ გავრცელებულ კადრებში ჩანს, რომ სპეციალური დანიშნულების რაზმი განლაგებულია დემონსტრაციის ადგილის სამ გასასვლელთან (ჩიტაძის, ჭიჭინაძისა და თავისუფლების მოედნის მხრიდან რუსთაველის გამზირზე). მათ შორის, აღჭურვილნი არიან სპეციალური აირწინაღებით. ეს ყოველივე აჩენს ვარაუდს, რომ შინაგან საქმეთა სამინისტრო აპირებს გამოიყენოს აქტიური სპეციალური საშუალებები, მათ შორის, ცრემლსადენი გაზი. კადრებში, ასევე, ჩანს წყლის ჭავლის მანქანები. მოვუწოდებთ შინაგან საქმეთა სამინისტროს, არ გამოიყენოს აქტიური სპეციალური საშუალებები მშვიდობიანი დემონსტრანტების მისამართით, და, არ გამოიყენოს ისინი ჩვეული უკანონო პრაქტიკით, როგორიცაა ახლო მანძილიდან, სასიცოცხლო ორგანოების მისამართით, და, რამდენიმე აქტიური სპეციალური საშუალების გამოყენება ერთმანეთის პარალელურად”, — აცხადებს საია.
საქართველოს პარლამენტთან მოქალაქეები რუსულ კანონს აპროტესტებენ. 28 აპრილის აქციის ორგანიზატორებმა აქციის პარალელურად გაავრცელეს განცხადება, რომლის მიხედვით, საქართველოს პარლამენტის მიერ რუსული კანონის მიღება არის ხელისუფლების გასვლა კონსტიტუციური ჩარჩოდან. ისინი კატეგორიულად მოუწოდებენ ხელისუფლებას, არ ჩანიშნოს პლენარული სხდომა კანონის მეორე მოსმენის გასამართად 29 აპრილს, რადგან ეს იქნება კონსტიტუციის საწინააღმდეგო თვითნებობა, რასაც ისინი წინ აღუდგებიან.
გარდა ამისა, რესპუბლიკის მოედნიდან პარლამენტთან მარშით მისულმა მოქალაქეებმა ადგილზე მყოფ პოლიციას მიმართეს, ქართული ოცნების მიერ დამონტაჟებულ სცენაზე აეშვათ მედროშეები, რომლების სცენაზე აღმართავდნენ საქართველოსა და ევროკავშირის დროშებს. მათ ამის საშუალება არ მიეცათ და ადგილზე შსს-ის წარმომადგენლების რაოდენობა გაიზარდა. ამის შემდეგ პარლამენტთან გამოჩნდა სპეცრაზმი და წყლის ჭავლის მანქანა. ადგილზე რამდენჯერმე გაუშვეს, სავარაუდოდ, წიწაკის სპრეი. არსებული ინფორმაციით, დაკავებულია რამდენიმე ადამიანი. შინაგან საქმეთა სამინისტრო ადასტურებს, რომ რუსთაველის გამზირზე “სპეციალური საშუალება” გამოიყენა. უწყება ამტკიცებს, რომ აქციამ მიიღო “ძალადობრივი ხასიათი”.
განცხადება გაავრცელა თბილისის მერიამაც, რომელმაც შეკრებას “არასანქცირებული” უწოდა, მიუხედავად იმისა, რომ საქართველოს კანონმდებლობით, აქციის ჩატარებას სანქცია ან ნებართვა არ სჭირდება.