Grindr-ის მომხმარებლები აივ თვითტესტების, კონდომებისა და ლუბრიკანტების შეკვეთას აპლიკაციიდან გაუსვლელად შეძლებენ. ამის შესახებ ინფორმაციას თანასწორობის მოძრაობა ავრცელებს.
Grindr ონლაინ გაცნობის აპლიკაციაა, რომელიც გეი, ბისექსუალი, ტრანსგენდერი და, ზოგადად, ქვიარი ადამიანებისთვისაა შექმნილი. აპლიკაცია 2009 წლის მარტში გეი კაცებისთვის გამოვიდა და მას შემდეგ ყველაზე პოპულარული გეი მობილური აპლიკაცია გახდა მსოფლიოში.
თანასწორობის მოძრაობის ცნობით, სპეციალურად შექმნილი Selftest Express სისტემა Grindr-ის მომხმარებლებს გამარტივებული შეკვეთის საშუალებას აძლევს. თანასწორობის მოძრაობა Grindr-თან რამდენიმე წელია აქტიურად თანამშრომლობს.
“თანამშრომლობის ფარგლებში ვცდილობთ გავზარდოთ თემის წევრთა ხელმისაწვდომობა არსებულ სერვისებზე. ამასთან, უზრუნველვყოფთ თემის მობილიზებას”, — აღნიშნულია განცხადებაში.
თანასწორობის მოძრაობა მუშაობს, როგორც საზოგადოების ცნობიერების ამაღლებაზე, ასევე — ლგბტქ+ თემის გაძლიერებასა და მისი უფლებების ადვოკატირებაზე. ამ დრომდე ორგანიზაციაში, სხვა სერვისების მიღებასთან ერთად, სქესობრივი გზით გადამდებ დაავადებებზე უფასო ტესტირება უკვე შესაძლებელი იყო. ასევე, ტესტირება ტარდებოდა აივ/შიდსზე, სიფილისზე, C და B ჰეპატიტებზე. ამასთან, ორგანიზაციაში უფასო პრეზერვატივებისა და ლუბრიკანტების მიღებაც შეგეძლოთ, თუმცა Grindr-თან კოლაბორაციის შემდეგ, ეს სერვისები ქვიარ ადამიანებისთვის სახლიდან გაუსვლელად გახდება ხელმისაწვდომი.