„ქალთა ინიციატივების მხარდამჭერი ჯგუფი“ (WISG) საქართველოში პირველი ორგანიზაციაა, რომელიც ფოკუსირებულია ლესბოსელი, ბისექსუალი ქალებისა და ტრანსგენდერი ადამიანების გაძლიერებაზე. დღეისთვის ორგანიზაცია წარმოადგენს წამყვან ექსპერტს ლგბტ საკითხებში და სარგებლობს, როგორც ადგილობრივი, ისე საერთაშორისო სამთავრობო და არასამთავრობო აქტორების ნდობით. ორგანიზაციის მისიაა ფემინისტური იდეების პოპულარიზაცია, ქალთა აქტივიზმის განვითარებისა და უსაფრთხო გარემოს ფორმირების ხელშეწყობა, სადაც სექსიზმი და ჰომო/ბი/ტრანსფობია აღიარებულია, როგორც საზოგადოებრივი პრობლემა კულტურულ, სოციალურ, სამართლებრივ და პოლიტიკურ დონეზე.
წარმოგიდგენთ ქალთა ინიციატივების მხარდამჭერი ჯგუფის 2024 წლის მარტის მიმოხილვას:
- მარტში ორგანიზაციის მთავარი ღონისძიება ფემინისტური ფილმების ფესტივალი „როზადან სიმონამდე“ იყო, რომელიც 8, 9 და 10 მარტს Mutant Radio-ში გაიმართა. 2024 წლის ფესტივალი სხვად ყოფნის სევდას, ბრაზს, კითხვებს, აღმოჩენებსა და სიხარულს დაეთმო და 3 დღის განმავლობაში გააერთიანა 13-მდე კინოჩვენება, 2 მულტიმედია გამოფენა და სხვადასხვა მუსიკალური პერფორმანსი.
- 31 მარტს, ტრანს ხილვადობის დღესთან დაკავშირებით, WISG-მა საზოგადოებას გაუზიარა თავისი არსებული პროექტის „ტრანს ნარატივები: არაბინარული ამბები“ ოთხი ვიდეო-ესეი ტრანსფემინისტი აქტივისტის, ნატა ტალიკიშვილის, მოგონებებსა და ოცნებებზე. ვიდეო-ესეის ნახვა ორგანიზაციის განახლებულ ვებპლატფორმაზე შეგიძლიათ.
- ორგანიზაცია ეძებს გუნდის ახალ წევრს, პროექტების ასისტენტს, რომელიც ჩართული იქნება როგორ ლოჯისტიკურ, ასევე კრეატიულ სამუშაოში. განაცხადის გაგზავნა შესაძლებელია 2 აპრილის ჩათვლით.
აპრილის თვეში ორგანიზაციას შემდეგი აქტივობები აქვს დაგეგმილი:
- WISG-თან თანამშრომლობით, 9-დან 15 აპრილის ჩათვლით თბილისში გაიმართება „თანამედროვე ცეკვის ფესტივალი“, რომლის ფარგლებშიც ჩატარდება ცნობილი ქორეოგრაფის, ოჰად ნაჰარინის, მიერ შექმნილი სისტემის, Gaga-ს, კლასები და აფროფუტურისტული მოძრაობის ვორქშოფი. ვორქშოფს გაუძღვება პედაგოგი და მოცეკვავე ნიუ-იორკიდან, შამელ პიტსი. პროექტი ხორციელდება მოცეკვავე და ქორეოგრაფ ნათია ჩიკვაიძესთან და „პლატფორმა პლაზმასთან“ ერთად.
- აპრილში ორგანიზაცია გეგმავს გასულ წელს ჩატარებული კვლევის პრეზენტაციას. ღონისძიების დროისა და ადგილის შესახებ დეტალები მოგვიანებით გახდება ცნობილი WISG-ის სოც. მედია არხებში.
- აპრილში WISG არტისტ Iamnikita-სთან კოლაბორაციული პროექტის ფარგლებში გეგმავს ვიდეოგადაღებებს, რომელთა პრეზენტაციაც მაისის თვეში იგეგმება.
იხილეთ აგრეთვე: ქალთა ინიციატივების მხარდამჭერი ჯგუფი (WISG) — 2024 წლის თებერვლის მიმოხილვა