აშშ-ის სახელმწიფო დეპარტამენტის სპიკერის მოადგილემ, ვედანტ პატელმა, დღეს გამართულ ბრიფინგზე კიდევ ერთხელ გააჟღერა აშშ-ის პოზიცია რუსულ კანონთან დაკავშირებით.
„ჩვენ ისევ ღრმად შეშფოთებულები ვართ, რომ ამ კანონპროექტმა მიღების შემთხვევაში შეიძლება მოახდინოს სამოქალაქო საზოგადოების იმ ორგანიზაციების სტიგმატიზაცია, რომლებიც ქართველი ხალხის ცხოვრების გაუმჯობესებაზე მუშაობენ, და საქართველოში მოქმედი იმ მედიაორგანიზაციების, რომლებიც საქართველოს მოსახლეობას ინფორმაციას აწვდიან.
ჩვენ მიგვაჩნია, რომ სამოქალაქო საზოგადოება, ჟურნალისტიკა, მედიაორგანიზაციები — ეს ქვაკუთხედია ნებისმიერი დემოკრატიული საზოგადოებისთვის და ჩვენ მოვუწოდებთ საქართველოს მთავრობას, ისმინოს ჩვენი გაფრთხილებები, რომ ეს კანონი არ შეესაბამება ევროკავშირის ნორმებსა და ღირებულებებს და ის ცალსახად უარყოფითად აისახება საქართველოს პროგრესზე ევროკავშირისკენ“, — განაცხადა ვედანტ პატელმა.
გუშინ რუსულ კანონზე განცხადება გააკეთა ასევე აშშ-ის სახელმწიფო დეპარტამენტის სპიკერმა, მეთიუ მილერმა, და კიდევ ერთხელ გამოხატა აშშ-ის შეშფოთება.
დღეს პარლამენტმა რუსულ კანონს პირველი მოსმენით მხარი დაუჭირა.
კენჭისყრაზე კანონპროექტს 83-მა დეპუტატმა დაუჭირა მხარი, 0-ის წინააღმდეგ. ამ დროს ოპოზიციის დეპუტატებს დარბაზი უკვე დატოვებული ჰქონდათ.
იმისთვის, რომ კანონპროექტი კანონად იქცეს, საჭიროა სამი მოსმენა და, საბოლოოდ, მესამე მოსმენაზე კანონის მხარდაჭერა.
აღსანიშნავია, რომ გასულ წელს საპროტესტო აქციების შემდეგ ქართულ ოცნებას რუსული კანონის მიღებაზე უარის თქმა პირველი მოსმენით მხარდაჭერის შემდეგ მოუწია.