TV პირველის საინფორმაციო სამსახურის უფროსმა, ნოდარ მელაძემ პირდაპირ ეთერში განაცხადა, რომ ტელევიზიასთან მანქანებით ნიღბიანი პირები იყვნენ ჩასაფრებული. ტელეკომპანიის გადაღებულ კადრებში ჩანს, რომ მას შემდეგ, რაც ჟურნალისტი ეკითხება, ვის ელოდებიან, ტერიტორიას ტოვებს მანქანა, რომელშიც პირბადით სახედაფარული პირები სხედან.
მელაძის თქმით, მანქანებს ტრანზიტული ნომრები ჰქონდათ და ტელევიზიის გარე ტერიტორიაზე დაახლოებით ერთი საათი იდგნენ. მისივე თქმით, მიმართა შინაგან საქმეთა სამინისტროს პრესსამსახურს, რომელმაც ასე უპასუხა: “რა გავაკეთოთ ჩვენ, 112-ზე დარეკეთ”.
მელაძე ამბობს, რომ პოლიცია უკვე გამოიძახა და შს მინისტრთან, ვახტანგ გომელაურთან დარეკვაც სცადა, თუმცა უშედეგოდ.
“მაინტერესებს, ვინ აგებს პასუხს, ახლა ტელევიზაში რომ შემოვარდნენ ეს ადამიანები ან ტელევიზიიდან გასულ თანამშრომლებს აედევნონ და დატრიალდეს ის, რაც არის? მაინტერესებს, რა პასუხი არსებობს ამ კითხვაზე.
მე შსს ჩავაყენე საქმის კურსში, დავრეკე 112-ში და გამოვიძახე პატრული, იმიტომ, რომ აქ არის სახეზე ჩასაფრება ადამიანების, რომლებიც ტელევიზიის სამაუწყებლო ცენტრთან, საიდანაც მიდის მაუწყებლობა, აწყობენ ჩასაფრებას. ჩვენ არ ვიცით ეს ადამიანები ელოდებიან ეთერის დამთავრებას, რომ ტელევიზიაში შემოვარდნენ, უნდა აედევნონ ვინმეს, ვინც ტელვიზიაშია, თუ რა გეგმა აქვთ.
ქვეყანაში შექმნილი ვითარებიდან გამომდინარე, ეს არის მყისიერი საფრთხე, რომელსაც ჩვენ ვგრძნობთ, რომ ამ წუთებში ჩვენი სიცოცხლე არის საფრთხეში”, — თქვა მელაძემ და პასუხისმგებელ უწყებებს მიმართა.
მან სპეციალურ საგამოძიებო სამსახურს და შსს-ს მიმართა და განუცხადა, რომ ტელეკომპანიის ნებისმიერი თანამშრომლის სიცოცხლესა და ჯანმრთელობაზე პასუხისმგებლობა ეკისრებათ.
“ეს არის ოფიციალურად ტერორიზმი და რეკეტი და დაშინება ჟურნალისტების წინააღდეგ, რომ ხვალ ჩვენ არ გავაგრძელოთ ჩვენი პროფესიული მოვალეობის შესრულება. ბოდიში, ამას არ გავაკეთებთ და ვიქნებით და ენთება ტელევიზია პირდაპირ ეთერში, რაც არ უნდა გააკეთოთ”, — განაცხადა მელაძემ.
მანვე აღნიშნა, რომ ადგილზე პენიტენციური სამსახურის კამერებია და კადრებით შესაძლებელია მანქანების ნომრების ამოცნობა.
ტელეკომპანიამ ინფორმაცია მყისიერი საფრთხის შესახებ ნახევარი საათის წინ გაავრცელა, მაგრამ როგორც ამბობენ, ამ დრომდე პოლიცია ადგილზე არ მისულა.