საერთაშორისო გამჭვირვალობა — საქართველოს განცხადებით, თბილისის საქალაქო სასამართლომ ანტიკორუფციული ბიუროს ხელმძღვანელის, რაჟდენ კუპრაშვილის გადაწყვეტილება არ შეაჩერა, ამიტომ ორგანიზაციის სახელით არჩევნებს ვეღარ დააკვირდებიან.
ორგანიზაციაში განმარტავენ, რომ გადაწყვეტილების შეჩერებაზე მათი შუამდგომლობის დაუკმაყოფილებლობის ფონზე, სასამართლო საქმის წარმოებას აგრძელებს, თუმცა მათი შეფასებით, გადაწყვეტილების შეჩერებაზე უარი ფაქტობრივად ნიშნავს იმას, რომ ორგანიზაცია პოლიტიკურ პარტიასთან, ხოლო აღმასრულებელი დირექტორი პარტიის საარჩევნო სუბიექტთან გათანაბრებულ პირად არის ამ დრომდე მიჩნეული.
“ამ აბსურდული გადაწყვეტილების გამო, ჩვენზე ვრცელდება პოლიტიკური პარტიებისთვის დადგენილი რეგულაციები, რაც ასევე გვავალდებულებს სპეციალური საარჩევნო ფონდის შექმნას, გვეკრძალება ნებისმიერი დასავლური დაფინანსების მიღება და ხარჯვა, ასევე გვეკისრება პოლიტიკური პარტიებისთვის სავალდებულო ფინანსური ანგარიშების წარდგენა.
საერთაშორისო გამჭვირვალობა-საქართველო არ აღიარებს აბსოლუტურად უკანონოდ მინიჭებულ აღნიშნულ სტატუსს. ხაზგასმით ვაცხადებთ, რომ არც ორგანიზაცია და არც ჩვენი აღმასრულებელი დირექტორი არჩევნებში არ იყრის კენჭს. ასევე არც ერთი პოლიტიკური პარტიის სიაში ჩვენი არცერთი წარმომადგენელი არ ფიგურირებს. ამდენად, არ ვაპირებთ ქართული ოცნების ანტიკორუფციული ბიუროს მოთხოვნების შესრულებას”, — ნათქვამია ორგანიზაციის განცხადებაში.
გარდა ამისა, TI-ში აღნიშნავენ, რომ ხელისუფლების ეს გადაწყვეტილება ორგანიზაციის მიერ დაანონსებული კოალიციური დაკვირვებისა და სადამკვირვებლო მისიის “ჩემი ხმა” წინააღმდეგ გადადგმული ნაბიჯია. მიუთითებენ, რომ ორგანიზაციის არსებობის 24 წლის განმავლობაში, ეს არის პირველი შემთხვევა, როდესაც საარჩევნო უბნებზე მათი სახელის ქვეშ დარეგისტრირებული არც ერთი დამკვირვებელი არ ეყოლებათ. მიუხედავად ამისა, ხმების დაცვისთვის ინდივიდუალურ მუშაობას გააგრძელებენ.
“მიუხედავად ამისა, საერთაშორისო გამჭვირვალობა-საქართველოს თითოეული თანამშრომელი გამოვიყენებთ ჩვენს გამოცდილებას, ცოდნას და ინტელექტუალურ რესურსს, რათა სადამკვირვებლო მისიას “ჩემი ხმა” და ჩვენს პარტნიორ ორგანიზაციებს დავეხმაროთ არჩევნების მაღალკვალიფიციურ დაკვირვებაში. ჩვენ ეს ბარიერები არ გაგვაჩერებს. ჩვენ ვაგრძელებთ ბრძოლას ჩვენი სამშობლოს ევროპული მომავლისათვის! ჩვენ დავიცავთ ყველას ხმას!” — ვკითხულობთ განცხადებაში.
25 სექტემბერს ანტიკორუფციულმა ბიურომ საერთაშორისო გამჭვირვალობა — საქართველო, მისი აღმასრულებელი დირექტორი, ეკა გიგაური, ასევე, ორგანიზაცია აირჩიე ევროპა, მისი დირექტორი ხათუნა ლაგაზიძე და ორგანიზაციის თანადამფუძნებლები გაცხადებული საარჩევნო მიზნის სუბიექტებად ცნო.
ბიუროს ხელმძღვანელის, რაჟდენ უპრაშვილის მტკიცებით, მონიტორინგით გამოვლინდა, რომ TI და ეკა გიგაური, როგორც უშუალოდ, ასევე, კამპანია ჩემი ხმა ევროკავშირს ფარგლებში, აქტიურად არიან ჩართული წინასაარჩევნო კამპანიაში, რომელიც მიზნად ისახავს “კონკრეტული პოლიტიკური პარტიების მხარდაჭერას”. იმავეში ადანაშაულებს კუპრაშვილი ორგანიზაცია აირჩიე ევროპას.