“ჩვენ ვართ ლესბოსელი, გეი, ბისექსუალი, ტრანსგენდერი, ინტერსექსი და ქვიარ ადამიანები. ჩვენზე ძალადობენ ოჯახში, სკოლაში, ქუჩასა და სამსახურში, გვივარდებიან სახლებში, გვაგდებენ ოჯახებიდან. ჩვენ გვკლავენ. ჩვენი დები და ძმები საზოგადოებაში არსებული სიძულვილისა და აგრესიის გამო სხვა ქვეყნებში ეძებენ თავშესაფარს. ჩვენ არ გვინდა გაქცევა, გვინდა ღირსეულად ვიცხოვროთ ჩვენს ქვეყანაში”, — ასე დაიწყო სიტყვით გამოსვლა Tbilisi Pride-ის თანადირექტორმა, მარიამ კვარაცხელიამ. ეს იმ მანიფესტის ტექსტია, რომლითაც 2019 წელს ორგანიზაცია დაფუძნდა.
დაარსებიდან 5 წლის შემდეგ Tbilisi Pride-ის დამფუძნებლები, მოქმედი და ყოფილი თანამშრომლები, ბენეფიციარები, მხარდამჭერები და აქტივისტები ერთად შეიკრიბნენ და გაიხსენეს, განიხილეს ყველა გამოწვევა და დაბრკოლება, რომელიც გადალახეს.
“ჩვენ, ლგბტქ აქტივისტები, თემის წევრები, ეს მოწყვლადი ჯგუფი ძალიან დიდ ბოროტებას ვუპირისპირდებით მუდმივად. ჩვენს წინააღმდეგ გაერთიანებული არიან ძალაუფლების და დიდი ფულის მქონე ჯგუფები, როგორიც არიან ულტრამემარჯვენე და რადიკალური ჯგუფები, ხელისუფლება, საპატრიარქო, სამწუხაროდ, და სხვადასხვა საზოგადოებრივი, სიძულვილით სავსე ჯგუფები, რომლებიც არ გვაძლევენ შესაძლებლობას, ვიბრძოლოთ ადამიანის უფლებებისთვის, თანასწორობისთვის და ჩვენი თემის კეთილდღეობისთვის”, — თქვა კვარაცხელიამ და დაამატა:
“თუმცა ჩვენ არ დავნებდებით. ვაპირებთ რომ მუდამ ვიყოთ ხილვადები, ხმამაღლები და თანასწორობისთვის შეუპოვრად ვიბრძოლოთ”.
მანვე განიხილა სამომავლო გეგმები და განაცხადა, რომ 2024 წელს პრაიდ კვირეული იმავე ფორმით აღარ აღინიშნება, როგორც აქამდე. გადაწყვეტილება ორგანიზაციის წარმომადგენლებმა და აქტივისტებმა ერთად მიიღეს და განმარტავენ, რომ ეს დროებითი უკან დახევაა და სამომავლოდ შექმნის საფუძველს, რომ 2 ნაბიჯი გადადგან წინ.
“ერთ-ერთი ყველაზე მნიშვნელოვანი სტრატეგიული ამოცანა თბილისი პრაიდისთვის და ლგბტ მოძრაობისთვის იქნება თემის, ახალგაზრდების და მხარდამჭერების მაქსიმალური მობილიზება იმისთვის, რომ გავხდეთ პოლიტიკურად უფრო აქტიურები. იმისთვის, რომ აღვიჭურვოთ ბევრი ინფორმაციით, ცოდნით და მოვთხოვოთ ყველა პოლიტიკურ ჯგუფს, რომ ჩვენი ინტერესები წინ წამოიწიოს”, — განაცხადა კვარაცხელიამ და განმარტა, რომ მთელ იმ ენერგიას, რასაც პრაიდის კვირეულს ახმარდნენ, ამაზე დახარჯავენ.
საუბარი ჰოლანდიის ელჩმა, მელინე არაკელიანმა გააგრძელა. ქართულენოვან გამოსვლაში მან გაიხსენა ყველა, ვინც 5 წლის წინ და დღეს თბილისი პრაიდის სათავეში იდგა. ელჩმა განმარტა, რომ ნიდერლანდებისთვის ერთ-ერთი მთავარი პრიორიტეტია ქვიარ თემის უფლებების დაცვა და გაძლიერება და ორგანიზაციას მხარდაჭერა კიდევ ერთხელ დაუდასტურა.
მან ისაუბრა ანტიდისკრიმინაციული კანონისა და ძლიერი სამოქალაქო საზოგადოების მნიშვნელობაზე და გასული 5 წელი გამოწვევებისა და წარმატებების წლად შეაფასა. ასევე, აღნიშნა, რომ დიდი იმედგაცრუება იყო პრაიდ ფესტივალის ძალადობრივი ჩაშლა და ხაზი გაუსვა, რომ აუცილებელია, ამის ორგანიზატორები დაისაჯონ.
შეკრებილებს სიტყვით მიმართეს თანადირექტორმა, ანა სუბელიანმა და გუნდის წევრმა, თათა ჯაყელმაც. მათ მადლობა გადაუხადეს მხარდაჭერისთვის და საერთო ბრძოლაში გვერდის დგომისთვის.
“თბილისი პრაიდის ერთ-ერთი მთავარი მიღწევა, როგორც ენერგიის წყარო და ყველაზე ხელშესახები ცვლილება არის მხარდამჭერების წრის გაზრდა. ვერც წარმოვიდგენდით, ალბათ, როგორ შეიძლებოდა სრულიად სხვადასხვა სფეროს, ასაკის, სოციალური ჯგუფის და წარსული გამოცდილების მქონე ადამიანები დამდგარიყვნენ ჩვენ გვერდით. მათ შორის, ისეთებსაც შეუცვლიათ აზრი, რომლებიც წლების წინ ჰომოფობიურ აქციებზე ყოფილან”, — განაცხადა ანა სუბელიანმა.
პრაიდის დაბადების დღეზე შეკრებილებს სიტყვით მიმართეს ქვიარ აქტივისტებმა საქართველოდან და ბელგიიდან. ემზო კვარაცხელიამ და ნიქო გორგილაძემ იმ გამოწვევებზე ისაუბრეს, რომელთა გამოც ქვეყნიდან მოუწიათ წასვლა.
ღონისძიების სტუმრებმა ნახეს ვიდეოც, რომელიც განვლილ 5 წელზე მოკლედ, 8 წუთში ყვებოდა. ეს იყო კადრები ღონისძიებებიდან, ფესტივალებიდან, ძალადობრივი ჯგუფების აქციებიდან, დარბევებიდან — კადრები, რომლებიც გადარჩენისთვის ბრძოლასთან ერთად, მნიშვნელოვანი გამარჯვებების შესახებ გვიამბობდა. ამ ვიდეოს დარბაზი ცრემლებით და ოვაციებით შეხვდა, ისევე, როგორც არაბინარული გენდერული იდენტობის მქონე აქტივისტისა და ქვიარ ადამიანის დედის გამოსვლებს, რომლებმაც ოჯახის მხარდაჭერის მნიშვნელობაზე ისაუბრეს.
ღონისძიება მრავალმხრივი იყო, შესაბამისად, წარსულის გადააზრების, სამომავლო გეგმების დასახვის გარდა, დატვირთული იყო მუსიკალური ნომრებით, დრეგ შოუებით და რაღა თქმა უნდა, აქტივიზმით. პრაიდის გუნდის წევრებმა სოლიდარობა გამოუცხადეს დაკავებულ აქტივისტებს, ნატა ფერაძეს, ლაზარე გრიგორიადისს, ასევე, კაკო ჩიქობავას და გიორგი ხასაიას.
საღამო ქვიარ არტისტის, ანდრო დადიანის პერფორმანსით გაგრძელდა, რომელმაც ნიკო სამადაშვილის ლექსი წაიკითხა. ამის შემდეგ ტრანსგენდერმა მომღერალმა, ანასტასია პირველმა და ანა სუბელიანმა ერთად იმღერეს.
ღონისძიების ბოლოს სტუმრების წინაშე დრეგ ქვინები ეთერ კაკულიას და ბრინტი სპირსის რეპერტუარით წარდგნენ. კულმინაცია კი, ტრადიციულად, ფერადი ტორტის გაჭრა იყო. თუ თბილისი პრაიდის დაბადების დღიდან უფრო მეტი საინტერესო კადრის ნახვა გსურთ, ინსტაგრამზე, ფეისბუქსა და ტიკტოკზე გვეწვიეთ.