პარლამენტის სხდომაზე, სადაც დღეს რუსული კანონი მესამე მოსმენით განიხილება, ხმაურით და დაპირისპირებაა. პლენარული სხდომა პოლიტიკური განცხადებებით დაიწყო, რა დროსაც ოპოზიციის კრიტიკულ გამოსვლებს ქართული ოცნების დეპუტატების მხრიდან ყვირილი მოჰყვა.
თავდაპირველად, ყვირილი მაშინ დაიწყო, როცა თინა ბოკუჩავამ ოცნების დეპუტატებს 83 მხდალი მოღალატე უწოდა. ბოკუჩავამ სიტყვა მაინც გააგრძელა თქვა, რომ ხალხს ვერ შეაშინებენ და ერთს თუ დაიჭერენ 100 გამოვა. ხმაური იყო ანა ნაცვლიშვილის გამოსვლის დროსაც, რომელიც პარლამენტში აირწინაღით, სათვალით და ევროკავშირი-საქართველოს დროშებით მივიდა.
მას შემდეგ, რაც ოცნების დეპუტატმა, რიმა ბერაძემ თქვა, რომ ოპოზიციის მხრიდან კანონთან “სპეკულაციები და ტყუილებია”, პაატა მანჯგალაძემ განაცხადა, რომ ბერაძეს პატივს სცემს, მაგრამ ის 9 აპრილის დროს რაიკომის მდივანი იყო და უფლება არ აქვს, პროპაგანდაზე ისაუბროს. ამ განცხადებასაც ხმაური მოჰყვა.
სიტუაცია მას შემდეგ დაიძაბა, როცა ლევან ხაბეიშვილმა თქვა, რომ ქართული ოცნების დეპუტატს, დიმიტრი სამხარაძეს თავში ნაგვის ყუთი აქვს და სწორედ ის კურირებს ახალგაზრდებზე თავდასხმასა და მუქარას. ხაბეიშვილის შემდეგ რატი იონათამიშვილმა დაიწყო სიტყვით გამოსვლა, თუმცა შეწყვეტა მოუწია, რადგან დეპუტატებმა ჩხუბი დაიწყეს.
პარლამენტის პირდაპირი ეთერი შეწყდა და ტექნიკური შესვენება გამოცხადდა. თუმცა, ადგილზე მყოფი მედიის კადრებში ჩანს, რომ სამხარაძე გინებით და მუქარით მივარდა ოპოზიციის მაგიდებთან. რიმა ბერაძემ მანჯგალაძეს თავში ფურცლები ჩაარტყა, ვაშაძეს კი პლანშეტის დარტყმით ემუქრებოდა.
რამდენიმე წუთის განმავლობაში სხდომათა დარბაზში ოპოზიციის და უმრავლესობის დეპუტატებს შორის ფიზიკური დაპირისპირება იყო, თუმცა კადრებიდან რთულია იმის თქმა, ვინ მონაწილეობდა ამ პროცესში.
პაპუაშვილმა სხდომის განახლება სცადა და მოუწოდა უმრავლესობასაც და ოპოზიციასაც ადგილები დაეკავებინათ, თუმცა თავდაპირველად ვერ მოახერხა. მან განაცხადა, რომ ისეთი პოლიტიკურ განცხადებების დროს, სადაც იქნებოდა შეურაცხყოფა, სიძულვილის ენა, მიკროფონს გათიშავდა, რადგან ეს დაპირისპირების ინსპირირებას იწევდა.
სხდომა ნინო წილოსანის სიტყვით განახლდა, რომელმაც ბრალი დასდო თინა ბოკუჩავას მარიამ ლაშხზე ძალადობაში და ამის გამო “ქალი ალქაჯი” უწოდა და მისი დარბაზიდან გაყვანა მოითხოვა. ამასაც ხმაური მოჰყვა, თუმცა საბოლოოდ სხდომა განახლდა.