სექსტინგი გულისხმობს სექსუალური ხასიათის ტექსტური შეტყობინებების გაგზავნას. ის ხშირად მოიცავს შიშველი, ნახევრად შიშველი ან სექსუალური ფოტოებისა და ვიდეოების გაზიარებას. სექსტინგი შესაძლებელია მობილური ტელეფონის მესენჯერებით, სოციალური მედიის პირადი შეტყობინებებით ან სპეციალური აპლიკაციების მეშვეობით.

Contents

► ტერმინი „სექსტინგი“ არის სიტყვების „sex“ (სექსი) და „texting“ (ტექსტური შეტყობინებების გაგზავნა) კომბინაცია.

სექსტინგით სხვადასხვა ასაკის ადამიანები კავდებიან, თუმცა, კვლევების მიხედვით, ტექნოლოგიურად დახელოვნებული მოზარდები და ახალგაზრდები ყველაზე მეტად იყენებენ კომუნიკაციის ამ მეთოდს. კვლევების თანახმად, მოზარდების დაახლოებით 15%-ს ერთხელ მაინც გაუგზავნია ასეთი შეტყობინება, ხოლო 27%-ს — ერთხელ მაინც მიუღია. ახალგაზრდებს შორის ყოველ 4-იდან 3-ს აქვს სექსტინგის გამოცდილება.

► რა გასხვავებაა სექსტინგსა და კიბერსექსს შორის? — კიბერსექსი არის ნებისმიერი ტიპის სექსუალური აქტივობა, რომელიც იყენებს ინტერნეტს. სექსტინგი კიბერსექსის ერთ-ერთი ფორმაა.

რატომ შეიძლება დავკავდე სექსტინგით?

ურთიერთობაში სექსტინგის ცდა მრავალი მიზეზის გამო შეიძლება. ეს არის გზა, რომლითაც შეგიძლიათ პარტნიორთან კავშირი შეინარჩუნოთ მაშინაც კი, როცა ფიზიკურად ერთად არ ხართ. სექსტინგმა შეიძლება გააძლიეროს კიდეც რომანტიკული ან სექსუალური ურთიერთობა, რადგან ის ამარტივებს სექსუალურ თემებსა თუ ფანტაზიებზე საუბარს და იძლევა მარტივი ექსპერიმენტირების საშუალებას ფიზიკური კავშირის რისკების — მაგალითად, ორსულობის ან სქესობრივი გზით გადამდები ინფექციების — გარეშე.

სექსტინგი შეიძლება გამოიყენოთ:

ფლირტისთვის;
სიახლოვისთვის;
ინტერესის ან მოწონების გამოხატვისთვის;
ნდობის საჩვენებლად;
გასართობად;
სიახლის შესატანად;
ფანტაზიის გასაცოცხლებლად ან სექსუალური ექსპერიმენტირებისთვის;
ინტიმურობის შესანარჩუნებლად ფიზიკური სიშორისას.

როგორ შემოვიტანო სექსტინგი ურთიერთობაში?

როდესაც ახალ პარტნიორთან სექსტინგის გამოკვლევას იწყებთ, სანამ მსგავსი შინაარსის რაიმე შეტყობინებას გაუგზავნიდეთ, აუცილებლად ჰკითხეთ, როგორია მისი დამოკიდებულება ამ თემის მიმართ და დარწმუნდით, რომ თანხმობა გაქვთ. თუ მას სექსტინგი არ სურს, ნუ გააგრძელებთ.

თანხმობა აუცილებელია ყველა სახის სექსუალური ურთიერთობაში, მათ შორის ვირტუალურშიც. არასოდეს გაგზავნოთ სექსტი (ინგლ. Sext — სექსუალური შინაარსის შეტყობინება), სანამ არ დაადასტურებთ, რომ ამის გაკეთება მისაღებია. განიხილეთ, რა მოგწონთ, რა არ მოგწონთ და რაზე გსურთ სექსტინგის დროს საუბარი.

თუ სექსტინგის ცდას გადაწყვეტთ, ისაუბრეთ წესებსა და საზღვრებზე. მნიშვნელოვანია გახსნილი კომუნიკაცია როგორც სექსტინგამდე, ისე მის შემდეგ, რათა დარწმუნდეთ, რომ თქვენ და თქვენი პარტნიორი ერთ აზრზე ხართ. ისაუბრეთ იმაზე, თუ ზუსტად რა სურს და რა არ სურს თქვენს პარტნიორს. მაგალითად, შეიძლება შეთანხმდეთ:

მხოლოდ ტექსტური შეტყობინებების გაცვლაზე, ფოტოს ან ვიდეოს გარეშე;
ფოტოებზე, მაგრამ ვიდეოს გარეშე;
ფოტოსა და ვიდეოს გარკვეულ დროში წაშლაზე.

ზოგს არ აწუხებს, როცა პარტნიორი სექსტებს ინახავს საკუთარ მოწყობილობებზე, თუმცა ზოგს ამ ყველაფრის წაშლა ურჩევნია ორივეს უსაფრთხოებისთვის. მთავარია, ყველა დეტალი წინასწარ გაარკვიოთ. შემდეგ კი საკუთარ თავსაც ჰკითხეთ:

კომფორტულად ვგრძნობ თავს სექსტინგისას?
საჩემოა ეს?
ჩემ პარტნიორსაც ეტყობა, რომ კომფორტულად არის?

თუ რაიმესთან დაკავშირებით მაინც გეპარებათ ეჭვი, შეგიძლიათ, ხელახლა ისაუბროთ პარტნიორთან და შეცვალოთ შეთანხმებები ან, უბრალოდ, გადაიფიქროთ. არ ხართ ვალდებული, გასცეთ პასუხი ან დააჭიროთ „გაგზავნას“, თუ არ გსურთ. ხშირად გადაამოწმეთ პარტნიორთანაც, ხომ არ გრძნობს დისკომფორტს ან ხომ არ შეიცვალა აზრი. თუ რამე შეიცვალა, ისაუბრეთ და გადახედეთ წესებს.

გაითვალისწინეთ რამდენიმე ზოგადი რეკომენდაცია:

არასოდეს აჩვენოთ სხვისგან მიღებული, თანხმობაზე დაფუძნებული სექსტი სხვა ადამიანებს;
არ ისექსტინგოთ იმასთან, ვინც არ გიცნობთ კარგად ან ვისაც ბოლომდე არ ენდობით;
არ გაგზავნოთ ფოტო ან ვიდეო, თუ დარწმუნებული არ ხართ, რომ პარტნიორს ამის ნახვა ნამდვილად სურს;
ერიდეთ სექსტინგს ალკოჰოლის ან ნარკოტიკების ზემოქმედების ქვეშ, ასევე გაბრაზებულ ან ემოციურად არასტაბილურ მდგომარეობაში.

სექსტინგის მაგალითები

თუკი წესებზე შეთანხმდით და თავს კომფორტულად გრძნობთ, სექსტინგის დაწყება რამდენი გზითაა შესაძლებელი:

ახსენოთ სექსუალური ფანტაზია, რომლის გამოცდაც გსურთ;
ახსენოთ, რომ ფიქრობთ პარტნიორზე;
მოყვეთ, რას გააკეთებთ, როცა შემდეგში შეხვდებით ერთმანეთს;
ახსენოთ თქვენი საყვარელი ეროგენული ზონები;
შესთავაზოთ სახალისო როლური თამაში.

სხვა იდეები, რომლებიც შეიძლება სცადოთ:

ახსენოთ წარსული სექსუალური გამოცდილება და შესთავაზოთ მისი ერთად გახსენება;
უთხრათ, როგორ ძალიან გსურთ, რომ მალე შეხვდეთ;
მიწეროთ, რა მოგეწონათ, როცა ბოლოს ერთად იყავით;
ჰკითხოთ, რა აღაგზნებს;
გაუგზავნოთ გამომწვევი ფოტო.

გახსოვდეთ: სავსებით ნორმალურია სექსტინგი იმ აქტივობებზე, რომლებსაც რეალურ ცხოვრებაში არ აპირებთ ან არ იზამდით — მთავარია, ორივე მხარე თანახმა იყოს და თავს კომფორტულად გრძნობდეთ.

სექსტინგის ემოციური გავლენა: დადებითი და უარყოფითი მხარეები

სექსტინგი შეიძლება იყოს ამაღელვებელი და ინტიმური გზა პარტნიორთან დასაკავშირებლად, მაგრამ მას შეიძლება ემოციური სიმძიმეც ახლდეს თან. ის, თუ როგორ იმოქმედებს სექსტინგი თქვენზე, დამოკიდებულია კონტექსტზე, თანხმობასა და ემოციურ მზაობაზე.

დადებითი ემოციური ეფექტები

ინტიმურობის ზრდა — თანხმობაზე დაფუძნებულმა სექსტინგმა შეიძლება გააძლიეროს ემოციური და სექსუალური კავშირი პარტნიორთან. ის ქმნის უსაფრთხო სივრცეს თვითგამოხატვის, „თამაშისა“ და სურვილების შესასწავლად;
თავდაჯერების ზრდა — ბევრ ადამიანს სექსუალური შეტყობინებების გაგზავნა მატებს თავდაჯერებულობას, განსაკუთრებით მაშინ, როცა პარტნიორისგან თბილი და დადებითი რეაქცია მოდის. ეს შეიძლება დაგეხმაროთ საკუთარი სხეულის უფრო პოზიტიურად აღქმასა და თვითსიყვარულში;
კავშირის შენარჩუნება — დისტანციურ ურთიერთობებში სექსტინგი ეხმარება პარტნიორებს სიახლოვისა და ვნების შენარჩუნებაში.

უარყოფითი ემოციური ეფექტები

სინანული და სირცხვილი — ზოგმა ადამიანმა შეიძლება სექსტინგის შემდეგ ინანოს საკუთარი ქმედება, განსაკუთრებით მაშინ, თუ ამის გაკეთებაში არ იყო ბოლომდე დარწმუნებული ან ზეწოლას განიცდიდა;
ძალადობა და ზეწოლა — სექსტინგი ყოველთვის 100%-ით თანხმობით უნდა ხდებოდეს. თუ პარტნიორი გაიძულებთ, ისეთი რამ გაუგზავნოთ, რაც არ გსურთ — ეს იმის ნიშანია, რომ რაღაც რიგზე არ არის. არავის აქვს უფლება, მოგთხოვოთ ინტიმური კონტენტი და უგულებელყოს თქვენი თანხმობა;
თვითშეფასების პრობლემა — თუ სექსტინგზე სასურველ პასუხს ვერ იღებთ ან თუ პარტნიორი მიმოწერის შემდეგ ქრება, ამან შეიძლება დაუფასებლობის, მოწყვლადობის ან გამოყენებულობის განცდა დატოვოს;
გამჟღავნების შიში — შიში, რომ პირადი შეტყობინებები ან ფოტოები გავრცელდება, შეიძლება გახდეს სტრესისა და პარანოიის წყარო, განსაკუთრებით მაშინ, როცა არ ხართ დარწმუნებული, ენდობით თუ არა პარტნიორს სრულად.

როგორ დაიცვათ საკუთარი ემოციური კეთილდღეობა

გადაამოწმეთ საკუთარ თავთან — სანამ სექსტს გააგზავნით, ჰკითხეთ თქვენს თავს: კომფორტულად ვარ? ნამდვილად მინდა ამის გაკეთება თუ ზეწოლას ვგრძნობ?
იუსაბრეთ ღიად — თუ სექსტინგი თქვენი ურთიერთობის ნაწილია, წინასწარ ისაუბრეთ საზღვრებსა და მოლოდინებზე;
გააანალიზეთ, როგორ გრძნობთ თავს სექსტინგის შემდეგ — თუ სექსტინგის შემდეგ შფოთვა ან სინანული გაქვთ, სერიოზულად მოეკიდეთ ამ გრძნობებს და განსაზღვრეთ ახალი საზღვრები მომავალისთვის;
ენდეთ ინტუიციას — თუ ვინმესთან საუბარი გაწუხებთ, ყოველთვის შეგიძლიათ უთხრათ „არა“ — ნებისმიერ მომენტში.

უსაფრთხოება — რა უნდა გავითვალისწინო?

სექსტინგთან დაკავშირებული უსაფრთხოების რჩევები ნებისმიერი ასაკის ადამიანისთვის მნიშვნელოვანია, მაგრამ განსაკუთრებით მნიშვნელოვანია მოზარდებისთვის, რომელთაც სექსტინგის შესაძლო საფრთხეები ჯერ არ აქვთ გაცნობიერებული.

ზრდასრულებისთვის სექსტინგის მთავარი რისკი უცნობ ან არასანდო ადამიანთან ინტიმური ფოტოების ან ვიდეოების გაზიარებაა. ამ ადამიანმა შეიძლება თქვენ მიერ გაგზავნილი კონტენტი გაუზიაროს სხვას ან გაყიდოს ის რომელიმე ვებსაიტზე, რაც უკვე ე.წ. „შურისძიების პორნოს“ (ინგლ. Revenge porn) კატეგორიაში გადადის — უკანონო აქტივობა, რომელიც გულისხმობს ყოფილი პარტნიორის მიერ ნებართვის გარეშე ინტიმური მასალის გავრცელებას. გარდა პარტნიორისა, არსებობს რისკი, რომ თქვენი სექსტი განზრახ ან შემთხვევით ვინმემ ნახოს, თუკი მას თქვენს მოწყობილობაზე ან ანგარიშებზე ექნება წვდომა, შემდეგ კი ის გაავრცელოს.

უმჯობესია, სექსტინგი მხოლოდ იმ ადამიანებთან გქონდეთ, ვისაც ნამდვილად ენდობით. წინასწარ შეთანხმდით ფოტოების წაშლის წესებზე. თუნდაც მაქსიმალურად ფრთხილად იყოთ, მაინც არსებობს რისკი, რომ თქვენი ინტიმური მასალა სხვა პირმა ნახოს. შეთანხმების შესაბამისად სრულად წაშალეთ ფოტოები — მათ შორის ციფრული „ნაგვის ურნიდან“ და ე.წ. „ქლაუდ“ საცავიდანაც.

მოზარდებს იგივე რისკები ემუქრებათ, რაც ზრდასრულებს, თუმცა მათ შემთხვევაში შედეგები ხშირად გაცილებით მძიმეა. მაგალითად, ზოგჯერ სექსტინგის გაჟონვა შეიძლება კიბერბულინგის მიზეზი გახდეს. კიბერბულერმა შეიძლება სექსტის მასალა გამოიყენოს და დაიწყოს თქვენი შევიწროება შეტყობინებებსა თუ კომენტარებში, ატვირთოს თქვენი ფოტოები, ვიდეოები ან პირადი ინფორმაცია სოციალურ მედიაში, ან დაიწყოს თქვენი ე.წ. „ქეთფიშინგი“ — თქვენი ფოტო-ვიდეოების გამოყენებით ყალბი ანგარიშების შექმნა და თქვენი იდენტობის მორგება.

სექსტინგი და გენდერი: სტიგმა, რისკები და მოლოდინები

სექსტინგი ხშირად განსხვავებულად აღიქმება გენდერისა და საზოგადოებრივი მოლოდინების მიხედვით. მიუხედავად იმისა, რომ სექსტინგში ყველა შეიძლება ჩაერთოს, რისკები, სოციალური რეაქცია და შედეგები არ არის ერთი და იგივე ქალებისთვის, კაცებისა და არაბინარული ადამიანებისთვის.

როგორ აღიქმება სექსტინგი გენდერის მიხედვით

ქალები და ფემინური იდენტობის მქონე ადამიანები ხშირად უფრო მკაცრი შეფასებისა და განსჯის ობიექტები ხდებიან. თუ ქალის ინტიმური ფოტოები გასაჯაროვდება, ის შეიძლება დარცხვენის ან შეურაცხყოფის სამიზნე გახდეს, მაშინ როცა ფოტოს მიმღები თითქმის არასდროს აგებს პასუხს. ქალები უფრო ხშირად ხდებიან „შურისძიების პორნოს“, იძულების ან რეპუტაციული ზიანის მსხვერპლი;
კაცები და მასკულინური იდენტობის მქონე ადამიანები ნაკლებად აწყდებიან სტიგმას, თუმცა მაინც შეიძლება გახდნენ მანიპულაციის, შანტაჟის ან ფოტოებისა და ვიდეოების უნებლიე გავრცელების მსხვერპლი. ზოგჯერ მათზე შეიძლება არსებობდეს ზეწოლა, რომ საკუთარი მასკულინურობის „დასამტკიცებლად“ გამოიჩინონ სექსტინგის ინიციატივა მაშინაც კი, როდესაც ეს მათთვის კომფორტული არ არის;

ტრანსი, არაბინარული და გენდერულად არაკონფორმული ადამიანები უნიკალურ რისკებს აწყდებიან. მათი სექსუალობა შეიძლება გახდეს ფეტიშიზაციის ან არასწორი გენდერული აღქმის საგანი. სექსტინგისთვის უსაფრთხო სივრცეების მოძებნა ხშირად რთულია გაცნობის აპლიკაციებსა და ციფრულ პლატფორმებზე, სადაც შეიძლება არსებობდეს ტრანსფობიური დამოკიდებულება.

► გასათვალისწინებელია, რომ სექსტინგის დროს ქვიარ ადამიანები დამატებითი რისკის ქვეშ არიან. თუკი სექსტები ან ინტიმური სურათები გასაჯაროვდება, შეიძლება მოხდეს მათი ე.წ. „აუთინგი“ — ქვიარ ადამიანების სექსუალური თუ გენდერული იდენტობის გასაჯაროება მათი ნების გარეშე — რასაც შეიძლება მოჰყვეს სტიგმა, დისკრიმინაცია ან ძალადობაც კი, განსაკუთრებით კონსერვატიულ გარემოში.

როგორ დავგეგმოთ სექსტინგი საკუთარი რისკის გათვალისწინებით

თუ გაწუხებთ სტიგმა ან რეპუტაციული ზიანი: სექსტისთვის შეარჩიეთ მხოლოდ ის ადამიანები, ვისაც ენდობით, და ერიდეთ ფოტოებზე სახის ან თქვენი იდენტობის გამომაშკარავებელი ნიშნების (ნაწიბური, ტატუ, ფონი) გამოჩენას;
თუ გრძნობთ, რომ გენდერული მოლოდინებით გაძალებენ სექსტინგს: გახსოვდეთ, რომ თანხმობა ვირტუალურ ინტიმურობაშიც მნიშვნელოვანია — თქვენ არ გაქვთ ვალდებულება, დაამტკიცოთ თქვენი მიმზიდველობა, მასკულინურობა ან თავდაჯერებულობა სექსტით;
თუ ლგბტქ+ ხართ და გაწუხებთ უსაფრთხოება: გაითვალისწინეთ, ვის აქვს წვდომა თქვენს შეტყობინებებზე და გამოიყენეთ დაშიფრული აპლიკაციები ან ე.წ. „გაქრობადი შეტყობინებები“, რომ დაცულად იგრძნოთ თავი.

სექსტინგი და ძალაუფლების უთანასწორობა: ზეწოლისა და ძალადობის ამოცნობა

სექსტინგი შეიძლება თანხმობაზე დაფუძნებული და სასიამოვნო პროცესი იყოს, თუმცა ის ასევე შეიძლება გადაიქცეს მანიპულაციის, ზეწოლის ან იძულების იარაღად. ძალაუფლების უთანასწორობა ბევრ ურთიერთობაში არსებობს და მან შეიძლება გავლენა მოახდინოს იმაზე, გრძნობს თუ არა ადამიანი თავს თავისუფლად და კომფორტულად სექსტინგის დროს.

მაგალითად, ძალაუფლების უთანასწორობა შეიძლება გამოიხატოს ასაკში, სოციალურ სტატუსში, გენდერულ დინამიკაში ან ემოციურ დამოკიდებულებაში. ასეთ სიტუაციებში ერთი მხარე შეიძლება ზეწოლის ქვეშ აღმოჩნდეს — გაგზავნოს შიშველი ფოტოები, ჩაერთოს სექსტინგში ან გააკეთოს სხვა რამ, რაც მის კომფორტს სცდება. ქვემოთ ჩამოთვლილია რამდენიმე „წითელი დროშა“, რომელიც მიანიშნებს, რომ სექსტინგი შეიძლება ზეწოლის შედეგად ხდებოდეს და არა — ნამდვილი თანხმობით:

ბრალის დადება: „მართლა რომ გიყვარდე, რამეს გამოგზავნიდი“;
მუქარა ან ულტიმატუმი: „თუ ფოტოს არ გამომიგზავნი, სხვას ვიპოვი“;
დაჟინება: „კარგი რა, ერთი მაინც გამომიგზავნე. ყველა გზავნის და შენ რა გჭირს“;
ემოციური შანტაჟი: „ძალიან დათრგუნული ვარ… რამე სექსუალური გამომიგზავნე და უკეთ ვიქნები“;
შურისძიება ან დაშინება: „კიდევ თუ არ გამომიგზავნი, ძველებს სხვას ვაჩვენებ“;
უთანასწორო სტატუსი: როდესაც დამსაქმებელი, ლექტორი, მენტორი ან უფროსი ასაკის ადამიანი ზეწოლას ახდენს უმცროსზე ან დაქვემდებარებულზე — ეს არა მხოლოდ ძალაუფლების ბოროტად გამოყენება, არამედ სექსუალური შევიწროების ერთ-ერთი ფორმაცაა.

როგორ მოვიქცე, თუ ვგრძნობ, რომ სექსტინგს მაიძულებენ?

დასაწყისშივე განსაზღვრეთ საზღვრები — აცნობეთ ადამიანებს, რა არის თქვენთვის კომფორტული და არ მისცეთ საშუალება, ბრალის დადებით ან დანაშაულის გრძნობით აზრი შეგაცვლევინონ;
მტკიცედ თქვით „არა“ — „ეს არ არის ჩემთვის კომფორტული“, „ასეთ რამეს არ ვაკეთებ“ ან „არ მინდა“. გახსოვდეთ, რომ არავის არაფერი არ გმართებთ, მათ შორის არც რომანტიკული ან სექსუალური პარტნიორის;
დააკვირდით მანიპულაციის ნიშნებს — თუ ვინმე მუდმივად ცდილობს თქვენზე ზეწოლას, ეს არ არის თქვენი და თქვენი საზღვრების პატივისცემა;
დაბლოკეთ ან მოიშორეთ ტოქსიკური ადამიანები — თუ ვინმე არ სცემს პატივს თქვენს საზღვრებს, გაწყვიტეთ ასეთ ადამიანთან კონტაქტი;
ისაუბრეთ ვინმესთან, ვისაც ენდობით — თუ არ იცით, როგორ მოიქცეთ, გაუზიარეთ მდგომარეობა მეგობარს, თერაპევტს ან სანდო ადამიანს.

► გახსოვდეთ: იძულება არ არის თანხმობა! თუ გრძნობთ ზეწოლას, დისკომფორტს ან გამოუვალობას — ეს არ არის თანხმობა. ჯანსაღი ურთიერთობები ეფუძნება ურთიერთპატივისცემასა და ენთუზიაზმით მიღებულ გადაწყვეტილებებს და არა — ბრალს, შიშს ან იძულებას.

ზოგადი რჩევები უსაფრთხო სექსტინგისთვის

იმისთვის, რომ თქვენ ფოტოები არასწორი ადამიანის ხელში არ აღმოჩნდეს და თქვენი სექსტინგი მაქსიმალურად უსაფრთხო და კონფიდენციალური იყოს, გამოიყენეთ დაცული მესენჯერ-აპლიკაციები:

Signal — იყენებს end-to-end ტიპის დაშიფვრას, რაც ნიშნავს, რომ მხოლოდ თქვენ და მიმღებს შეგიძლიათ წაიკითხოთ შეტყობინებები. ასევე აქვს შეტყობინებების გაქრობისა და ე.წ. „სქრინშოთების“ (ეკრანის ანაბეჭდი) დაბლოკვის ფუნქცია (Android-ზე).
Telegram (საიდუმლო ჩატები) — გთავაზობთ დაშიფრულ ჩატებს, რომლებიც არ ინახება სერვერებზე. ასევე შეგიძლიათ დააყენოთ ავტომატური წაშლის ტაიმერი ფოტო-ვიდეოებისა და მესიჯებისთვის.
WhatsApp — დაშიფრულია, მაგრამ გაითვალისწინეთ, რომ ავტომატური „ქლაუდ“ არქივები შეიძლება ხელმისაწვდომი გახდეს ანგარიშის გატეხვის შემთხვევაში.
Snapchat — შეტყობინებები ქრება ნახვის შემდეგ, მაგრამ მიმღებს შეუძლია ეკრანის ანაბეჭდის გადაღება, ამიტომ იყავით ფრთხილად.

► თუ კონფიდენციალურობა მნიშვნელოვანია, მოერიდეთ ჩვეულებრივი SMS შეტყობინებების გაგზავნას — ისინი არ არის დაშიფრული.

ფოტო-ვიდეო მასალაში მაქსიმალურად შეამცირეთ ყველა ის დეტალი, რომლითაც შეიძლება თქვენი ვინაობის ამოცნობა. მაგალითად:

არ გამოაჩინოთ სახე, ტატუები, შრამები, ხალები ან სამკაულები;
გაითვალისწინეთ ფონი (ოთახის ინტერიერი, სარკე, დოკუმენტები), რომელიც ფოტოზე ჩანს;
არასასურველი დეტალები შეგიძლიათ ფოტოებიდან გაგზავნამდე ამოჭრათ ან „დაბლაროთ“.

გარდა ამისა, გაითვალისწინეთ, რომ სმარტფონების უმეტესობა ფოტოებში ინახავს მეტა-მონაცემებს (ინგლ. Metadata), როგორიცაა გადაღების თარიღი, დრო და GPS-ლოკაცია. ეს ნიშნავს, რომ ფოტოს მეშვეობით შეიძლება ვინმემ თქვენი ადგილმდებარეობა განსაზღვროს. იმისთვის, რომ მოწყობილობამ ეს მონაცემები არ დაიმახსოვროს:

iPhone-ზე: გახსენით ფოტო > დააწკაპუნეთ “i” > ლოკაციის ველის ქვეშ აირჩიეთ “Adjust” > დააყენეთ “No Location”;
Android-ზე: გახსენით კამერა > გადადით პარამეტრებში > გამორთეთ “Save location info”;

უკვე გადაღებული ფოტოებიდან მეტა-მონაცემების წასაშლელად შეგიძლიათ გამოიყენოთ აპლიკაციები, როგორებიცაა Image Scrubber ან Metapho (iOS-ზე).

თუკი გჭირდებათ ინტიმური ფოტო-ვიდეო მასალის სადმე შენახვა, შეგიძლიათ, გამოიყენოთ დაშიფრული „ქლაუდ“ სერვისები, როგორიცაა, მაგალითად, ProtonDrive ან Tresorit. თავი შეიკავეთ სენსიტიური ფაილების შენახვისგან Apple iCloud-სა და Google Drive-ზე, თუკი არ გაქვთ ჩართული ორფაქტორიანი ავთენთიფიკაცია (2FA) და არ გაქვთ გამორთული ავტომატური „ბექაფები“.

როგორ შევწყვიტო არასასურველი სექსტინგი?

სექსტინგი შეიძლება იყოს ჯანსაღი და სახალისო, თუმცა ასევე შეიძლება მიიღოთ ისეთი სექსტი, რომელიც არ მოგწონთ ან რომლის მიღებაც არ გსურდათ. ასეთ დროს რამდენიმე რამის გაკეთება შეგიძლიათ. თუ სექსტის გამომგზავნი ის ადამიანია, ვისთანაც თავს კომფორტულად გრძნობთ, პირველი ნაბიჯი შეიძლება იყოს, უბრალოდ, იმის თქმა, რომ ეს არ მოგეწონათ. აუხსენით, რომ თქვენ არ გითქვამთ თანხმობა სექსტინგზე და არ გსურთ ეს ურთიერთობაში ან, უბრალოდ, არ მოგწონთ ასეთი ტიპის შეტყობინებები. შესაძლოა, ადამიანმა გაუცნობიერებლად გამოგზავნა ასეთი შეტყობინება. ასეთ შემთხვევაში, იმის თქმა, რომ მსგავსი შეტყობინებები არ გსურთ, როგორც წესი, საკმარისია.

თუ თქვენი მცდელობა უშედეგო აღმოჩნდა, სხვა შესაძლო ნაბიჯებია:

შეაგროვეთ მტკიცებულებები — გადაიღეთ შეტყობინების ე.წ. „სქრინშოთი“, რომელზეც ჩანს გამომგზავნის სახელი. მაგრამ გაითვალისწინეთ, რომ მასში არ ჩანდეს შიშველი ან ინტიმური ფოტო/ვიდეო — შეინახეთ მხოლოდ ტექსტური მტკიცებულებები;
დაარეპორტეთ — გარდა შესაბამის აპლიკაციაში დარეპორტებისა, დაფიქრდით, გსურთ თუ არა ამის შესახებ შეატყობინოთ პოლიციას ან ვინმე ავტორიტეტულ ადამიანს, ვინც დაგეხმარებათ — მაგალითად, მშობელს, მასწავლებელს ან თერაპევტს;
დაბლოკეთ — არაერთი გზითაა შესაძლებელი არასასურველი შეტყობინებების ან ადამიანების გაფილტვრა, დამალვა, დაბლოკვა ან მათთვის წვდომის შეზღუდვა;
ითხოვეთ დახმარება — თუ მაინც იღებთ არასასურველ შეტყობინებებს ან მომხდარის გამო თავს ცუდად გრძნობთ, მიმართეთ იურისტს, ფსიქოლოგს, დამხმარე ორგანიზაციას ან სანდო ადამიანს.

გარდა ამისა, შესაძლოა, სექსტი საკუთარი სურვილით გაგზავნოთ, შემდეგ კი ინანოთ. ასეთ დროს, შეგიძლიათ გადადგათ შემდეგი ნაბიჯები:

გაჩერდით, დაფიქრდით და ზედმეტად არ დაადანაშაულოთ საკუთარი თავი;
მოუბოდიშეთ ადრესატს, თუკი სექსტი თანხმობის გარეშე გაუგზავნეთ;
სთხოვეთ, რომ წაშალოს;
თუკი მხარდაჭერა გჭირდებათ, ესაუბრეთ მეგობარს ან სანდო ადამიანს.

თუკი ვინმემ თქვენი სექსტი გაასაჯაროვა ან სხვებს გაუზიარა:

იმოქმედეთ დაუყოვნებლივ, რადგან დროსთან ერთად მისი გავრცელების შეჩერება გართულდება;
ნუ ეცდებით შურისძიებას;
შეამოწმეთ, შესაძლებელია თუ არა გამოსახულების წაშლა ინტერნეტიდან;
რჩევისა და მხარდაჭერისთვის მიმართეთ ფსიქოლოგს ან სხვა მხარდამჭერ ადამიანს;
გაწყვიტეთ კონტაქტი იმ ადამიანთან, ვინც ზიანს გაყენებთ.

ვის მივმართო, თუ ჩემი სექსტი ან ინტიმური ფოტო/ვიდეომასალა უნებართვოდ გავრცელდა?

თუ თქვენი თანხმობის გარეშე გავრცელდა სექსტი, შიშველი ან ინტიმური ფოტო/ვიდეო, უმჯობესია, რაც შეიძლება სწრაფად იმოქმედოთ. ამისთვის, შეგიძლიათ, მიმართოთ:

სპეციალურ საგამოძიებო სამსახურს, რომელიც პასუხისმგებელია ციფრულ ძალადობასთან დაკავშირებულ საქმეებზე, განსაკუთრებით როცა საქმე ეხება სქესობრივ/ინტიმურ მასალას. ვებგვერდი: https://sis.gov.ge; ცხელი ხაზი: 032 2 40 61 61;
ფემინისტურ და ადამიანის უფლებათა ორგანიზაციებს. ეს ორგანიზაციები დაგეხმარებიან იურიდიული კონსულტაციითა და ფსიქოლოგის მხარდაჭერით. ასეთებია, მაგალითად:
- „საფარი“ — უფასო კონსულაცია: 599 407 603; მისამართი: თბილისი, აკაკი გახოკიძის ქ. #11ა.
- „ქალთა ინიციატივების მხარდამჭერი ჯგუფი“ (WISG) — ტელეფონი: 595 190 303; ელ. ფოსტა: [email protected].
- „ახალგაზრდა იურისტთა ასოციაცია“ — ტელეფონი: (995 32) 299 50 76; ელ.ფოსტა: [email protected]; მისამართი: თბილისი, უზნაძის ქ. #101.

წყარო: WebMD