სექსუალურ ძალადობას სხვადასხვა ფორმა შეიძლება ჰქონდეს და ის ყოველთვის არ გულისხმობს ფიზიკური ძალის გამოყენებას. ხანდახან ეს ხდება ფსიქოლოგიური ძალადობის ან მანიპულაციის გზით. ამის მაგალითი შეიძლება იყოს არამხოლოდ მუქარა, არამედ შერცხვენაც. ამ ტიპის ქმედებებს მივყავართ იქამდე, რომ ადამიანი იძულებული ხდება, ჰქონდეს სექსუალური კონტაქტი მისი სურვილის საწინააღმდეგოდ.
სექსუალური იძულების საკუთარ თავზე გამოცდა შეიძლება დამაბნეველი და ძალიან არაკომფორტული იყოს. ამ დროს ადამიანი გრძნობს, რომ რაც მოხდა, არასწორი იყო, თუმცა ზოგჯერ ბოლომდე არ ესმის, როგორ ან რატომ. შესაძლოა, მან ისიც იფიქროს, რომ ძალადობის მსხვერპლი არ გამხდარა, რადგან საბოლოოდ მაინც თქვა „კი“.
თუმცა, აქ გასათვალისწინებელია ერთი ძალიან მნიშვნელოვანი რამ: ნამდვილი თანხმობა მხოლოდ საკუთარი ნებით გაიცემა. თუკი ადამიანი თანხმობას მხოლოდ იმიტომ გასცემს, რომ სხვამ მასზე ზეწოლა მოახდინა ან დაემუქრა, ეს არ არის ნამდვილი თანხმობა.
- იხილეთ აგრეთვე ჩვენი ქვიზი: რამდენად კარგად გესმის, რას ნიშნავს თანხმობა სექსში?
ზუსტად რას ნიშნავს იძულება?
იძულება გულისხმობს ნებისმიერ მცდელობას, გააკონტროლონ შენი ქცევა მუქარით ან მანიპულაციით. შესაბამისად, სექსუალური იძულება ხდება მაშინ, როდესაც ადამიანი არ იღებს „არას“ და აგრძელებს მეორე ადამიანის დარწმუნებას, რომ შეაცვლევინოს აზრი სექსუალურ აქტივობაში მონაწილეობაზე.
► შენიშვნა: ამ სტატიაში ტერმინ „სექსს“ გამოვიყენებთ ერთგვარ შემოკლებად ნებისმიერი ფორმის სექსუალური კონტაქტის ან აქტივობის აღსაწერად. არ არსებობს სექსის ერთი განმარტება და ის, თუ ზუსტად რა მიიჩნევა სექსად, ყველასთვის ინდივიდუალურია.
მაგალითად, სექსუალური იძულება შეიძლება მოიცავდეს:
- კოცნას, ლოკვას, წოვას სხეულის ნებისმიერ ნაწილზე;
- შეხებას, ზელას, ხახუნს სხეულის ნებისმიერ ნაწილზე;
- თითაობას (ე.წ. „ფინგერინგს“; ინგლ. Fingering) ან მასტურბაციას;
- კუნილინგუსს ან მინეტს;
- ვაგინალურ ან ანალურ პენეტრაციას („შეღწევას“).
► როდესაც ადამიანი უარს ამბობს სექსზე, ყველაფერი ამით უნდა დასრულდეს. თუმცა, ხშირად ეს ასე არ ხდება.
ზოგჯერ იძულება საკმაოდ პირდაპირია. მაგალითად, ადამიანმა შეიძლება თქვას: „თუ ჩემთან სექსი არ გექნება, ყველას ვეტყვი, რომ სექსი გვქონდა“. სხვა შემთხვევაში ის შეიძლება უფრო მეტად ფარული იყოს, მაგალითად: „იცი რა, მოდი, ცოტა ღვინო დავლიოთ და ტანსაცმელი გაიხადე, მერე კი ვნახოთ, რა იქნება“.
იძულებს ხშირ ტაქტიკებს შორისაა:
- დანაშაულის შეგრძნების გამოწვევა;
- მუქარა;
- ემოციური შანტაჟი;
- ალკოჰოლის ან ნარკოტიკების მიცემა, რათა ადამიანი „მოეშვას“.
იძულება, როგორც წესი, სიტყვიერი და ემოციური ზეწოლის ფარგლებში რჩება. მიუხედავად ამისა, საკმაოდ ხშირია იძულების შედეგად დათმობა იმის გამო, რომ ადამიანს შეიძლება შეეშინდეს, რომ მანიპულაცია და ზეწოლა ფიზიკურ აგრესიაში ან ძალადობაში გადაიზრდება.
სექსუალური იძულება ხშირად ხდება რომანტიკულ ურთიერთობებში, თუმცა ის ასევე შეიძლება სხვა კონტექსტშიც მოხდეს — მაგალითად, ნაცნობების, თანამშრომლების, მეგობრებისა და ოჯახის წევრების მხრიდანაც კი, ასევე სკოლაში, წვეულებაზე, ღამის კლუბში და ნებისმიერი სხვა ადგილას.
რა განსხვავებაა იძულებასა და თანხმობას შორის?
თუკი სინამდვილეში არ გსურთ სექსი და მხოლოდ იმიტომ თანხმდებით, რომ თავს ვალდებულად გრძნობთ ან არ გინდათ, თქვენი პარტნიორი გაბრაზდეს (ან უკმაყოფილო იყოს, ეწყინოს და ა.შ.), თქვენ თანხმობას საკუთარი ნებით არ გასცემთ.
იძულება ხდება მაშინ, როდესაც ვიღაცას სურს, თანხმობა განაცხადოთ, მიუხედავად იმისა, რომ უკვე თქვით „არა“ ან რაიმე სხვა ფორმით გამოხატეთ ინტერესის არარსებობა. სასურველი შედეგის მისაღებად მან შეიძლება გამოიყენოს მუქარა, დარწმუნება ან სხვა ტაქტიკები.
როდესაც საქმეში ალკოჰოლი ერთვება
ადამიანების ნაწილს შეუძლია თანხმობის გაცემა 1-2 ჭიქა ალკოჰოლის შემდეგ, თუმცა თუკი ნარკოტიკები ან ალკოჰოლი მოქმედებს თქვენს უნარზე, მიიღოთ გაცნობიერებული გადაწყვეტილებები, მაშინ ამ დროს თანხმობის გაცემა არ შეგიძლიათ.
ვთქვათ, პაემანზე ხართ. რამდენიმე ჭიქა დალიეთ და ალკოჰოლმა სასიამოვნოდ შეგაზარხოშათ, მაგრამ მთვრალი არ ხართ. თქვენს პარტნიორთან მშვენიერი კომუნიკაცია გაქვთ და თავს კარგად გრძნობთ, თან ატყობთ, რომ ისიც იმავე აზრზეა. ამ დროს, სანამ ჯერ კიდევ ორივეს შეგიძლიათ გაცნობიერებული გადაწყვეტილების მიღება, ორივეს შეგიძლიათ თანხმობის გაცემაც.
თუმცა, თუკი ვინმე განგრძობითად გთავაზობთ ალკოჰოლის მიღების გაგრძელებას, რათა საკმარისად დაგათროთ და სექსზე დაგითანხმოთ, ეს სექსუალური იძულებაა.
ურთიერთობაში
ურთიერთობაში ყოფნა არ ნიშნავს, რომ თქვენ განგრძობით თანხმობას იძლევით. ყველას აქვს უფლება, თავად გადაწყვიტოს, როდის უნდა და როდის არ უნდა სექსი. როდესაც იტყვით უარს, თქვენმა პარტნიორმა ამას პატივი უნდა სცეს. ნებისმიერი მუქარა, დადანაშაულება თუ დაყოლიება, რომლის მიზანიც თქვენი გადარწმუნებაა, არის იძულება.
ამის გათვალისწინებით, ალბათ, გაჩნდება კითხვა, არის თუ არა იძულება, როდესაც პარტნიორი კომპლიმენტს გეტყვით თქვენს ჩაცმულობაზე ან მასაჟს გაგიკეთებთ განწყობის შესაქმნელად. როგორც წესი, ამის დასადგენად რამდენიმე მნიშვნელოვანი რამის გათვალისწინებაა საჭირო:
- მისი განზრახვა
- თქვით თუ არა უკვე უარი
- რა რეაქცია ჰქონდა მას თქვენს უარზე
მაგალითად, პარტნიორს უთხარით, რომ დღეს არ ხართ ხასიათზე, მისი პასუხი კი იყო: „კარგი. უბრალოდ მასაჟს გავაგრძელებ, თუკი ამის სურვილი გაქვს“. ეს საშუალებას გაძლევთ, აირჩიოთ, გსურთ თუ არა ინტიმურობის ამჟამინდელი დონის გაგრძელება, როდესაც აღარ არსებობს შემდეგ ეტაპზე გადასვლის ზეწოლა. თუკი მოგვიანებით თქვენ გადაწყვეტთ, რომ სექსი მოგინდათ, ეს არ არის იძულება — მანამ, სანამ ეს გადაწყვეტილება თქვენგან წამოვიდა.
თუმცა, იძულება იქნებოდა შემთხვევა, როდესაც პარტნიორი დაიჟინებდა, რომ მას სურს, დაგეხმაროთ მოდუნებაში, შემდეგ კი გააგრძელებდა იმის მცდელობას, რომ სექსის განწყობაზე მოეყვანეთ თქვენი სურვილის საწინააღმდეგოდ.
როგორ შეიძლება გამოიყურებოდეს იძულება — მაგალითები
სექსუალურ იძულებას შეიძლება ნებისმიერი ფორმა ჰქონდეს. მოკლედ რომ ვთქვათ, როდესაც ვინმე თქვენზე ზეწოლას ცდილობს ან თავს არაკომფორტულად გაგრძნობინებთ სექსზე თანხმობის მიღების მიზნით ან მას შემდეგ, რაც უკვე უარი განაცხადეთ, შეიძლება იძულებას ცდილობდეს.
ქვემოთ ჩამოთვლილია სექსუალური იძულების რამდენიმე ხშირი ტიპი.
პირდაპირი მუქარები
ზოგჯერ ადამიანმა შეიძლება ძალიან ცხადად თქვას, რას მოიმოქმედებს, თუკი მას სექსზე არ დათანხმდებით. მაგალითად:
- მან შეიძლება თქვას, რომ ზიანს მიაყენებს ვინმე სხვას: „შენ თუ არ გექნება სექსი ჩემთან, კარგი. შენი მეგობარია მთვრალი და დარწმუნებული ვარ, უარს არ მეტყვის“;
- პარტნიორი შეიძლება დაგემუქროთ, რომ დაგშორდებათ: „ურთიერთობაში სექსი საჭიროა. თუ არ აპირებ ჩემთან სექსს, უნდა დავშორდეთ“;
- თანამშრომელი ან უფროსი შეიძლება კარიერის დანგრევით დაგემუქროთ: „შემიძლია, გაგიშვა სამსახურიდან. ვიტყვი, რომ იპარავდი, და სხვა არავინ აგიყვანს“.
სოციალური წნეხი
ადამიანმა შეიძლება თქვენი სექსზე დათანხმება სცადოს იმის თქმით, თითქოს „არა“ ნიშნავს იმას, რომ თქვენს თავს რაღაც ვერ არის რიგზე. მაგალითად:
- „უკვე ამდენჯერ ვნახეთ ერთმანეთი! არ გგონია, რომ სექსის დროა?“;
- „რას ელოდები? ეს უბრალოდ სექსია. ისე ნუ გამოგყავს, თითქოს დიდი ამბავი იყოს. გავერთობით“;
- „ნუ ხარ მორცხვი. ყველა სხვას სექსი აქვს. ზედმეტად დიდი ხარ იმისთვის, რომ ქალიშვილი/ვაჟიშვილი იყო“.
► გახსოვდეთ: არ აქვს მნიშვნელობა, რას ფიქრობენ სხვები, არც იმას, თუ რამდენჯერ შეხვდით ვინმეს, რამდენი წლის ხართ და ა.შ. — მხოლოდ თქვენი გადასაწყვეტია, გინდათ თუ არა სექსი და სხვას არ აქვს უფლება, ამაზე მიგითითოთ.
ემოციური მანიპულაცია
ურთიერთობაში პარტნიორმა შეიძლება თქვენი ემოციებით მანიპულაცია სცადოს, რათა შეგაცვლევინოთ აზრი სექსის ქონაზე ან ნებისმიერი სხვა რამის გაკეთებაზე. როდესაც ადამიანი თქვენს ემოციებს განზრახ იყენებს იმის იმედად, რომ რაიმე ისეთის გაკეთებაში დაგარწმუნოთ, რაც არ გინდათ, ეს იძულებაა.
შესაძლოა, მან თქვას „კი, მესმის“ ან „არა უშავს“, მაგრამ მის სხეულის ენა სულ სხვა რამეზე მეტყველებდეს, მაგალითად, ფეხების ბრაგუნით სიარული, კარის მოჯახუნება, ამოოხვრა, მუშტის შეკვრა ან ტირილიც კი.
ზოგმა ემოციურად მოძალადე პარტნიორმა შეიძლება უარი განაცხადოს თქვენთან ლაპარაკზე, სანამ მას არ დაეთანხმებით ან მის სიმპათიას ვერ მოიპოვებთ. მაგალითად: „ვწუხვარ, რომ დაღლილი ხარ, მაგრამ არა მგონია შენი დღე იმ საშინელ კვირას შეედრებოდეს, რომელიც მე მქონდა. უბრალოდ სექსით რომ დავკავდეთ, დარწმუნებული ვარ, ორივე უფრო კარგად ვიგრძნობთ თავს“.
თავისმომაბეზრებელი ჩაციება
იძულება ხშირად ისეთი მარტივი ფორმით ვლინდება, როგორიც სექსის განმეორებითი მოთხოვნებია. ეს შეიძლება ისეთ ადამიანთანაც მოხდეს, რომელთანაც არასდროს ყოფილხართ ან არასდროს გქონიათ სექსი. შესაძლოა, მან მუდმივად გწეროთ, გთხოვოთ შანსის მიცემა ან გამოცხადდეს თქვენს სამსახურსა თუ საგანმანათლებლო დაწესებულებაში და პირადად სცადოს თქვენი დარწმუნება.
მსგავსი თავისმომაბეზრებელი ჩაციება შეიძლება ურთიერთობაშიც მოხდეს. შესაძლოა, ბოლო დროს სექსის ხასიათზე არ ყოფილხართ ფიზიკური ჯანმრთელობის პრობლემის, სტრესის ან სხვა მიზეზის გამო. თქვენი პარტნიორი კი, ნაცვლად იმისა, რომ გკითხოთ, თუ როგორ გრძნობთ თავს და შემოგთავაზოთ დახმარება, ყოველდღიურად გეკითხებათ:
- „რას ფიქრობ, დღეს ღამით იქნები სექსის ხასიათზე?“;
- ან შეიძლება უფრო ირიბად მიგანიშნოთ ამაზე, მაგალითად, თქვას „ნეტავ მალე გამოკეთდებოდე“ ან „ჭურჭელს დავრეცხავ და სახლს დავალაგებ, თუ დღეს ეგ ხასიათზე მოგიყვანს“.
დადანაშაულება
დადანაშაულება იძულების კიდევ ერთი ხშირი ტაქტიკაა. ასეთ დროს, სხვა ადამიანის მიმართ გრძნობებმა შეიძლება უფრო მოწყვლადი გაგხადოთ. როდესაც ვინმე გადარდებთ და არ გინდათ მისი გულის ტკენა, მეორემ მხარემ ეს შეიძლება თავის სასიკეთოდაც გამოიყენოს. მაგალითად:
- „ძალიან მარტოსულად ვგრძნობ თავს და ახლა ძალიან მჭირდები“;
- „უკვე ერთი კვირაა, სექსი არ გვქონია და ძალიან მიჭირს ამდენ ხანს გაძლება“;
- „არ მჯერა, რომ ასეთ დღეს ჩემთან სექსი არ გინდა. როგორც ჩანს, ისე ძალიანაც არ გიყვარვარ, როგორც ამბობ“.
ადამიანმა ასევე შეიძლება თქვენში დანაშაულის შეგრძნების აღძრა სცადოს სიტუაციის შემოტრიალებით, რათა გაფიქრებინოთ, რომ რაღაც არასწორად ქენით: „უკვე ამდენი ხანია, სექსი აღარ გინდა. ალბათ, მღალატობ. თუ ასე არაა, მაშინ მაჩვენე, რომ ჯერ კიდევ გინდივარ“.
მზრუნველობის მოკლება
თუნდაც სექსი არ გინდოდეთ, შესაძლოა, მაინც გსურდეთ ადამიანთან სიახლოვე კოცნით, ჩახუტებით, მოფერებით, საუბრით ან დროის ერთად გატარებით. თუმცა, ამ ადამიანმა, შესაძლოა, თქვენზე ზეწოლა სცადოს სექსზე აზრის შესაცვლელად და ცუდად მოგექცეთ მანამ, სანამ არ დაეთანხმებით. მაგალითად:
- წამოხტეს, მოგშორდეთ, ხელი გკრათ
- მთლიანად იზოლირდეს
- თქვას დამცინავი ან შეურაცხმყოფელი კომენტარები
გარდა ამისა, შესაძლოა, როცა მის კოცნას ან შეხებას ეცდებით, გაიწიოს, თუკი ცხადი იქნება, რომ ამაზე მეტს არ აპირებთ.
დაკნინება
იძულების კიდევ ერთი ცნობილი ტაქტიკაა დაკნინების მცდელობები. შესაძლოა, ადამიანმა თქვენს თვითშეფასებას შემოუტიოს, როდესაც მას უარს ეტყვით, ან ისე მოიქცეს, თითქოს მისი მადლობელი უნდა იყოთ, რომ თქვენთან სექსი სურს. მაგალითად:
- „მიდი, აბა, და იპოვე სხვა, ვისაც შენთან სექსი ენდომება“;
- „მადლობელი უნდა იყო, რომ ჯერ კიდევ აქ ვარ. ნებისმიერთან დავწვებოდი, რომ მინდოდეს, და ამას ვერც ვერასდროს გაიგებდი“;
- „ალბათ, არც ვარგიხარ სექსში. გასაკვირი არაა, რომ მარტო ხარ“.
დაჟინება
სექსზე ერთხელ თანხმობის გაცემა არ ნიშნავს, რომ ადამიანი ყოველ ჯერზეა თანახმა. მსგავსად ამისა, ადამიანს შეუძლია ნებისმიერ დროს უკან გაიწვიოს თანხმობა. ამიტომ, მაგალითად, თუკი იტყვით „მოიცა, მგონი, არ მნდომებია გაგრძელება“ ან „მოდი, ცოტა ხანს გავჩერდეთ“, თქვენმა პარტნიორმა ამას პატივი უნდა სცეს და მყისიერად გაჩერდეს. ნებისმიერი სხვა პასუხი შეიძლება იძულება იყოს. მაგალითად:
- „მაგრამ ხომ თქვი, რომ დღეს სექსი გვექნებოდა“;
- „ძალიან აღგზნებული ვარ, ვერ გავჩერდები. უნდა გავაგრძელოთ“;
- „ძალიან დიდი სტრესის ქვეშ ვარ, ეს მჭირდება“.
ყველა ეს და მსგავსი პასუხი ასახავს იმას, თუ რა სურს პარტნიორს, და არა იმას, რომ ის თქვენზე დარდობს.
გადამეტებული მზრუნველობა და ვალდებულების შეგრძნების გამოწვევა
სრულიად შესაძლებელია, ადამიანი თქვენს მანიპულაციას და სექსზე დაყოლიებას პოზიტიური ზეწოლით ცდილობდეს, მაგალითად, კომპლიმენტებით, საჩუქრებით, კეთილი ჟესტებითა თუ სხვა ტიპის მზრუნველობით.
შესაძლოა, ადამიანმა დაგპატიჟოთ ვახშამზე ძვირადღირებულ რესტორანში, ყვავილები გამოგიგზავნოთ სამსახურში ან გაჩუქოთ ძვირფასი საჩუქრები — ეს ყველაფერი იმ მოლოდინით, რომ ხელგაშლილობაზე მადლობას ფიზიკური ინტიმურობით გადაიხდით.
შესაძლოა, მან თქვას: „ისე ლამაზად გამოიყურები, თავს ვერ ვიკავებ“ ან „შენზე ფიქრიც კი ძალიან აღმაგზნებს“. ზოგადად, თავად კომპლიმენტები არ ნიშნავს იძულებას, მაგრამ მნიშვნელოვანია იმაზე დაკვირვება, რა ხდება მას შემდეგ, რაც „არას“ იტყვით — ადამიანი პატივს სცემს თქვენს გადაწყვეტილებას და უკან იხევს თუ მაინც აგრძელებს „პოზიტიურ“ ზეწოლას?
უარის თქმაზე შანსის მიუცემლობა
ენთუზიაზმით და გაცხადებულად „კის“ თქმა თანხმობის ერთადერთი უტყუარი ფორმაა. ჩუმად ყოფნა არ ნიშნავს თანხმობის გაცემას. ზოგ სიტუაციაში შეიძლება არ გსურდეთ „კის“ თქმა, მაგრამ გეშინოდეთ „არას“ თქმის.
ადამიანი, რომელიც პატივს გცემთ, დიდი ალბათობით თქვენი სხეულის ენიდან გამომდინარე შეამჩნევს, რომ თავს არაკომფორტულად გრძნობთ, და ის აუცილებლად გაჩერდება და გადაამოწმებს თქვენთან, ხომ ყველაფერი რიგზეა.
როდესაც ადამიანი იწყებს სექსუალურ კონტაქტს ისე, რომ მანამდე არ განიხილავს საზღვრებს ან არ გეკითხებათ, რისი გაკეთება გსურთ, შესაძლოა, იმის იმედად იყოს, რომ, უბრალოდ, ყველაფერზე წაჰყვებით, რასაც თავად მოისურვებს. შესაძლოა, სულაც, გაგაღვიძონ სექსისთვის და დაგირღვიონ ძილი იმის იმედით, რომ ზედმეტად დაღლილი იქნებით პროტესტის გამოსახატად.
როგორ მოვიქცეთ იმ მომენტში?
როდესაც გაიაზრებთ, რომ პარტნიორი თუ ვინმე სხვა ცდილობს თქვენს იძულებას, დაგითანხმოთ სექსზე, პირველ ყოვლისა, კარგი იქნება, თუ პირდაპირ, ხმამაღლა იტყვით ამას (თუკი საკმარისად უსაფრთხოდ გრძნობთ თავს ამის გასაკეთებლად). იყავით პირდაპირი და მკაცრი. შეგიძლიათ, თქვათ:
- „გითხარი, რომ არ მინდა სექსი. ჩემზე ზეწოლის მცდელობა აზრს არ შემაცვლევინებს“;
- „მინდა, რომ ერთად გავატაროთ დრო, მაგრამ სექსით არ ვარ დაინტერესებული. იქნებ გაგვესეირნა?“
თუკი ამ დროს ის არ შეწყვეტს იმის კეთებას, რითაც თქვენს იძულებას ცდილობდა, კარგი იქნება, თუ მოშორდებით მას ან/და მეგობარს ან ვინმე სანდო ადამიანს დაუკავშირდებით. თუნდაც არ გსურდეთ იმაზე საუბარი, რაც ხდება, ვინმე ისეთის ყოლა, ვისთანაც, უბრალოდ, ილაპარაკებთ (ან კიდევ უკეთესი — თუ ის პირადადაც გესტუმრებათ), დაგეხმარებათ, რომ უფრო უსაფრთხოდ და ნაკლებად მარტო იგრძნოთ თავი.
► გვესმის, რომ შეიძლება ძალიან რთული იყოს უარის თქმა უფროსისთვის, თანამშრომლისთვის, ლექტორისა თუ ნებისმიერი იმ ადამიანისთვის, რომელსაც თქვენზე მეტი ძალაუფლება აქვს სამსახურში, ცხოვრებასა თუ აკადემიურ კარიერაში — ეს შიში ბუნებრივია და თქვენ მარტო არ ხართ. ასეთ დროს ყველაზე სწორი შეიძლება იყოს პირდაპირი და ცხადი „არა“, შემდეგ კი სიტუაციიდან გაცლა და შესაბამისი პირისთვის მიმართვა, მაგალითად, სამსახურის შემთხვევაში, ოფიციალური საჩივრის დაწერა ადმინისტრაციასა თუ ადამიანური რესურსების (HR) მენეჯერთან.
როგორ მოვიქცეთ შემდეგ?
თუ ვინმე ზეწოლას მოახდენს, რომ დაკავდეთ სექსით, შემდეგი ნაბიჯები თქვენზეა დამოკიდებული.
► გაითვალისწინეთ: იძულება დანაშაულია და თქვენ სრული უფლება გაქვთ, დამნაშავეს უჩივლოთ.
შეგიძლიათ, ექიმთან გაიაროთ შემოწმება და გაიტესტოთ სქესობრივი გზით გადამდებ ინფექციებზე (სგგი), ექიმის დანიშნულებით მიიღოთ გადაუდებელი კონტრაცეფცია და შეაგროვოთ მტკიცებულებები იმ შემთხვევისთვის, თუკი პოლიციაში გასაჩივრებას გადაწყვეტთ.
პროფესიონალური დახმარების მიღება და საკუთარ ფიზიკურ და მენტალურ აღდგენაზე ზრუნვა შეიძლება დაგეხმაროთ იმის შეგრძნებაში, რომ უფრო მეტი კონტროლი გაქვთ სიტუაციაზე, ამავდროულად კი სიმშვიდესაც მოიპოვებთ საკუთარ ჯანმრთელობასთან დაკავშირებით.
გარდა ამისა, სამუშაო თუ სამსახურებრივი დაწესებულების მიერ გამოყოფილ ან ცალკეულ ფსიქოთერაპევტთან საუბარი დაგეხმარებათ, უკეთ გადაიაზროთ მომხდარი, არ დაადანაშაულოთ საკუთარი თავი და იგრძნოთ, რომ არსებობენ ადამიანები, რომლებსაც თქვენი ესმით და რომლებიც დაგეხმარებიან.
თუკი მუდმივ ზეწოლას გრძნობთ იმ პარტნიორისგან, რომელთანაც გსურთ ურთიერთობის შენარჩუნება, პირველ ყოვლისა, უმჯობესია მასთან ისაუბროთ ამაზე. აუხსენით, როგორ გაგრძნობინებთ თავს თქვენზე ზეწოლის მცდელობები და რატომაა მნიშვნელოვანი, რომ მან პატივი სცეს თქვენს საზღვრებს, თუკი ურთიერთობის გაგრძელება სურს.
ამასთანავე, ფსიქოთერაპევტთან საუბარი შეგიძლიათ:
- რჩევების მისაღებად და შემდეგი ნაბიჯების დასაგეგმად;
- ურთიერთობის უსაფრთხოდ დატოვების გეგმის შესამუშავებლად;
- თანაგრძნობის მისაღებად და იმ ემოციურ დისკომფორტთან გასამკლავებლად, რომელიც გამოცადეთ.
წყარო: Healthline
თუ თქვენზე ძალადობენ ან გაქვთ ინფორმაცია სხვა ადამიანზე ძალადობის შესახებ, შეგიძლიათ მიმართოთ პოლიციას.
-
უფასო, 24-საათიანი ცხელი ხაზი. შეგიძლიათ მოითხოვოთ ანონიმურობა — 112
-
ცხელი ხაზი, რომელიც მოქალაქეებისთვის საკონსულტაციო მომსახურების გაწევის მიზნით ფუნქციონირებს — 116 006
-
საფარი — 599 407 603, 0322 30 76 03
-
ძალადობისგან დაცვის ეროვნული ქსელი/Anti-Violence Network of Georgia – 032 272 67 17
-
წამების მსხვერპლთა ფსიქოსოციალური და სამედიცინო რეაბილიტაციის ცენტრი (GCRT) – 032 222 06 89;