“შეერთებული შტატები ასანქცირებს ბიძინა გრიგორის ძე ივანიშვილს, საქართველოს მმართველი პარტიის, “ქართული ოცნების” დამაარსებელსა და საპატიო თავმჯდომარეს რუსეთის ფედერაციის სასარგებლოდ საქართველოს დემოკრატიისა და ევროატლანტიკური მომავლის ძირის გამოთხრისთვის”, — ეს არის ამონარიდი აშშ-ის სახელმწიფო მდივნის, ენტონი ბლინკენის 27 დეკემბრის განცხადებიდან.
27 დეკემბერს, საქართველოს დროით 20:00 ცნობილი გახდა, რომ ქვეყნის არაფორმალური მმართველი, მილიარდერი და “ქართული ოცნების” საპატიო თავმჯდომარე ამერიკის შეერთებულმა შტატებმა დაასანქცირა.
სანქციები, რომელშიც ივანიშვილი აღმოჩნდა, 14024-ე განკარგულების სახელით არის ცნობილი და რუსეთის მავნე საგარეო საქმიანობებს უკავშირდება. უფრო კონკრეტულად, 14024-ე განკარგულების ქვეშ შეიძლება აღმოჩნდნენ პირები ან ორგანიზაციები, რომლებიც ჩართულნი არიან რუსეთის ფედერაციის მხრიდან დამაზიანებელ საგარეო საქმიანობებში. დამაზიანებელი საქმიანობა შესაძლოა გულისხმობდეს არჩევნებში ჩარევას, დემოკრატიული ინსტიტუტების შელახვის მცდელობას, კიბერთავდასხმებს, კორუფციის ხელშეწყობას თუ სხვა დამაზიანებელ ქმედებას აშშ-სა თუ სხვა ქვეყნებში.
ამერიკის შეერთებული შტატების სახაზინო დეპარტამენტის განკარგულებით, გაიყინება ივანიშვილის მთელი ქონება, რომელიც განთავსებულია შეერთებულ შტატებში, ან არის აშშ-ის პირების მფლობელობაში ან კონტროლში. უფრო კონკრეტულად კი, აშშ-ის სახაზინო დეპარტამენტის უცხოური აქტივების (OFAC) სანქციები გულისხმობს:
- შეზღუდვების გავრცელებას ყველა ტრანზაქციაში, რომელშიც ივანიშვილის მფლობელობაში მყოფი ნებისმიერი კომპანია მიიღებს მონაწილეობას, მიუხედავად იმისა, ის მას პირდაპირ თუ არაპირდაპირ აკონტროლებს, ინდივიდუალურად თუ ჯგუფურად, 50%-ს თუ მეტს;
- შეზღუდვები შეეხება ანგარიშებსა და ოპერაციებს, რომლებშიც უცხოური ფინანსური ინსტიტუტები მონაწილეობენ;
- შეზღუდვები შეეხება ტრანზაქციებს, რომლებიც უკავშირდება რუსეთის ფედერაციის ცენტრალური ბანკთან, რუსეთის ფედერაციის ეროვნული სიმდიდრის ფონდთან და რუსეთის ფედერაციის ფინანსთა სამინისტროსთან;
- შეზღუდვებში ნახსენებია ასევე ტრანზაქციები, რომლებიც უკავშირდება სამართალწარმოებაში არსებული საქმეებს, სინგაპურის სააპელაციო სასამართლოს, “კრედიტ სუისი ბიძინა ივანიშვილის და სხვების წინააღმდეგ” და სხვა;
სანქციების განაცხადს მოჰყვა აშშ-ის სახელმწიფო მდივნის, ენტონი ბლინკენის წერილი. განცხადებაში ბლინკენი იმეორებს, რომ ბიძინა ივანიშვილი სანქცირებულია, რადგან ის არის პასუხისმგებელი ან თანამონაწილე, ან პირდაპირ თუ ირიბად ჩართული, ან მცდელობა გაუწევია ისეთი ქმედებებისა თუ პოლიტიკისთვის, რომელიც ძირს უთხრის დემოკრატიულ პროცესებს ან ინსტიტუტებს როგორც შეერთებულ შტატებში, ისე საზღვარგარეთ, რუსეთის ფედერაციის მთავრობის პირდაპირი თუ ირიბი სარგებლისთვის.
“ივანიშვილისა და “ქართული ოცნების” ქმედებებმა ჩამოშალა დემოკრატიული ინსტიტუტები, ხელი შეუწყო ადამიანის უფლებების შელახვას და აღკვეთა ფუნდამენტური თავისუფლებებით სარგებლობის უფლება საქართველოში. გარდა ამისა, მათ ჩაუხერგეს გზა საქართველოს ევროატლანტიკურ მომავალს — მომავალს, რომელიც ქართველი ხალხის დიდი უმრავლესობის სურვილია და საქართველოს კონსტიტუციის მიერ არის დაკანონებული. შედეგად, საქართველო რჩება მოწყვლადი რუსეთის წინაშე, რომელსაც ამ დრომდე აქვს ოკუპირებული საქართველოს ტერიტორიის ოც პროცენტზე მეტი.
ჩვენ მკაცრად ვგმობთ ბიძინა ივანიშვილის ხელმძღვანელობის ქვეშ „ქართული ოცნების” ქმედებებს, მათ შორის მიმდინარე და ძალადობრივ რეპრესიებს საქართველოს მოქალაქეების, აქციის მონაწილეების, მედიის წარმომადგენლების, უფლებადამცველებისა და ოპოზიციის წევრების წინააღმდეგ. შეერთებული შტატები მტკიცედ აგრძელებს პასუხისმგებლობის დაკისრების ხელშეწყობას მათ წინააღმდეგ, ვინც საქართველოში დემოკრატიასა და ადამიანის უფლებებს ხელყოფს”, — აღნიშნულია განცხადებაში.