საქართველოს ახალგაზრდა იურისტთა ასოციაცია (საია) სამხედრო ჟურნალისტისა და ბლოგერის, უჩა აბაშიძის სახლში პოლიციის შესვლასთან დაკავშირებით აცხადებს, რომ ადგილზე არასამთავრობო ორგანიზაციების სამართლებრივი დახმარების ქსელის ადვოკატია მისული, რათა დაიცვას უჩა აბაშიძის ინტერესები და დაესწროს საგამოძიებო მოქმედებებს, თუმცა, უწყება არ აძლევს მას ბინაში შესვლისა და მისი დაცვის ქვეშ მყოფ პირთან შეხვედრის შესაძლებლობას, რაც სისხლის სამართლის დანაშაულია.
“აღნიშნული ცალსახად წარმოადგენს ამ პირის დაცვის უფლების შეზღუდვას, რაც წარმოადგენს სისხლის სამართლის დანაშაულს”, — აღნიშნულია განცხადებაში.
საია მოუწოდებს საგამოძიებო უწყებას, ადვოკატს დაუყოვნებლივ მისცეს საგამოძიებო მოქმედებებზე დასწრების და მისი დაცვის ქვეშ მყოფთან შეხვედრის შესაძლებლობა, ხოლო საქართველოს სახალხო დამცველსა და ადვოკატთა ასოციაციას შეისწავლოს ადვოკატის საქმიანობისთვის ხელშეშლის ფაქტი და მოახდინოს მასზე შესაბამისი რეაგირება.
სამხედრო ჟურნალისტი და ბლოგერი უჩა აბაშიძე ამ წუთებში დააკავეს. მისი ადვოკატის ინფორმაციით, აბაშიძე სისხლის სამართლის კოდექსის 236-ე მუხლითაა დაკავებული, რაც იარაღის შეძენა-შენახვას გულისხმობს.
“უჩა აბაშიძე დაკავებულია, როგორც პოლიციელებმა თქვეს, სისხლის სამართლის კოდექსის 236-ე მუხლით, რაც გულისხმობს იარაღის და საბრძოლო მასალის მართლსაწინააღმდეგოდ შეძენა-შენახვას. ახლა გადაჰყავთ საგამოძიებო დანაყოფში, მოგვეცა 3 წუთი, რომ გავსაუბრებოდით. ახლა მივდივართ საგამოძიებო დანაყოფში და მას გავესაუბრებით ცალკე“, – აცხადებს აბაშიძის ადვოკატი.