„ქალთა ფონდი საქართველოში“ არასამთავრობო ორგანიზაციაა, რომლის მიზანიცაა ქალებისა და ქალთა ორგანიზაციების, საინიციატივო ჯგუფებისა და აქტივისტების გაძლიერება საქართველოში ქალთა უფლებების განხორციელების, საზოგადოებრივ ცხოვრებაში მათი სრულფასოვანი მონაწილეობისა და თვითრეალიზაციისთვის, ფინანსური და ტექნიკური დახმარების, უნარების განვითარებისა და ფემინისტური ფილანთროპიის ჩამოყალიბების გზით.
წარმოგიდგენთ ქალთა ფონდის 2024 წლის თებერვლის მიმოხილვას:
- თებერვალში „ქალთა ფონდმა“ მოამზადა ვიდეო, რომელშიც აჭარის საექთნო ასოციაცია გვიყვება, როგორ ცდილობს ექთნების სამუშაო გარემოს გაუმჯობესებას და მათთვის საკუთარი შრომითი უფლებების გაცნობას. ვიდეო ეხება სამუშაო ადგილზე ექთნების წინაშე არსებულ ისეთ პრობლემებს, როგორებიცაა კუთვნილი შვებულების ვერგამოყენება, ზეგანაკვეთური მუშაობა, დაბალი ანაზღაურება, დიდი რაოდენობით პაციენტებზე ზრუნვა, დამატებითი მოვალეობების დაკისრება, ხელშეკრულების გარეშე მუშაობა, მძიმე ფიზიკური შრომის მიუხედავად ჯანმრთელობის დაზღვევის არარსებობა და სხვა.
- ორგანიზაციამ თებერვალში გამოაქვეყნა „ფემინსტრიმის“ 3 ახალი პოდკასტი ანტიგენდერულ კამპანიებზე, ოპერი ქალების შრომასა და ექსპლუატაციის არც ისე ხილულ ნაწილზე და შრომითი მიგრაციის და ქალთა ორმაგი შრომის პრობლემაზე ჯავახეთის რეგიონში. „ფემინსტრიმი“ ფემინისტური პოდკასტია, რომელიც ქვეყნდება Facebook და YouTube გვერდებზე, ასევე Soundcloud-ზე, Spotify-სა და სხვა პლატფორმებზე. გარდა ამისა, პოდკასტების ტექსტური ვერსია თავსდება როგორც ქალთა ფონდის, ისე საზოგადოებრივ-პოლიტიკური ონლაინგამოცემა პუბლიკისა და მედია აპრილის ვებგვერდებზე.