სექსუალური ჯანმრთელობა ადამიანის ჯანმრთელობის განუყოფელი ნაწილია და ის გავლენას ახდენს როგორც ფიზიკურ, ისე ემოციურ და სოციალურ კეთილდღეობაზე. სექსუალური ჯანმრთელობის შენარჩუნების ერთ-ერთ საკვანძო ასპექტია უსაფრთხო სექსი. ამ სტატიაში ვისაუბრებთ, რა რისკები ახლავს დაუცველ სექსს და როგორ შეგვიძლია სექსის დროს თავის დაცვა.

რა რისკები ახლავს დაუცველ სექსს?

დაუცველ სექსს რიგი პოტენციური უარყოფითი შედეგები ახლავს, დაწყებული მყისიერით და დამთავრებული გრძელვადიანი ჯანმრთელობის რისკებით. ამ რისკების გააზრება მნიშვნელოვანია სექსუალურ ქცევაზე ინფორმირებული გადაწყვეტილებების მისაღებად.

არასასურველი ორსულობა

დაუცველ სექსთან დაკავშირებული ერთ-ერთი ყველაზე მნიშვნელოვანი რისკია პოტენციური არასასურველი ორსულობა. როდესაც ადამიანები სქესობრივი აქტით კონტრაცეფციის გარეშე კავდებიან, ორსულობის დადგომის ალბათობა იზრდება.

არასასურველ ორსულობას შეიძლება მნიშვნელოვანი უარყოფითი გავლენა ჰქონდეს ადამიანის ცხოვრებაზე, იქნება ეს მისი ფიზიკური ჯანმრთელობა, ემოციური კეთილდღეობა თუ სოციოეკონომიკური პირობები. მას მოჰყვება რთული გადაწყვეტილებები აბორტთან, გაშვილებასა თუ ბავშვის აღზრდასთან დაკავშირებით, რომელთაგან თითოეულსაც თავისი შედეგები და სირთულეები აქვს. გარდა ამისა, რეპროდუქციულ ჯანდაცვასა და რესურსებთან წვდომის ნაკლებობამ შეიძლება გაზარდოს არასასურველი ორსულობის გავლენა ადამიანის ცხოვრებაზე და შეზღუდოს მისი შესაძლებლობები დახმარებისა და მხარდაჭერის მიღებასთან დაკავშირებით.

► სექსის დროს თავის დაცვით ადამიანს შეუძლია მნიშვნელოვნად შეამციროს არასასურველი ორსულობის რისკი და მიიღოს ინფორმირებული გადაწყვეტილებები საკუთარ რეპროდუქციულ ჯანმრთელობაზე.

სქესობრივი გზით გადამდები ინფექციები (სგგი)

დაუცველი სექსუალური აქტივობები ასევე ზრდის სქესობრივი გზით გადამდები ინფექციების (სგგი) გავრცელების რისკს, რომლებსაც შეიძლება სერიოზული უარყოფითი შედეგები მოჰყვეს ადამიანის ჯანმრთელობისა და კეთილდღეობისთვის. სგგი-ები ბევრ სხვადასხვა ინფექციას მოიცავს, მათ შორისაა ქლამიდია, გონორეა, სიფილისი, გენიტალური ჰერპესი, ტრიქომონიაზი, B და C ჰეპატიტი, ადამიანის პაპილომავირუსი (HPV) და აივ/შიდსი.

ეს ინფექციები შეიძლება გავრცელდეს როგორც ვაგინალური, ისე ანალური ან ორალური სექსის დროს, ასევე, კანით კანზე ინტიმური კონტაქტისას. ბევრ სგგი-ს თავიდან სიმპტომები მსუბუქად ან საერთოდ არ აქვს, რის გამოც რეგულარული ტესტირების გარეშე მათი შემჩნევა რთულია. უყურადღებოდ დატოვების შემთხვევაში, სქესობრივი გზით გადამდებ ინფექციებს შეიძლება არაერთი გართულება მოჰყვეს, მათ შორის, მენჯის ანთებითი დაავადება, ქრონიკული ტკივილი, აივ-ინფექციის გადაცემის გაზრდილი რისკი და ა.შ.

► პრეზერვატივის მუდმივი გამოყენება ამცირებს სგგი-ს გადაცემის რისკს და იცავს ადამიანს მისი უარყოფითი შედეგებისგან. გარდა ამისა, რეგულარული ტესტირება და ადრეულ ეტაპზე ინფექციის შემჩნევა აუცილებელია მისი დროული მკურნალობისთვის და გავრცელების თავიდან ასაცილებლად.

აივ/შიდსი

ადამიანის იმუნოდეფიციტის ვირუსი (აივ) და შეძენილი იმუნური დეფიციტის სინდრომი (შიდსი) დაუცველი სექსის ერთ-ერთი ყველაზე სერიოზული შედეგებია. აივ არის ვირუსული ინფექცია, რომელიც უტევს ადამიანის იმუნურ სისტემას, რასაც მოსდევს სხეულის თავდაცვითი მექანიზმების პროგრესული შესუსტება ინფექციებისა და დაავადებების მიმართ. დროული ჩარევისა და მკურნალობის გარეშე აივ-ინფექცია შეიძლება პროგრესირდეს და გახდეს შიდსი — სტადია, რომელსაც ახასიათებს უკიდურესი იმუნური დეფიციტი და გაზრდილი მოწყვლადობა ინფექციებისა მიმართ.

დაუცველ სქესობრივ აქტს, განსაკუთრებით აივ-დადებით პარტნიორთან ან ადამიანთან, რომლის აივ-სტატუსიც უცნობია, აივ-ის გადაცემის მაღალი რისკი აქვს. სექსის დროს პრეზერვატივის გამოყენება აუცილებელია აივ-ისა და სხვა სგგ ინფექციების თავიდან ასაცილებლად. გარდა ამისა, აივ-ის პრევენციასა და მართვაში მნიშვნელოვან როლს ასრულებს აივ-ზე რეგულარული ტესტირება და პრეპის (პრეექსპოზიციური პროფილაქტიკის, იგივე PrEP — სამკურნალო მედიკამენტი აივ/შიდსის პრევენციისთვის) მიღება.

► უფასო აივ-ტესტირებისთვის შეგიძლიათ მიხვიდეთ „თანასწორობის მოძრაობის“ ოფისში მისამართზე: უშანგი ჩხეიძის ქუჩა #19. ვიზიტამდე შეგიძლიათ ორგანიზაციას დაუკავშირდეთ ტელეფონით (0322 47 97 48) ან Facebook-ზე. ადგილზე შეგიძლიათ ასევე მიიღოთ უფასო პრეზერვატივები და ლუბრიკანტები. გარდა ამისა, აივ-ის თვითტესტის შეკვეთა და სასურველ მისამართზე მიღება შეგიძლიათ პლატფორმიდან Selftest.ge

► „თანასწორობის მოძრაობაში“ ასევე შეგიძლიათ პრეპის უფასო პროგრამაში ჩაერთოთ. ამისთვის უნდა მიხვიდეთ ორგანიზაციის ოფისში, სადაც შეავსებთ რისკის შეფასების კითხვარს და გაიკეთებთ პრეპ პროგრამისთვის განკუთვნილ ანალიზებს. ამ პროგრამის ფარგლებში ექიმთან რეგულარული კონსულტაციები, ანალიზები და პრეპი სრულიად უფასოა. მისამართი: უშანგი ჩხეიძის ქუჩა #19 მეორე სართული, თბილისი. ელ. ფოსტა: [email protected]

რატომ და როგორ უნდა გამოვიყენოთ პრეზერვატივი?

პრეზერვატივები სექსის დროს თავის დაცვის ერთ-ერთი ყველაზე ეფექტური და ხელმისაწვდომი ფორმაა. ისინი ქმნის ფიზიკურ ბარიერს, რომელიც სქესობრივი აქტის დროს სხეულის სითხეების მიმოცვლას უშლის ხელს, რითაც ამცირებს სქესობრივი გზით გადამდები ინფექციების გავრცელებისა და არასასურველი ორსულობის რისკს. პრეზერვატივის მაქსიმალური ეფექტისთვის გაითვალისწინეთ შემდეგი საფეხურები:

• შეინახეთ უსაფრთხოდ — სწორი შენახვა აუცილებელია პრეზერვატივის მთლიანობის შენარჩუნებისა და მისი მაქსიმალური ეფექტურობისთვის. პრეზერვატივი უნდა შეინახოთ გრილ, მშრალ ადგილას, პირდაპირი მზის სინათლისა და სიცხისგან შორს. მოერიდეთ მის დიდხანს შენახვას საფულეში, ჯიბესა თუ მანქანის წინა ნივთების შესანახ უჯრაში, რადგან სიცხემ და ხახუნმა შეიძლება გაცვითოს ლატექსი ან პოლიურეთანი და გაზარდოს გახევის რისკი. რეკომენდებულია, რომ დაბინძურებისა და დაზიანების თავიდან ასაცილებლად პრეზერვატივი მის ორიგინალურ შეფუთვაში შეინახოთ. თუკი პრეზერვატივს გარედანვე ეტყობა ზიანის ნიშნები, უმჯობესია, ის არ გამოიყენოთ;
• შეამოწმეთ ვარგისიანობის ვადა — პრეზერვატივის გამოყენებამდე აუცილებლად შეამოწმეთ მისი ვარგისიანობის ვადა შეფუთვაზე. ვადაგასული პრეზერვატივი კარგავს თავის მთლიანობასა და ეფექტურობას, რაც ზრდის მისი გახევის შანსს;
• გამოიყენეთ სწორად — სქესობრივი აქტის დროს ეფექტური თავდაცვისთვის აუცილებელია პრეზერვატივის სწორად გამოყენება. ამისთვის მიჰყევით შემდეგ ნაბიჯებს:
  • ფრთხილად გახსენით პრეზერვატივის შეფუთვა მისი კიდის მოხევით. მოერიდეთ მაკრატლის, კბილების ან სხვა ბასრი საგნების გამოყენებას, რომლებმაც შეიძლება დააზიანოს პრეზერვატივი;
  • შეამოწმეთ, რამე დაზიანება ხომ არ აქვს პრეზერვატივს, მაგალითად, ნახვრეტი, ნაკაწრი ან ქარხნული წუნი. თუკი პრეზერვატივი დაზიანებული ან ვადაგასულია, არ გამოიყენოთ ის;
  • იპოვეთ პრეზერვატივის სწორი მხარე. ამისთვის დაიჭირეთ პრეზერვატივი ჰორიზონტალურად ისე, რომ ხვეული მოქცეული იყოს გარედან და არა — შიგნით. იმის შესამოწმებლად, სწორი მხრიდან გიჭირავთ თუ არა პრეზერვატივი, შეგიძლიათ, სცადოთ მისი ოდნავ ჩამოკეცა — თუ ის მარტივად ჩამოდის, მაშინ სწორი მხრიდანაა. თუკი შემთხვევით პრეზერვატივს არასწორი მხრიდან გაიკეთებთ, გადააგდეთ ის და გამოიყენეთ ახალი;
  • მოირგეთ პრეზერვატივი ერეგირებული პენისის თავზე. თქვენი თითების ბალიშებს შორის მოიქციეთ პრეზერვატივის გამობერილი წვერი და მოათავსეთ ის პენისზე. ეს იმისთვისაა საჭირო, რომ დარჩეს თავისუფალი სივრცე ეაკულაციის (პენისიდან სპერმის გამონთხევის) დროს გამოთავისუფლებული სპერმისთვის (თუკი პრეზერვატივს სექს-სათამაშოზე აცმევთ, შეგიძლიათ ეს საფეხური გამოტოვოთ);
  • ჩამოაცვით პრეზერვატივი ერეგირებულ პენისს. დარწმუნდით, რომ ის ფარავს მის მთელს სიგრძეს. ეს ამცირებს ისეთი სგგი-ების გავრცელების რისკს, რომლებიც კანით კანზე შეხებით გადადის (მაგალითად, სიფილისი). თუკი პრეზერვატივი ბოლომდე არ ფარავს პენისის ტანს ან ის ზედმეტად გიჭერთ, მაშინ, სავარაუდოდ, ის ზედმეტად პატარაა, რაც მის ეფექტურობას ამცირებს — ამ შემთხვევაში გამოიყენეთ უფრო დიდი ზომის პრეზერვატივი;
  • შეამოწმეთ, ხომ არ ჩაჰყვა ჰაერი პრეზერვატივს. თუკი პრეზერვატივის თავი გაბერილ ბუშტს ჰგავს, მასში ჰაერია. ჰაერის დატოვებამ შეიძლება სექსის დროს პრეზერვატივის გახევა გამოიწვიოს. ნელ-ნელა და ნაზად გაასწორეთ პრეზერვატივი წვეროდან ბოლომდე ხელის ჩამოსმით, რათა მისგან ჰაერი გამოთავისუფლდეს. ზოგჯერ პრეზერვატივის გაკეთებამდე მის წვეროზე მცირეოდენი ლუბრიკანტის (ინტიმური საცხის) წასმა დაგეხმარებათ ამის თავიდან არიდებაში;
  • პენეტრაციის შემდეგ გამოღებისას დაიჭირეთ პრეზერვატივი. ეაკულაციის შემდეგ ფრთხილად მოიხსენით პრეზერვატივი, სანამ პენისი ერექციას დაკარგავს. როდესაც პენისი გამოდის ვაგინიდან, ანუსიდან ან პირიდან, დაიჭირეთ პრეზერვატივის ძირი, რათა მისგან სპერმა არ გადმოიღვაროს. თუკი აქტის დროს პრეზერვატივი მოგძვრებათ და პარტნიორის შიგნით დარჩება, მისი გამოღებისას დაახვიეთ ღია პრეზერვატივის ბოლო სპერმის გამოჟონვის თავიდან ასაცილებლად;
  • მოხსნის შემდეგ გაკვანძეთ პრეზერვატივის ღია ბოლო და გადააგდეთ ის ნაგავში. არ ჩარეცხოთ პრეზერვატივი უნიტაზში, რადგან ამან შეიძლება წყალგაყვანილობის სისტემის გაჭედვა გამოიწვიოს.

დამატებითი რჩევები

ზემოთ ჩამოთვლილი საფეხურების გარდა, ასევე გაითვალისწინეთ შემდეგი რჩევები:

• • თითოეული სქესობრივი აქტისთვის გამოიყენეთ ახალი პრეზერვატივი, მაშინაც კი თუ მხოლოდ სექსის სხვა ტიპზე გადადიხართ (მაგ., ვაგინალური, ანალური, ორალური);
  • ლატექსის ან პოლიურეთანის პრეზერვატივებთან გამოიყენეთ მხოლოდ წყალზე ან სილიკონზე დამზადებული ლუბრიკანტები. ზეთის ლუბრიკანტებმა შეიძლება დააზიანოს ლატექსის პრეზერვატივი და გაზარდოს მისი გახევის შანსი;
  • არ გამოიყენოთ ორი პრეზერვატივი ერთად, რადგან ამან შეიძლება გაზარდოს ხახუნი და პრეზერვატივის გახევის შანსი;
  • ღიად ესაუბრეთ სექსუალურ პარტნიორებს პრეზერვატივის გამოყენებაზე და შეთანხმდეთ უსაფრთხო სექსის ისეთ პრაქტიკებზე, რომლებზეც ყველა მხარე თანახმაა;

► არავითარ შემთხვევაში არ მოიხსნათ პრეზერვატივი აქტის დროს თქვენი პარტნიორის თანხმობის გარეშე.

რა ტიპის პრეზერვატივები არსებობს?

პრეზერვატივები ბევრი სხვადასხვა ზომის, მასალისა და სტილის არსებობს, სხვადასხვა პრეფერენციისა და საჭიროების შესაბამისად. მასალის მიხედვით, არსებობს პრეზერვატივების ორი ძირითადი ტიპი:

• ლატექსის პრეზერვატივები — ლატექსის პრეზერვატივები პრეზერვატივის ყველაზე გავრცელებული ტიპია და ის ძალიან ეფექტური როგორც სგგი-ების, ისე არასასურველი ორსულობის პრევენციისთვის. ლატექსისგან დამზადებული პრეზერვატივი წელვადი და გამძლეა და ის სანდო ბარიერია სქესობრივი აქტის დროს. ლატექსის პრეზერვატივთან ერთად შეგიძლიათ გამოიყენოთ წყალზე ან სილიკონზე დამზადებული ლუბრიკანტები როგორც ვაგინალური, ისე ანალური სექსის დროს. თუმცა, ლატექსზე ალერგიის შემთხვევაში, გამოიყენეთ სხვა მასალისგან დამზადებული პრეზერვატივი, რათა თავიდან აიცილოთ ალერგიული რეაქცია;

• არალატექსის პრეზერვატივები — ლატექსზე ალერგიის ან ლატექსისადმი მგრძნობელობის შემთხვევაში, არსებობს ამდენადვე უსაფრთხო და სასიამოვნო ალტერნატივები. ეს პრეზერვატივები, როგორც წესი, დამზადებულია პოლიურეთანის ან პოლიიზოპრენისგან, რომლებიც ნაკლებადაა ალერგიული. პოლიურეთანის პრეზერვატივები უფრო თხელია და ლატექსზე მეტად ინახავს სითბოს, რაც აქტის დროს ბუნებრივ შეგრძნებას ქმნის. მეორე მხრივ, პოლიიზოპრენის პრეზერვატივები შეგრძნებითად ძალიან ჰგავს ლატექსისას. ორივე მათგანი შეგიძლიათ გამოიყენოთ წყალზე ან სილიკონზე დამზადებულ ლუბრიკანტებთან ერთად.

მითები პრეზერვატივებზე

მიუხედავად იმისა, რომ პრეზერვატივი ერთ-ერთი ყველაზე ეფექტური მეთოდია სგგი-ებისა და არასასურველი ორსულობის წინააღმდეგ, მასზე არაერთი მითი და მცდარი წარმოდგენა არსებობს. პრეზერვატივზე არსებულ მითებს შორისაა:

მითი N1 — პრეზერვატივი ამცირებს სიამოვნებას

პრეზერვატივებთან დაკავშირებით ერთ-ერთი ყველაზე გავრცელებული მითია, რომ ისინი ამცირებს სექსუალურ სიამოვნებას ორივე პარტნიორისთვის. ზოგ ადამიანს შეიძლება ეგონოს, რომ პრეზერვატივი თრგუნავს მგრძნობელობას და ხელს უშლის ინტიმურობას, რის გამოც აქტი ნაკლებად სასიამოვნოა. სიმართლე: მართალია, პრეზერვატივი ქმნის ფიზიკურ ბარიერს პარტნიორებს შორის, მაგრამ ის აუცილებლად არ ამცირებს სექსუალურ სიამოვნებას. მეტიც, ბევრისთვის პრეზერვატივი აძლიერებს სექსუალურ გამოცდილებას, რადგან ის მათ მოდუნებისა და მომენტით ტკბობის საშუალებას აძლევს. გარდა ამისა, არსებობს პრეზერვატივების ტიპები, რომლებიც აძლიერებს მგრძნობელობასა და სიამოვნებას აქტის დროს, მაგალითად, განსაკუთრებით თხელი, დახორკლილი ან სხვა ტიპის ზედაპირით და ლუბრიკანტიანი პრეზერვატივები.

მითი N2 — პრეზერვატივი არ გვიცავს სქესობრივი გზით გადამდები ინფექციებისგან

ბევრს ჰგონია, რომ პრეზერვატივები მხოლოდ ორსულობის თავიდან ასაცილებლად გამოიყენება და ისინი არ არის ეფექტური ინფექციების წინააღმდეგ. სიმართლე: სინამდვილეში, სწორად და მუდმივად გამოყენების შემთხვევაში, პრეზერვატივი დაახლოებით 98%-ით გიცავთ სქესობრივი გზით გადამდები ინფექციებისგან, რადგან ისინი ქმნის ფიზიკურ ბარიერს და ხელს უშლის სასქესო ორგანოებისა და სხეულის სითხეების პირდაპირ კონტაქტს, რაც სგგი-ების გავრცელების მთავარი გზაა.

მითი N3 — პრეზერვატივი მხოლოდ პენეტრაციული სექსის დროსაა საჭირო

ზოგს შეცდომით ჰგონია, რომ პრეზერვატივი მხოლოდ ვაგინალური ან ანალური სექსის დროსაა საჭირო და ისინი არ გამოიყენება სხვა სექსუალური აქტივობებისთვის, მაგალითად, ორალური სექსის დროს ან ორმხრივი მასტურბაციისას. სიმართლე: პრეზერვატივი უნდა გამოიყენოთ ნებისმიერი ისეთი სექსუალური აქტივობისას, რომლის დროსაც ხდება სხეულის სითხეების მიმოცვლა ან ინტიმური კანით კანზე კონტაქტი. ეს მოიცავს ორალურ სექსს პენისზე ან ვაგინაზე (კუნილინგუსის შემთხვევაში შეგიძლიათ გამოიყენოთ სტომატოლოგიური კაშხალი), ასევე ანუსის ან ვაგინის სტიმულაციას თითებით ან სექს-სათამაშოებით.

მითი N4 — ყველა პრეზერვატივი ერთი ზომისაა

არსებობს მცდარი წარმოდგენა, თითქოს პრეზერვატივებს მხოლოდ ერთი სტანდარტული ზომა აქვს, რომელიც ყველა ინდივიდს ერგება, განურჩევლად პენისის ზომისა და ფორმისა. სიმართლე: სინამდვილეში, პრეზერვატივები სხვადასხვა ზომის, ფორმისა და სტილის არსებობს, რათა მოერგოს განსხვავებულ პრეფერენციებსა და ანატომიებს. მნიშვნელოვანია, რომ შეარჩიოთ ისეთი პრეზერვატივი, რომელიც კომფორტულად გერგებათ, რათა ის მაქსიმალურად ეფექტური იყოს და დაცული იყოთ მისი გახევისგან ან შემთხვევით არ მოგძვრეთ აქტის დროს.

მითი N5 — პრეზერვატივები რთული გამოსაყენებელია და აფერხებს სქესობრივ აქტს

ზოგს ჰგონია, რომ პრეზერვატივები შემაწუხებელია, რთული გამოსაყენებელია და ისინი აფერხებს სქესობრივ აქტს ან წარმოშობს უხერხულობას პარტნიორებს შორის. სიმართლე: პრეზერვატივების გამოყენებას გარკვეული ცოდნა სჭირდება, მაგრამ პრაქტიკასთან ერთად მათი გამოყენება ძალიან მარტივია. გამოყავით დრო საიმისოდ, რომ გაეცნოთ, როგორ ხდება პრეზერვატივის სწორად გამოყენება და ეს პროცესი პრელუდიის ნაწილად აქციეთ, რათა პრეზერვატივის გაკეთება აქტში შეუმჩნევლად ინტეგრირდეს, ნაცვლად იმისა, რომ ის პაუზის მიზეზი გახდეს. პრეზერვატივის გამოყენებასა და ერთმანეთის სექსუალურ ჯანმრთელობაზე ზრუნვაზე პარტნიორებთან ღია კომუნიკაცია დაგეხმარებათ ნებისმიერი პრობლემის მოგვარებასა და უხერხულობის მოხსნაში.

კიდევ რა უნდა გავითვალისწინოთ უსაფრთხო სექსისთვის

მართალია, პრეზერვატივები საკვანძო როლს ასრულებს სგგი-ებისა და არასასურველი ორსულობების პრევენციაში, მაგრამ არსებობს უსაფრთხო სექსის დამატებითი პრაქტიკებიც, რომლებიც შეგიძლიათ დანერგოთ თქვენი სექსუალური ჯანმრთელობის დაცვის რუტინაში:

• რეგულარული ტესტირება სგგი-ებზე: რეგულარული ტესტირება სექსუალურ ჯანმრთელობაზე ზრუნვის ერთ-ერთი ყველაზე მნიშვნელოვანი პრაქტიკაა სექსუალურად აქტიური ადამიანებისთვის. სგგი-ებზე ტესტირება ინფექციების ადრეულ ეტაპზე აღმოჩენას, მათ დროულ მკურნალობასა და მათი გავრცელების რიკის შემცირებას ემსახურება. თუ გაინტერესებთ, რომელი ინფექცია რა გზით გადაიცემა და რომელზე რა სიხშირითაა რეკომენდებული ტესტირება, გაეცანით ჩვენს სტატიას სქესობრივი გზით გადამდებ ინფექციებზე;
• პირადი ჰიგიენის დაცვა: პირადი ჰიგიენის კარგად დაცვა სექსუალური ჯანმრთელობის შენარჩუნების მნიშვნელოვანი ნაწილია. სასქესო ორგანოების სისუფთავის უზრუნველყოფა, განსაკუთრებით სქესობრივ აქტამდე და აქტის შემდეგ, ამცირებს ინფექციების გავრცელების რისკს;
• კომუნიკაცია სექსუალურ პარტნიორებთან: გულწრფელი და ეფექტური კომუნიკაცია სექსუალურ პარტნიორებთან აუცილებელია უსაფრთხო და სასიამოვნო სექსუალური გამოცდილებების მისაღებად. ღიად ესაუბრეთ თქვენს პარტნიორ(ებ)ს სექსუალური ჯანმრთელობის თემებზე, მათ შორის სგგი-ების ქონის ისტორიაზე, ტესტირებაზე, კონტრაცეფციაზე და უსაფრთხო სექსუალური პრაქტიკების პრეფერენციებზე. ეს დაგეხმარებათ, ერთმანეთს გაუზიაროთ რელევანტური ინფორმაცია თქვენი ჯანმრთელობის სტატუსზე, შიშებსა და საზღვრებზე, რაც საშუალებას მოგცემთ, მიიღოთ ერთობლივი ინფორმირებული გადაწყვეტილებები. გულწრფელი კომუნიკაცია ასევე დაგეხმარებათ, უკეთ გაუგოთ თქვენს პარტნიორს და გაზარდოთ ნდობა, ინტიმურობა და პატივისცემა თქვენს ურთიერთობაში.