გამოცემა POLITICO-ს ინფორმაციით, მოიპოვეს აშშ-ის კონგრესში წარსადგენი კანონპროექტი, რომელიც სანქციებს უწესებს რუსული კანონის მიღებაზე პასუხისმგებელ ქართული ოცნების წევრებს. სანქციები ითვალისწინებს აქტივების გაყინვას და სავიზო შეზღუდვას.
კანონპროექტი მოითხოვს სანქციების დაწესებას ხელისუფლების წარმომადგენლებისა და იმ პირებისთვის, რომლებსაც „აკისრიათ პასუხისმგებლობა დემოკრატიის, ადამიანის უფლებებისა და უსაფრთხოების უგულებელყოფასა და დაზიანებაში საქართველოში“. ის მოიცავს სავიზო შეზღუდვებს პოლიტიკოსებისა და მათი ოჯახებისთვის, რომლებიც პასუხისმგებელნი არიან „რუსული სტილის უცხოური აგენტების კანონპროექტის“ მიღებაზე.
გარდა ამისა, შეზღუდვები ასევე გავრცელდება სამართალდამცავი ორგანოებისა და უსაფრთხოების სამსახურის მიმართ, რომლებმაც ჩაახშეს პროტესტი რუსული კანონის წინააღმდეგ ცრემლსადენი გაზისა და წყლის ჭავლის გამოყენებით, ასევე აქტივისტებისა და ოპოზიციონერი პოლიტიკოსების ცემითა და დაკავებით.
POLITICO-ს მიერ ნანახი კანონპროექტი აფრთხილებს მმართველ პარტიას და აღნიშნავს, რომ მან „სამწუხაროდ, რუსეთის ფედერაციასთან მორიგების პოლიტიკა არჩია“ და „ღიად დაუპირისპირდა აშშ-სა და სხვა დასავლურ დემოკრატიულ ორგანიზაციებს, ასევე ადგილობრივ და საერთაშორისო სამოქალაქო საზოგადოებას, პარალელურად კი გააძლიერა კავშირი როგორც რუსეთთან, ისე ჩინეთთან“.
გამოცემის ცნობით, კანონპროექტს ორშაბათს წარადგენს სამხრეთ კაროლინას შტატის წარმომადგენელი ჯო ვილსონი.
შეგახსენებთ, რომ რამდენიმე დღის წინ საქართველოში ვიზიტის დროს აშშ-ის სახელმწიფო მდივნის თანაშემწემ ევროპისა და ევრაზიის საკითხებში ჯიმ ო’ბრაიენმა შესაძლო სანქციების შესახებ განაცხადა:
„თუ ამ კანონს ევროკავშირის სტანდარტებთან შეუსაბამობაში მიიღებენ და დავინახავთ დემოკრატიის უგულებელყოფასა და ძალადობას მშვიდობიანი დემოსნტრანტების წინააღმდეგ, ჩვენ ვიხილავთ შეზღუდვებს აშშ-ის მხრიდან, იქნება ეს ფინანსური თუ გადაადგილების შეზღუდვა იმ ადამიანებისა და მათი ოჯახის წევრების მიმართ, ვინც პასუხისმგებელი იქნება ამ ქმედებებზე“.