პირველი სექსი ძალიან პირადი გამოცდილებაა და სრულიად ნორმალურია მასთან დაკავშირებით შერეული გრძნობები — აღტაცება, ცნობისმოყვარეობა, მღელვარება ან, თუნდაც, მცირე შიში. ეს ბევრი ადამიანისთვის მნიშვნელოვანი მომენტია, თუმცა თუ ის იდეალური არ აღმოჩნდა, ამით ფასი არ ეკარგება. მითია, რომ პირველი სექსი რაღაც საოცარი და კინემატოგრაფიული მოვლენა უნდა იყოს.
სექსი ისეთი რამაა, რასაც ადამიანები გამოცდილების კვალდაკვალ სწავლობენ — ის არ არის უნარი, რომელიც თავიდანვე სრულყოფილად გაგვაჩნია. სრულიად ნორმალურია, თუ თავს უხერხულად გრძნობთ; თუ არ იცით, ზუსტად რა უნდა გააკეთოთ; თუ პატარა დეტალებზეც ზედმეტად ბევრს ფიქრობთ. იმისთვის, რომ ვიღაცასთან ღირებული ინტიმური კავშირი დაამყაროთ, არც სხვისი ფიქრების წაკითხვა გჭირდებათ და არც სექსის ტექნიკებში ოსტატობა. ყველაზე მთავარია, თავს გრძნობდეთ დაცულად, პატივცემულად და იცოდეთ, რომ თქვენი არჩევანი თქვენი კონტროლის ქვეშაა.
პოზიტიური სექსუალური გამოცდილებისთვის გადამწყვეტი როლი აქვს ორმხრივ თანხმობასა და ღია კომუნიკაციას. ეს მხოლოდ „კის“ თქმას არ ნიშნავს — ეს ნიშნავს, რომ ნამდვილად მზად ხართ და გსურთ თქვენი თავის ეს ნაწილი ვინმესთან გააზიაროთ. ეს ასევე ნიშნავს, რომ თქვენ და თქვენი პარტნიორი ერთ აზრზე ხართ, ყოველგვარი წნეხის, დანაშაულის გრძნობისა თუ უთქმელი მოლოდინების გარეშე.
და გახსოვდეთ — არ იჩქაროთ. პირველი სექსი მაშინ უნდა მოხდეს, როცა თავად იქნებით მზად, და არა მაშინ, როცა გგონიათ, რომ „უკვე დროა“. ენდეთ ინტუიციას, მოუსმინეთ საკუთარ ემოციებს და გახსოვდეთ, რომ ამ გამოცდილების თითოეულ საფეხურზე თქვენ იმსახურებთ, თავს გრძნობდეთ დაცულად, დაფასებულად და პატივცემულად.
საკუთარი სურვილებისა და საზღვრების გააზრება
მანამ, სანამ ვინმესთან ინტიმურ გამოცდილებას გაიზიარებდეთ, მნიშვნელოვანია, ჯერ თავად გაიგოთ — რა გინდათ, რაში ხართ კომფორტულად და რა გაძლევთ დაცულობისა და დაფასების შეგრძნებას. ეს ეხება არა მხოლოდ ფიზიკურ კომფორტს, არამედ ასევე ემოციურ საჭიროებებსა და საზღვრებს.
გამონახეთ დრო და დაფიქრდით:
- რატომ გინდათ სექსი?
- ნამდვილად მზად ხართ ამისთვის?
- ზეწოლას ხომ არ გრძნობთ პარტნიორისგან, მეგობრებისგან ან კულტურული მოლოდინებისგან?
თქვენი პირველი სექსი თქვენი გადაწყვეტილება უნდა იყოს და არა — სხვის ცხოვრებისეულ გრაფიკზე მორგება. შეგიძლიათ, მოიცადოთ, მიჰყვეთ საკუთარ ტემპს ან აზრი შეცვალოთ ნებისმიერ მომენტში — ეს სრულიად მისაღებია.
საკუთარი საზღვრების შესახებ კომუნიკაცია შეიძლება თავიდან უხერხული გეჩვენოთ, მაგრამ ეს ერთ-ერთი ყველაზე გამაძლიერებელი ნაბიჯია, რომელიც შეგიძლიათ საკუთარ თავთან და პარტნიორთან ურთიერთობაში გადადგათ. როცა კონკრეტულად ამბობთ, რისი მზადყოფნაც გაქვთ და რისი — არა, ურთიერთობისთვის იქმნება ნდობასა და ურთიერთპატივისცემაზე დაფუძნებული საძირკველი. ეს შეიძლება მოიცავდეს იმაზე საუბარს, თუ როგორი შეხება გსიამოვნებთ, რომელი სექსუალური აქტივობებით გინდათ დაკავება ან როდის გინდათ, რომ შეჩერდეთ, თუკი რაღაც არაკომფორტული ან ზედმეტად ინტენსიური აღმოჩნდა.
ასევე, მნიშვნელოვანია, მოუსმინოთ საკუთარ სხეულს და ინტუიციას. თუ რაღაც გაწუხებთ, თავს არაკომფორტულად ან დაძაბულად გრძნობთ, სრულიად ნორმალურია, შეჩერდეთ, ან თქვათ „არა“. თქვენი კომფორტი და კეთილდღეობა ყოველთვის პირველ ადგილზე უნდა იყოს — მზრუნველი პარტნიორი კი ამას პატივს სცემს და გაითვალისწინებს.
► გახსოვდეთ: თქვენი სურვილები და საზღვრები მნიშვნელოვანია. სრული უფლება გაქვთ, გამოხატოთ ისინი შიშის ან უარყოფის მოლოდინის გარეშე.
სწორი პარტნიორისა და მომენტის შერჩევა
ადამიანი, რომელთანაც პირველ სექსუალურ გამოცდილებას გაიზიარებთ, დიდ გავლენას მოახდენს იმაზე, როგორ იგრძნობთ თავს მის შემდეგ. ეს არ ნიშნავს, რომ უნდა ელოდოთ „სრულყოფილ“ პარტნიორს ან რომ თქვენი პირველი სექსი აუცილებლად ზღაპრულ გარემოში უნდა მოხდეს — არა. მაგრამ ეს ნიშნავს, რომ უნდა აირჩიოთ ადამიანი, რომელიც პატივს გცემთ, გისმენთ და რეალურად ზრუნავს თქვენს კომფორტსა და კეთილდღეობაზე.
მხარდამჭერი პარტნიორი ყოველთვის პატივს სცემს თქვენს საზღვრებს, მოისმენს თქვენს საჭიროებებს და არასდროს მოგაქცევთ ზეწოლის ქვეშ ან არ ეცდება დაჩქარებას. კარგი პარტნიორისთვის მნიშვნელოვანი იქნება, რომ თავი კომფორტულად იგრძნოთ, და ის მზად იქნება ღია და გულწრფელი საუბრისთვის იმის შესახებ, თუ რა გსურთ და რა გჭირდებათ. თუკი ვინმე:
- უგულებელყოფს თქვენს განცდებს;
- ცდილობს, დანაშაულის შეგრძნება გაგიჩინოთ იმის გამო, რომ ჯერ მზად არ ხართ;
- ყურადღებას არ აქცევს თქვენს საზღვრებს;
ეს სერიოზული „წითელი დროშებია“ — გამაფრთხილებელი ნიშანი იმისა, რომ რაღაც რიგზე ვერ არის და თქვენ არ გიქმნიან უსაფრთხო და ჯანსაღ გარემოს.
სრულიად ნორმალურია, თუ გსურთ, დაელოდოთ თქვენთვის სწორ დროს. ზრდასრული ადამიანისთვის არ არსებობს რაიმე ერთი „სწორი“ დრო, რომელიც განსაზღვრავს, როდის უნდა გქონდეთ სექსი — ეს გადაწვეტილება მთლიანად თქვენ გეკუთვნით. თუკი გრძნობთ რაიმე სახის დისკომფორტს, არ შეგეშინდეთ თქვათ “არა”.
► გახსოვდეთ: თქვენ იმსახურებთ, რომ ეს გამოცდილება გაიზიაროთ იმ ადამიანთან, ვინც თავდაჯერებულობას გმატებთ, ზრუნავს თქვენზე და გულწრფელად გაფასებთ.
ფიზიკური სამზადისი
პირველი სექსუალური გამოცდილებისთვის ფიზიკური მზადება მხოლოდ თავად აქტს არ ეხება — ის გულისხმობს იმას, რომ ფიზიკურად თავს გრძნობდეთ უსაფრთხოდ, კომფორტულად და თავისუფლად. ეს მოიცავს ზრუნვას საკუთარ სხეულზე, თავის დაცვის ძირითადი პრინციპების ცოდნას და ისეთი გარემოს შექმნას, სადაც შეგიძლიათ, სრულად მოეშვათ და იყოთ ის, ვინც ხართ.
უსაფრთხო სექსი და თავის დაცვა
კონტრაცეფციის გამოყენება ერთ-ერთი ყველაზე მნიშვნელოვანი გზაა საკუთარი თავისა და პარტნიორის მიმართ ზრუნვის გამოსახატად. პრეზერვატივი მარტივი და საიმედო საშუალებაა, რომელიც ამცირებს როგორც სქესობრივი გზით გადამდები ინფექციების (სგგი), ისე დაუგეგმავი ორსულობის რისკს. ის ასევე პატივისცემის პატარა ჟესტია — გზავნილი, რომ „ვაფასებ საკუთარ და პარტნიორის სხეულსა და ჯანმრთელობას“.
- მეტი ინფორმაციისთვის იხილეთ ჩვენი სტატიები პრეზერვატივი და უსაფრთხო სექსი — როგორ და რატომ უნდა დავიცვათ თავი? და სქესობრივი გზით გადამდები ინფექციები — ტიპები, გავრცელების გზები და ტესტირება
თუკი თქვენ ან თქვენი პარტნიორი აპირებთ პრეზერვატივის გამოყენებას, უმჯობესია, წინასწარ გამონახოთ დრო იმისთვის, რომ გაეცნოთ, ზუსტად როგორ მუშაობს ის. განურჩევლად იმისა, თავად იკეთებთ პრეზერვატივს თუ პარტნიორს ეხმარებით — მცირეოდენი ვარჯიში და წინასწარ მომზადება დაგეხმარებათ, რომ ნაკლებად იგრძნოთ დაძაბულობა სექსის დროს ამის კეთებისას. ყოველთვის კარგი იდეაა, რომ ახლოს გქონდეთ რამდენიმე პრეზერვატივი და არ შეგეშინდეთ მათ გამოყენებაზე ღიად საუბრის.
► გახსოვდეთ: წინასწარ მომზადებაში არაფერია სამარცხვინო. პირიქით, ეს ზრდასრულობისა და მზრუნველობის ნიშანია და ამას შეუძლია, მთელი გამოცდილება ბევრად უფრო მშვიდი და უსაფრთხო გახადოს.
პირადი ჰიგიენა და საკუთარ სხეულში თავდაჯერებულობა
საკუთარ სხეულში კომფორტულად ყოფნა დაგეხმარებათ, მეტად მოდუნდეთ პირველი სექსუალური გამოცდილების დროს. ეს არ ნიშნავს გარეგნობის შეცვლას — ეს, უბრალოდ, გულისხმობს საკუთარი თავის მოვლის მცირე რიტუალს, რომელიც თავს უკეთ გაგრძნობინებთ: თბილი შხაპი, სუფთა ტანსაცმელი, კბილების გახეხვა ან კანის დატენიანება — თითოეული მათგანი შეიძლება იყოს საკუთარ თავზე მზრუნველობის მარტივი რიტუალი.
► სექსამდე შხაპის მიღება და სისუფთავის დაცვა მნიშვნელოვანია — განსაკუთრებით სასქესო ორგანოების, ხელებისა და პირის ღრუს დაბანა. ეს ამცირებს ინფექციების რისკს და ორივესთვის უფრო სასიამოვნო გამოცდილებას ქმნის.
შეგიძლიათ ჩაიცვათ ის, რაც თავდაჯერებულობასა და სიმშვიდეს გმატებთ — იქნება ეს რბილი პიჟამო, რაღაც სექსუალური თუ საერთოდ არაფერი. მთავარია არა შთაბეჭდილების მოხდენა, არამედ საკუთარ თავში კომფორტის პოვნა.
კომფორტული გარემოს შექმნა
გარემო დიდ გავლენას ახდენს იმაზე, თუ რამდენად მშვიდად იგრძნობთ თავს. საჭიროა ადგილი, რომელიც პრივატული და უსაფრთხოა და სადაც არავინ შეგაწუხებთ.
განწყობის შექმნასა და ნერვიულობის შემცირებაში შეიძლება ასევე დაგეხმაროთ:
- მსუბუქი, ინტიმური განათება;
- სუფთა და კომფორტული თეთრეული;
- დამამშვიდებელი მუსიკა.
კარგი იქნება, თუ ხელთ გექნება წყალი, ხელსახოცები ან ლუბრიკანტი. რაღაც განსაკუთრებულის მოწყობა აუცილებელი არაა — მთავარია, რომ თქვენ და თქვენი პარტნიორი თავს გრძნობდეთ კომფორტულად, ყოველივე საჭირო ხელთ გქონდეთ და მზად იყოთ, მთელი ყურადღება პროცესზე გადაიტანოთ.
ემოციური სამზადისი
ფიზიკური კომფორტი მნიშვნელოვანია, მაგრამ ემოციური მზადყოფნაც არანაკლებ აუცილებელია. სექსი მხოლოდ ფიზიკური აქტი არ არის — მან შეიძლება უამრავი ემოცია გამოიწვიოს: აღტაცება, სიახლოვის განცდა, მღელვარება ან საკუთარ თავში დაეჭვებაც კი. ემოციურად მზადება დაგეხმარებათ, რომ თქვენი პირველი გამოცდილება უფრო დადებითი და ღირებული იყოს.
ნერვიულობასა და შფოთვასთან გამკლავება
სავსებით ნორმალური და ბუნებრივია, თუკი პირველ სექსამდე ნერვიულობთ. შესაძლოა, შფოთავდეთ, რამდენად სწორად იზამთ ყველაფერს, ან გაწუხებდეთ, როგორ აღიქვამს ამას პარტნიორი. შეიძლება, გეშინოდეთ, რა რეაქცია ექნება თქვენს სხეულს ამ გამოცდილებაზე — იქნება თუ არა ტკივილი, დისკომფორტი ან რამე სხვა. ეს ყოველივე ნორმალურია და მხოლოდ იმას ნიშნავს, რომ ეს გამოცდილება თქვენთვის მნიშვნელოვანია.
დასამშვიდებლად ერთ-ერთ კარგი გზაა საკუთარ სხეულზე კონცენტრირება. ღრმად ისუნთქეთ და შეახსენეთ საკუთარ თავს, რომ ნერვიულობა ნორმალურია და არ არის საჭირო, ყველაფერი იდეალურად გააკეთოთ ან იდეალურად მოხდეს. დიდი ალბათობით, თქვენს პარტნიორსაც ანალოგიური შეგრძნებები აქვს, ამაზე ერთმანეთთან ღიად და პირდაპირ საუბარმა კი შეიძლება ორივეს შეგმატოთ თავდაჯერებულობა და კიდევ უფრო დაგაახლოვოთ.
იდეალურობის მოლოდინისგან გათავისუფლება
პირველი სექსი იშვიათად არის ისეთი უპრობლემო და უნაკლო, როგორიც ფილმებსა და სერიალებში ჩანს. ის შეიძლება ცოტა მოუქნელი იყოს, მოულოდნელად სასაცილო ან უხერხულიც კი — და ეს სრულიად ნორმალურია. მთავარია, ეს მომენტი გქონდეთ ადამიანთან, რომელსაც ენდობით და რომელთანაც გულწრფელად შეგიძლიათ ისაუბროთ საკუთარ სურვილებსა და საზღვრებზე.
საკუთარი ემოციების გააზრება
სექსი ხშირად იწვევს ბევრ სხვადასხვა ემოციას — და ეს სრულიად ნორმალურია. შეიძლება, იგრძნოთ სიღრმისეული სიახლოვე, შვება ან ზოგჯერ მსუბუქი მოწყვლადობა. ასევე, შესაძლებელია, თავს გრძნობდეთ ცოტა დაბნეულად, დაღლილად ან არ იყოთ დარწმუნებული, როგორ ჩაიარა ყველაფერმა. ყველა ეს შეგრძნება ნამდვილია და სრულად მისაღები.
სანდო მეგობართან ან თქვენს პარტნიორთან საკუთარ გრძნობებზე საუბარი შეიძლება ძალიან დაგეხმაროთ. ასევე, შეიძლება დაგეხმაროთ დღიურის წერა ან, უბრალოდ, იმისთვის დროის გამონახვა, რომ საკუთარ თავთან მარტო დარჩეთ და დაფიქრდეთ.
► გახსოვდეთ: ეს თქვენი პირადი გზაა და შერეული გრძნობების ქონა სრულიად ნორმალურია.
ბევრი ქვიარ ადამიანისთვის პირველი სექსუალური გამოცდილება დამატებით შიშსა და სირცხვილს უკავშირდება — და არა იმიტომ, რომ ქვიარ სექსში რაიმე ცუდია, არამედ იმიტომ, რომ ხშირად ისეთ გარემოში ვიზრდებით, რომელიც მას აკრძალულად, არაბუნებრივად ან საშიშად აღიქვამს. ამის გამო, პირველი გამოცდილება შეიძლება იყოს დამაბნეველი, ფარული ან ემოციურად მძიმე.
ძალიან მნიშვნელოვანია, იცოდეთ: თქვენს სურვილებში არაფერია არასწორი. როცა გიყვართ ან ინტიმური სიახლოვე გსურთ იმავე სქესისა თუ გენდერის ადამიანთან, ან ბინარული ნორმების გარეთ — ეს არ გხდით „ნაკლებად ღირებულად“, „ნაკლებად ჯანმრთელად“ ან „ნაკლებად ადამიანად“.
შესაძლოა, იგრძნოთ წნეხი იმის დასამალად, რასაც აკეთებთ, ან იგრძნოთ დანაშაული — თუნდაც გამოცდილება იყოს სასურველი და თანხმობაზე დაფუძნებული. ეს ბუნებრივი რეაქციაა იმ სამყაროში ცხოვრებაზე, რომელიც ხშირად არ ტოვებს სივრცეს ინდივიდუალურობისა და მრავალფეროვნებისთვის. მაგრამ ეს გრძნობები არ ნიშნავს, რომ გამოცდილება არასწორი იყო — ისინი მიუთითებენ იმაზე, რომ იმსახურებთ მეტ მხარდაჭერას, აღიარებასა და თავისუფლებას.
ეცადეთ, მოიძიოთ ისეთი ადამიანები, რომლებსაც ენდობით, იქნება ეს მეგობარი, ჯგუფი, თემი თუ ონლაინ სივრცე — კავშირი ადამიანებთან, რომლებსაც თქვენი ესმით და დაგეხმარებიან, რომ სირცხვილი ჩაანაცვლოთ სიამაყითა და შინაგან სიმშვიდით.
- მეტი ინფორმაციისთვის იხილეთ ჩვენი სტატიები ჰომოფობია საკუთარი თავის მიმართ — როგორ გავუმკლავდეთ მას? და საკუთარი სექსუალობის ეჭვქვეშ დაყენება — რა უნდა ვიცოდეთ და როგორ მოვიქცეთ?
მოლოდინები სექსის დროს
როცა მომენტი საბოლოოდ დგება, სრულიად ნორმალურია, რომ გქონდეთ ემოციების ნაზავი — აღტაცება, ნერვიულობა და ცნობისმოყვარეობა. არა მხოლოდ პირველი, არამედ, ზოგადად, ნებისმიერი სექსუალური აქტივობის დროს სრულებით მისაღებია, თუ ყველაფერი ზუსტად ისე არ წავა, როგორც გვეგონა — და, დიდი ალბათობით, ასეც იქნება.
► „პირველი სექსი“ სხვადასხვა ადამიანისთვის სხვადასხვა რამეს ნიშნავს. ზოგისთვის ეს შეიძლება ნიშნავდეს პენეტრაციულ (შემღწევ) სექსს, ხოლო სხვებისთვის — ორალურ სექსს, მანუალურ სექსს (მაგალითად, თითაობას ან ე.წ. „ჰენდჯობს“) და სხვა. არ არსებობს ერთი სწორი ან უნივერსალური განმარტება იმისა, რას ვუწოდებთ „ნამდვილ“ ან „პირველ“ სექსს — ნებისმიერი გამოცდილება მნიშვნელოვანია, თუკი ის თქვენთვისაა მნიშვნელოვანი და სრულდება თანხმობით. „ქალიშვილობისა“ თუ „ვაჟიშვილობის“ იდეას არ აქვს არავითარი ბიოლოგიური საფუძველი და ის მხოლოდ კულტურული ცნებაა. თქვენ გაქვთ სრული უფლება, თავად განსაზღვროთ თქვენი სექსუალური გამოცდილება.
ფიზიკური შეგრძნებები
პირველი სექსის ფიზიკური მხარე ძალიან განსხვავდება სხვადასხვა ადამიანისთვის. შეიძლება, იგრძნოთ ძლიერი სიამოვნება, მსუბუქი დისკომფორტი ან ორივეს კომბინაცია.
ვაგინის მქონე ადამიანს, პენეტრაციული სექსის შემთხვევაში, შეიძლება ეშინოდეს ტკივილის ან სისხლდენის. მითია, თითქოს ყველას ეწყება სისხლდენა პირველი პენეტრაციის დროს. ზოგს სისხლდენა საერთოდ არ აქვს, ზოგს კი შეიძლება ჰქონდეს მცირედი და დროებითი სისხლდენა.
პენისის მქონე ადამიანისთვის სრულიად ბუნებრივია, ემოციებისა და მღელვარების ფონზე განცდილი შეგრძნებები იმდენად ინტენსიური იყოს, რომ ორგაზმი სწრაფად დადგეს. ამაში სასირცხვილო არაფერია — ეს ჩვეულებრივი და ბუნებრივი რეაქციაა.
პრელუდიის მნიშვნელობა
პრელუდია, ანუ ინტიმური სიახლოვე სექსამდე, მაგალითად, კოცნა, შეხება, მოფერება, უბრალოდ „გახურება“ არ არის — ის სექსუალური გამოცდილების მნიშვნელოვანი ნაწილია. პრელუდია ეხმარება სხეულს მოდუნებაში, გეხმარებათ თქვენ და თქვენს პარტნიორს ნდობის ჩამოყალიბებასა და ემოციური კავშირის გაღრმავებაში. სწორედ ამან შეიძლება გახადოს სექსი უფრო კომფორტული და სასიამოვნო.
ასე რომ, არ იჩქაროთ. არ არის აუცილებელი, სწრაფად გადახვიდეთ პენეტრაციულ (შემღწევ) სექსზე — სექსი არა დანიშნულების ადგილი, არამედ პროცესია. იყავით მშვიდი, გამოიკვლიეთ ერთმანეთის სხეულები, ყურადღება მიაქციეთ, რა განიჭებთ სიამოვნებას და რა ანიჭებს სიამოვნებას თქვენს პარტნიორს. და გახსოვდეთ — ინტიმურობა მხოლოდ ფიზიკური შეხება არ არის, ეს ემოციური კავშირიცაა.
მოლოდინებისგან გათავისუფლება
სავსებით მისაღებია, თუ ყველაფერი ცოტა მოუქნელად ან უხერხულად წარიმართება. შეიძლება, შემთხვევით შუბლით შეეჯახოთ ერთმანეთს, წინდა სადღაც გაიჭედოს ან ვიღაცას თმა მოექაჩოს — ყველაფერი ხდება ხოლმე. არ მოგერიდოთ ამაზე სიცილის — პირიქით, ასეთი პატარა, სასაცილო მომენტები ხშირად აახლოებს პარტნიორებს და ამსუბუქებს ატმოსფეროს.
და თუ აღმოაჩენთ, რომ ზედმეტად ბევრს ფიქრობთ იმაზე, რამდენად სწორად გამოგივათ რამე, შეახსენეთ საკუთარ თავს, რომ თითქმის პირველად თითქმის ყველა ასეა. ეს ყველაფერი ადამიანთან უფრო ღრმა, ინტიმური კავშირის დამყარების ბუნებრივი ნაწილია.
ერთმანეთთან კომუნიკაცია
კომუნიკაცია მაშინ არ მთავრდება, როცა საქმე ფიზიკურ ინტიმურობაზე გადადის — პირიქით, კომუნიკაცია არანაკლებ მნიშვნელოვანია მის დროსაც. დააკვირდით პარტნიორის სხეულის ენას, მოუსმინეთ მის სიტყვებს და არ მოგერიდოთ შეკითხვების დასმის: „კარგად ხარ?“ ან „ხომ არ შევანელოთ?“ — ერთმანეთის კომფორტის დონის გადამოწმება უფრო ახლოს და უსაფრთხოდ გაგრძნობინებთ თავს.
მნიშვნელოვანია, გახსოვდეთ, რომ თანხმობა ერთჯერადი მოვლენა არ არის — ის უწყვეტი პროცესია. ის, რომ ადამიანმა სექსის დასაწყისში თანხმობა გასცა, სულაც არ ნიშნავს, რომ ეს გადაწყვეტილება არ შეიძლება შეიცვალოს პროცესის დროს. სრულიად ნორმალურია, შეჩერდეთ, გადაამოწმოთ ან ნებისმიერ მომენტში თქვათ „არა“. თქვენ და თქვენს პარტნიორს, ორივეს გეკუთვნით თავისუფლება, გამოთქვათ თქვენი ემოციები და საჭიროებები მთელი პროცესის განმავლობაში.
► გახსოვდეთ: სრულყოფილება სულაც არაა აუცილებელი იმისთვის, რომ პირველი სექსუალური გამოცდილება ღირებული და დადებითი იყოს. მთავარია, იყოთ ადამიანთან, რომელიც გცემთ პატივს, ზრუნავს თქვენს კომფორტზე და ნამდვილად ღელავს თქვენს კეთილდღეობაზე.
კომუნიკაცია და ზრუნვა აქტის შემდეგ
ის, რაც სექსის შემდეგ ხდება, ისეთივე მნიშვნელოვანია, როგორც თავად აქტის განმავლობაში. ეს კარგი დროა ემოციური კავშირის გასამყარებლად, ერთმანეთის სანუგეშებლად და გულწრფელი აზრების გაზიარებისთვის. პირველმა სექსმა შეიძლება სხვადასხვა ემოცია გამოიწვიოს — და ეს სრულიად ნორმალურია.
დრო დაუთმეთ პარტნიორთან ხელახლა დაკავშირებას. ეს შეიძლება იყოს ფიზიკური სიახლოვე — ჩახუტება, მოფერება, ხელის ჩაჭერა ან, უბრალოდ, საუბარი იმაზე, როგორ იგრძენით თავი ორივემ. ასეთი პატარა, ყურადღებიანი ჟესტები მთლიან გამოცდილებას ბევრად უფრო დადებითს გახდის, გააძლიერებს უსაფრთხოების შეგრძნებას და თქვენ და თქვენს პარტნიორს გაჩვენებთ, რამდენად აფასებთ ერთმანეთის აზრს, გრძნობებსა და კომფორტს.
თუმცა, ისიც მისაღებია, თუ ცოტა სივრცე გჭირდებათ იმისთვის, რომ გააანალიზოთ საკუთარი ემოციები სექსის შემდეგ. სექსი შეიძლება იყოს ინტენსიური გამოცდილება და არაა უჩვეულო, თუ მას მოსდევს მცირე დაბნეულობა, დაურწმუნებლობა ან სიმძიმის განცდაც კი. ეს იმას არ ნიშნავს, რომ რამე არასწორად გააკეთეთ — ეს, უბრალოდ, ახალი ემოციური და ფიზიკური სიახლოვის ბუნებრივი რეაქციაა.
მიეცით საკუთარ თავს უფლება, იგრძნოთ ის, რაც ბუნებრივად მოდის. თუკი მეგობართან ან სხვა სანდო ადამიანთან საუბარი გსურთ, გამონახეთ დრო თვითრეფლექსიისთვის.
► და, რაც მთავარია, გახსოვდეთ — პირველი სექსი თქვენი ცხოვრების მხოლოდ ერთ-ერთი ეტაპია. ის არ განგსაზღვრავთ არც თქვენ და არც თქვენს ურთიერთობას. თქვენი სხეული მხოლოდ თქვენ გეკუთვნით და გადაწყვეტილებებიც მხოლოდ თქვენზეა — სრული უფლება გაქვთ, ისწავლოთ, შეიცვალოთ, გაიზარდოთ და მიიღოთ ახალ-ახალი გამოცდილებები. მნიშვნელოვანია, რომ დაფასებასა და სითბოს გრძნობდეთ არა მხოლოდ პარტნიორისგან, არამედ საკუთარი თავისგანაც.
წყაროები: Center for Sexuality, Scarleteen