დღეს იურიდიულ საკითხთა კომიტეტზე რუსულ კანონს განიხილავენ. „ქართული ოცნების“ დეპუტატმა და კომიტეტის თავმჯდომარემ, ანრი ოხანაშვილმა, დარბაზიდან ოპოზიციონერი დეპუტატები გიორგი ვაშაძე, ლევან ბეჟაშვილი, თამარ კორძაია, სალომე სამადაშვილი, თაკო ჩარკვიანი, ქეთი თურაზაშვილი და ანა წითლიძე გააძევა.
კომიტეტის სხდომა ხმაურით მიმდინარეობს. ოხანაშვილმა ოპოზიციონერ დეპუტატებს არაერთხელ გაუთიშა მიკროფონი და მისცა გაფრთხილება. ამას დეპუტატების მხრიდან პროტესტი და კითხვის დასმის თუ საუბრის საშუალების მიცემის მოთხოვნა მოჰყვა, რის შემდეგაც ოხანაშვილმა მათ „რეგლამენტის დარღვევის“ და მიკროფონის გარეშე საუბრის საბაბით დაატოვებინა დარბაზი.
აღსანიშნავია, რომ რუსული კანონის განხილვის პარალელურად საკანონმდებლო ორგანოში კვლავ გამოცხადებულია უსაფრთხოების „ყვითელი დონე“ და პარლამენტში ისევ არ უშვებენ აკრედიტირებული ონლაინ მედიების ჟურნალისტებს.