მასტურბაცია ხშირად აღიქმება როგორც სოლო აქტი — რაღაც პირადული, კერძო და იშვიათად განსახილველი. მაგრამ სულაც არაა აუცილებელი, ასე იყოს. პარტნიორთან გაზიარებისას მასტურბაცია უფრო მეტი ხდება — უსაფრთხო და შემეცნებითი სივრცე ინტიმურობის, კომუნიკაციისა და ურთიერთსიამოვნების შესასწავლად.
ორმხრივი მასტურბაცია (ან „ერთობლივი მასტურბაცია“; ინგლ. Mutual Masturbation) არის პრაქტიკა, როდესაც საკუთარ თავს სიამოვნებას ანიჭებთ მაშინ, როდესაც თქვენი პარტნიორიც იმავეს აკეთებს. ეს ორივე ადამიანს აძლევს საშუალებას, სრულად იგრძნონ საკუთარი სხეული და მასში მიმდინარე პროცესები, პარალელურად კი იხილონ და დააფასონ სხვისი. ეს შეიძლება მოხდეს ერთ სივრცეში, ვიდეოჩატში ან, თუნდაც, მხოლოდ ხმით — მთავარია, რა არის კომფორტული თქვენთვის და თქვენი პარტნიორისთვის.
► რეალურად, ორმხრივ მასტურბაციას ორი მნიშვნელობა აქვს: ის შეიძლება გულისხმობდეს როგორც ერთად მასტურბაციას, ისე ერთმანეთისთვის მასტურბირებას. ამ სტატიაში ჩვენ მხოლოდ ერთად მასტურბაციაზე ვისაუბრებთ.
განურჩევლად იმისა, ხანგრძლივ ურთიერთობაში ხართ, ახლაღა იწყებთ ახალი კავშირის გამოკვლევას თუ დისტანციურად გყავთ პარტნიორი, ორმხრივი მასტურბაცია ტრადიციული სექსუალური სცენარების შესანიშნავი ალტერნატივაა. ის ფოკუსირებულია თანხმობაზე, სიამოვნებასა და მოწყვლადობაზე. ის არ საჭიროებს პერფორმანსს, პირიქით — ის ქმნის სივრცეს, სადაც შეიძლება წნეხის გარეშე იყო გულწრფელი და ნამდვილი.
ეს სტატია არის პატარა გზამკვლევი, რომელშიც გაიგებთ, ზუსტად რას ნიშნავს ორმხრივი მასტურბაცია, რატომ არის ის მნიშვნელოვანი და როგორ შეიძლება მისი გამოკვლევა სიამოვნებაზე, პატივისცემასა და ავთენტურობაზე დაყრდნობით.
რა არის (და რა არ არის) ორმხრივი მასტურბაცია?
ორმხრივი მასტურბაცია ნიშნავს საკუთარი თავისთვის სიამოვნების მინიჭებას პარტნიორის თანდასწრებით — იქნება ეს გვერდიგვერდ წოლა, ვიდეოკამერით ერთმანეთის ყურება თუ ინტიმური ხმების გაზიარება სატელეფონო ზარით. ეს აქტივობა ხშირად არასწორად ესმით, აბუჩად იგდებენ ან უგულებელყოფენ, თუმცა, სინამდვილეში, ეს შეიძლება იყოს პარტნიორული ურთიერთობის ერთ-ერთი ყველაზე ღრმა, კომფორტული და ვალიდაციის გამცემი ფორმა.
თავისი არსით, ორმხრივი მასტურბაციის დროს მნიშვნელოვანია არა ტექნიკა თუ შესრულება, არამედ თანაობა, სივრცეში ერთად და ერთმანეთთან ყოფნა. თქვენ ამ დროს რაიმეს კი არ უკეთებთ ერთმანეთს, არამედ ხედავთ, სწავლობთ და აძლევთ საკუთარ თავს საშუალებას, რომ დაგინახონ დაუფარავი და გაუფილტრავი სურვილის მდგომარეობაში.
ეს არის:
- საზიარო გამოცდილება, რომელშიც ორივე პარტნიორი ერთმანეთის პარალელურად იკვლევს სიამოვნებას;
- შანსი, დაინახო, რა აღაგზნებს შენს პარტნიორს — და თავადაც იყო დანახული საკუთარ სიამოვნებაში;
- სხვა სახის სექსუალური აქტივობების ალტერნატივა (ან დამატება), განსაკუთრებით როცა პენეტრაცია (შეღწევა) შეუძლებელია, არასასურველია ან არ არის უსაფრთხო;
- სექსუალური კომუნიკაციისა და საკუთარ სხეულში თავდაჯერებულობის გაზრდის გზა, რომელსაც ნაკლები წნეხი ახლავს თან.
ეს არ არის:
- „მხოლოდ მოზარდებისთვის“ ან „ნამდვილი“ სექსის „შემცვლელი“;
- ინტიმურობის ნაკლებად მნიშვნელოვანი ფორმა — რეალურად, მას შეუძლია ემოციური კავშირი კიდევ უფრო გააღრმაოს;
- მხოლოდ ერთ გენდერზე, სექსუალურ ორიენტაციაზე, სხეულის ტიპსა თუ ურთიერთობის სტილზე მორგებული;
- სამარცხვინო ან ეგოისტური — პირიქით, ის კოლაბორაციულია, თანხმობაზე დაფუძნებული და ზოგჯერ თერაპიული, მკურნავი ეფექტის მქონეც კი.
ზოგისთვის ორმხრივი მასტურბაცია არის გზა, გამოიკვლიოს საკუთარი სურვილი პერფორმანსის წნეხის გარეშე, რომელიც ხშირად სექსუალური კავშირის სხვა ფორმებს ახასიათებთ. სხვებისთვის ეს არის ერთგვარი პრელუდია — ინტიმური სიახლოვე სექსის წინ — დისტანციურ ურთიერთობაში ინტიმურობის შენარჩუნების გზა ან, უბრალოდ, უსაფრთხო სექსუალური პრაქტიკა, რომელსაც თან არ ახლავს დაორსულებისა თუ სქესობრივი გზით გადამდები ინფექციების (სგგი) გავრცელების რისკი. რაც არ უნდა იყოს მიზეზი, ორმხრივ მასტურბაციას შეუძლია, ერთდროულად ავტონომიისა და ინტიმური სიახლოვის მოპოვების აქტად იქცეს.
რატომ არის ორმხრივი მასტურბაცია მნიშვნელოვანი?
კულტურაში, სადაც სექსი ხშირად წარმოდგენილია, როგორც მიზანზე ორიენტირებული პროცესი — აქცენტით პენეტრაციაზე (შეღწევა), ორგაზმზე ან პერფორმანსზე — ორმხრივი მასტურბაცია პარტნიორებს სთავაზობს სრულიად განსხვავებულ გამოცდილებას. ის აყენებს სიამოვნებას წნეხზე წინ, ცნობისმოყვარეობას სცენარზე წინ და ინტიმურობას მოლოდინებზე წინ.
საუკეთესო შემთხვევაში, ის აღრმავებს პარტნიორებს შორის კავშირს არა მხოლოდ ფიზიკურად, არამედ ემოციურად და ფსიქოლოგიურადაც. ორმხრივი მასტურბაცია:
- აძლიერებს ემოციური უსაფრთხოების განცდას — საკუთარი სიამოვნების ჩვენება, ფიზიკური შეხების გარეშე, ნდობას საჭიროებს. თქვენ იწვევთ პარტნიორს ინტიმურ სივრცეში, სადაც არ „ასრულებთ როლს“, არამედ აჩვენებთ რაღაც ნამდვილს. ეს გულწრფელობა ქმნის უსაფრთხოებას, ამცირებს სირცხვილის შეგრძნებას და აძლიერებს ემოციურ ინტიმურობას;
- აძლიერებს სექსუალურ კომუნიკაციას — ყველაზე მარტივი გზა ვინმესთვის იმის საჩვენებლად, თუ ზუსტად რა განიჭებთ სიამოვნებას, არის ამის პირდაპირ ჩვენება. გარკვეულწილად, ორმხრივი მასტურბაცია სხეულებრივი დიალოგის ფორმაა, რომელმაც შეიძლება მომავალში ხელი შეუწყოს უფრო თავდაჯერებულ და დამაკმაყოფილებელ სექსს პარტნიორთან, ასევე შეამციროს გაუგებრობა ან უხერხულობა;
- ვალიდაციას აძლევს ინდივიდუალურ სიამოვნებას ურთიერთობაში — ძალიან ხშირად, მასტურბაციას თან სდევს სირცხვილი ან საიდუმლოება, განსაკუთრებით ურთიერთობებში, რადგან არსებობს გავრცელებული მცდარი წარმოდგენა, თითქოს ურთიერთობაში ყოფნის დროს მასტურბაცია არ შეიძლება. მაგრამ როდესაც მასტურბაცია საიდუმლოების სივრციდან გამოგყავთ და იზიარებთ მას პარტნიორთან, ის გარდაიქმნება თვითსიყვარულის აქტად, რომელიც კი არ უპირისპირდება ურთიერთობას, არამედ აძლიერებს მას;
- ინკლუზიურია და ადაპტირებადი — თუკი რაიმე ფიზიკური თუ სხვა ტიპის ფაქტორი პენეტრაციული სექსით ან სხვა სექსუალური აქტივობით დაკავებაში ხელს გიშლით (მაგალითად, ფიზიკური შეზღუდულობები, გენდერული დისფორია, ქრონიკულ ტკივილი) ან, უბრალოდ, დისტანციურ ურთიერთობაში ხართ, ორმხრივი მასტურბაცია შეიძლება გახდეს დაბალი წნეხისა და მაღალი სიამოვნების გზა ინტიმური კავშირის შესანარჩუნებლად. არ არსებობს „სწორი“ სხეული ან „სწორი“ გზა — არსებობს მხოლოდ ის, რაც თქვენთვის და თქვენი პარტნიორისთვის არის სასიამოვნო, უსაფრთხო და ავთენტური.
როგორ ვესაუბროთ პარტნიორს ორმხრივ მასტურბაციაზე?
ყველაზე ღია და პირდაპირ ურთიერთობებშიც კი ახალი სექსუალური გამოცდილებების შესახებ საუბარი შეიძლება უხერხული იყოს ან თავს მოწყვლადად გაგრძნობინებდეთ. და ვინაიდან მასტურბაცია ბევრი ადამიანისთვის ჯერ კიდევ ტაბუდადებული თემაა, ორმხრივი მასტურბაცია, შესაძლოა, უცხო კონცეფცია იყოს ან, სულაც, მას გაშინაგანებული სირცხვილის გრძნობა ახლდეს თან.
მაგრამ აუცილებელი არ არის, ამაზე საუბარი უხერხული იყოს. პირიქით — მასზე საუბარი შეიძლება გახდეს იმ კავშირის მნიშვნელოვანი ნაწილი, რომელსაც ერთად აშენებთ. თუ გსურთ, პარტნიორს ორმხრივ მასტურბაციაზე ესაუბროთ:
- დაიწყეთ ცნობისმოყვარეობით, არა წნეხით — მიუდექით ამ თემას ისე, როგორც რაღაცას, რისი გამოკვლევაც გაინტერესებთ, და არა რაღაცას, რასაც ითხოვთ ან მოელით. ამის შესავალი შეიძლება ასე ჟღერდეს:
- „ცოტა ხნის წინ საინტერესო სტატია წავიკითხე ორმხრივ მასტურბაციაზე და იმაზე, თუ როგორ შეიძლება ამან კიდევ უფრო გაზარდოს ინტიმურობა ურთიერთობაში — რას ფიქრობ, ხომ არ გვეცადა რამე მსგავსი?“
- „ძალიან მიყვარს, როცა ვხედავ, როგორ იღებ სიამოვნებას… ვიფიქრე, ერთად ხომ არ გვეცადა მასტურბაცია?“
- „ზოგჯერ წარმოვიდგენ ხოლმე, როგორ ვწევართ გვერდიგვერდ და, უბრალოდ, საკუთარ თავს ვანიჭებთ სიამოვნებას — ყოველგვარი მოლოდინების გარეშე. რას ფიქრობ, ასეთი რამე მოგეწონება?“
- ჩამოთვალეთ დადებითი მხარეები და თქვენი მოტივაციის მიზეზები — როცა ამ პრაქტიკას უსაფრთხოებით, სიახლოვით ან თამაშის ელემენტით წარუდგენთ პარტნიორს, მან შეიძლება თავი უფრო მშვიდად და ნაკლებად დაძაბულად იგრძნოს:
- „ჩემი აზრით, ეს არის მშვიდი და მარტივი გზა, რომ უფრო დავუახლოვდეთ ერთმანეთს — განსაკუთრებით მაშინ, როცა რაღაც უფრო ინტენსიური არ გვსურს“
- „მინდა, უფრო კარგად გავიგო, რა გსიამოვნებს — და მგონია, რომ ამის ყველაზე კარგად ჩვენება თავად შენ შეგიძლია“
- დატოვეთ სივრცე მათი გრძნობებისთვის — თუ თქვენი პარტნიორი არ არის დარწმუნებული, აქვს მორიდება ან ყოყმანობს — ეს სრულიად მისაღებია. შესაძლოა, მას მეტი დრო, მეტი კონტექსტი ან მხარდაჭერა დასჭირდეს. შეგიძლიათ უთხრათ:
- „არაფრის ვალდებულება არ გაქვს — უბრალოდ, მინდოდა, ერთად რაღაც ახალი და საინტერესო გვეცადა“
- „თუ ოდესმე კომფორტულად იგრძნობ თავს, სიამოვნებით ვცდიდი — მაგრამ მხოლოდ იმ შემთხვევაში, თუ ეს შენც გენდომება და შენთვისაც სასიამოვნო იქნება“
- დისტანციურ ურთიერთობაში მყოფი პარტნიორებისთვის — თუ ფიზიკურად ერთად არ ხართ, ორმხრივ მასტურბაციაზე საუბარი შეიძლება უფრო მარტივიც კი იყოს — როგორც ინტიმური კავშირის შენარჩუნების ალტერნატიული გზა, როცა შეხება შეუძლებელია:
- „მენატრები და მინდა შენთან სიახლოვე ვიგრძნო… გინდა, დღეს რამე ერთად ვცადოთ, ვიდეოთი ან დარეკვით?“
- „ვფიქრობდი, როგორ შეგვიძლია უფრო დავახლოვდეთ მაშინაც კი, როცა შორს ვართ — იქნებ ასეთი რამ გვეცადა ერთად?“
როგორ დავკავდეთ ორმხრივი მასტურბაციით?
ორმხრივ მასტურბაციას არ სჭირდება სცენარი — საკმარისია მხოლოდ ორივე პარტნიორის სურვილი, ნდობა და სივრცე, რომელშიც ორივე უსაფრთხოდ იგრძნობს თავს. განურჩევლად იმისა, ერთ ოთახში იქნებით თუ ერთმანეთისგან შორს, ინტიმურობის ამ ფორმის გამოსაკვლევად ბევრი გზა არსებობს.
ფიზიკურად ერთად ყოფნისას
თუ ფიზიკურად ერთად ხართ, ორმხრივი მასტურბაცია შეიძლება გახდეს შესანიშნავი გზა საიმისოდ, რომ ცოტა ტემპი შეანელოთ და ფოკუსირდეთ საკუთარ თავზე ისე, რომ კავშირი არ დაკარგოთ პარტნიორთან და არ იჩქაროთ სხვა ტიპის სექსუალურ აქტივობებზე (მაგალითად, პენეტრაციულ სექსზე) გადასვლა. გახსოვდეთ, რომ ორმხრივი მასტურბაცია დამოუკიდებელი, სრულყოფილი აქტიც შეიძლება იყოს. შეგიძლიათ, სცადოთ:
- გვერდიგვერდ: დასხედით ან დაწექით ერთმანეთის გვერდით. შეეხეთ საკუთარ თავს, პარალელურად კი გაცვალეთ მზერები, ერთმანეთის რიტმს აუყოლეთ სუნთქვა ან მდუმარედ გაამხნევეთ ერთმანეთი. ეს იდეალურია, თუკი ერთ-ერთი თქვენგანი მორცხვობს — შეგიძლიათ, თავად აკონტროლოთ, რამდენად ინტენსიური თუ ხანგრძლივი იქნება ერთმანეთისთვის თვალებში ყურება თუ რაიმე სხვა ინტერაქცია;
- პირისპირ: დასხედით გადაჯვარედინებული ფეხებით ერთმანეთის მოპირდაპირედ. ამან შეიძლება შექმნას უფრო ღრმა და ინტენსიური კავშირი, განსაკუთრებით თუ გსურთ პროცესში საუბრის, ხმების გამოცემის ან ერთობლივი რიტმის ჩართვა;
- გადაჯვარედინებული სხეულები: ერთ-ერთი პარტნიორი ზის მეორის კალთაში, ორივე თავის თავს ეხება — ეს არის სიახლოვის შეგრძნების გზა სასქესო ორგანოების უშუალო კონტაქტის გარეშე;
- სარკისებური მოძრაობები: სცადეთ ერთმანეთის მოძრაობების გამეორება, რიტმის, სუნთქვის ან პოზის ცვლილებით. ეს თქვენს სიამოვნებას პატარა ცეკვად გარდაქმნის.
► გარდა ამისა, ამ გამოცდილების გასაუმჯობესებლად:
- თან იქონიეთ ლუბრიკანტები და ხელსახოცები
- შეგიძლიათ თამაშში ჩართოთ სექს-სათამაშოები
- ყურადღება მიაქციეთ განათებასა და მუსიკას კომფორტისთვის
- გამოიყენეთ ბალიშები სხეულის მისაყრდნობად, მეტი კომფორტისა და მოდუნებისთვის
ვირტუალურად
თუკი დისტანციურ ურთიერთობაში ხართ ან, უბრალოდ, თქვენთვის ფიზიკური დისტანციის ქონა უფრო მეტ კომფორტს ქმნის, შეგიძლიათ, სცადოთ ვირტუალური ორმხრივი მასტურბაცია, რომელიც ასევე შეიძლება ძალიან ინტიმური იყოს.
► გაითვალისწინეთ, რომ აუცილებელია უსაფრთხოების წესების დაცვა ნებისმიერი ციფრული სექსუალური კომუნიკაციის დროს, იქნება ეს დარეკვა თუ მხოლოდ მიმოწერა. უმჯობესია, ასეთი კომუნიკაცია მხოლოდ იმ ადამიანებთან გქონდეთ, ვისაც ნამდვილად ენდობით. წინასწარ შეთანხმდით, შეიძლება თუ არა რაიმეს გადაღება, ჩამოტვირთვა თუ შენახვა, ასევე დარწმუნდით, რომ ერთმანეთს ისეთი მოწყობილობიდან თუ აპლიკაციიდან ეკონტაქტებით, რომელიც დაცულია. ციფრულ უსაფრთხოებაზე მეტი ინფორმაციის გასაგებად წაიკითხეთ ჩვენი სტატია რა არის სექსტინგი? — რჩევები უსაფრთხო სექს-მიმოწერისთვის.
იდეები ვიდეოკამერით კონტაქტისას:
- კამერის კუთხე — ტელეფონი ან ლეპტოპი ისე მოათავსეთ, რომ პარტნიორმა კარგად დაგინახოთ. სცადეთ:
- ბალიშებზე მიყრდნობით ჯდომა
- საწოლზე მუხლებზე დგომა
- ძირს დაწოლა ისე, რომ კამერით ზემოდან გიყურებდეთ
- ცალი ფეხის ამოწევა განსხვავებული ხედისთვის
► თავისუფლად შეცვალეთ პოზა. მთავარი კომფორტია და არა — სრულყოფილება.
- სექს-სათამაშოებთან ერთად თამაში — თუ ორივეს გაქვთ სექს-სათამაშოები, გამოიყენეთ ისინი ერთად. ეს შესანიშნავი გზაა ერთდროულად გართობისთვის და სიახლოვის გასაზრდელად. ზოგიერთ სექს-სათამაშოს ასევე იმის ფუნქცია აქვს, რომ ის მობილური აპლიკაციიდან იმართოს, მაგალითად, პარტნიორის მიერ. სცადეთ:
-
- ერთმანეთის მოძრაობების გამეორება
-
- მორიგეობით თამაში
-
- იმის ჩვენება, თუ რა გსიამოვნებთ ყველაზე მეტად
- ვერბალური კავშირი — ესაუბრეთ ერთმანეთს და თქვით, რას აკეთებთ, რას გრძნობთ ან შეგიძლიათ გარკვეული მითითებებიც მისცეთ ერთმანეთს, კომფორტის ფარგლებში. ზოგჯერ უმარტივესი ფრაზებიც კი — ან თუნდაც სუნთქვის ხმა, კვნესა ან სიცილი — შეიძლება ინტიმური სიახლოვის შესანიშნავი გზა აღმოჩნდეს, ყოველგვარი წნეხის გარეშე.
იდეები მხოლოდ ხმოვანი კონტაქტისას:
- ეროტიკული თხრობა — აღუწერეთ პარტნიორს, რას აკეთებთ, გაუზიარეთ სექსუალური ფანტაზია ან სთხოვეთ, თავად აღწეროს, რას აკეთებს ან რას ისურვებდა. იყავით ბუნებრივი და ისაუბრეთ თქვენი სიტყვებით — ეს ნებისმიერ წინასწარ გაწერილ სცენარზე უკეთესია;
- შეგრძნებებზე ფოკუსირებული თამაში — დახუჭეთ თვალები და კონცენტრირდით ხმაზე, რიტმსა და სუნთქვაზე. დაუკავშირეთ თქვენი მოძრაობები პარტნიორის ხმას ან სუნთქვას და განიცადეთ ღრმა, უხილავი კავშირი.
► როგორიც არ უნდა იყოს მოცემულობა, გახსოვდეთ:
- სიცილი, დუმილი თუ უხერხულობა — ეს ყველაფერი ნორმალურია
- არ არის აუცილებელი, იჩქაროთ ორგაზმის მიღწევა — ამ აქტივობაში მთავარი ერთად და ერთმანეთთან ყოფნაა
- ორმხრივი მასტურბაცია შემეცნებითი პროცესია და არა — პერფორმანსი
გავრცელებული მითები და მცდარი წარმოდგენები
ორმხრივი მასტურბაცია ერთ-ერთი ყველაზე ბუნებრივი და ხელმისაწვდომი ინტიმური პრაქტიკაა — მიუხედავად ამისა, მის ირგვლივ მაინც არსებობს სირცხვილი, დაბნეულობა და სტერეოტიპული წარმოდგენები.
მითი #1: „ეს არ არის ნამდვილი სექსი“
ბევრ ადამიანს ასწავლიან — პირდაპირ ან ირიბად — რომ სექსი მხოლოდ მაშინ „ითვლება“, თუ ის პენეტრაციას (შეღწევას) მოიცავს. მაგრამ ეს შეხედულება უგულებელყოფს უამრავ ნამდვილ, ღრმა და ინტიმურ გამოცდილებას, განსაკუთრებით ქვიარ ადამიანებისთვის, შეზღუდული შესაძლებლობების მქონე პირებისთვის ან მათთვის, ვინც კავშირის დამყარების „არატრადიციულ“ გზებს იკვლევს.
სიმართლე: ნებისმიერი აქტივობა, რომელიც მოიცავს ორმხრივ ინტიმურ სიამოვნებას, თანხმობასა და კავშირს, არის სექსი. ორმხრივი მასტურბაცია არ არის ნაკლებად მნიშვნელოვანი ან ნაკლებად ნამდვილი — ბევრისთვის, სულაც, ის შეიძლება უფრო მეტად მოწყვლადი და რეალურიც კი იყოს.
მითი #2: „ეს მხოლოდ იმათთვისაა, ვინც უფრო მეტისთვის არ არის მზად“
ზოგი ფიქრობს, რომ ორმხრივი მასტურბაცია მხოლოდ მოზარდებისთვის ან ისეთი ახალი ურთიერთობისთვისაა, სადაც პარტნიორები ჯერ „არ არიან მზად“ პენეტრაციისთვის. მაგრამ ასეთი მიდგომა ორმხრივ მასტურბაციას უბრალოდ ერთ-ერთ ეტაპად აქცევს და არა — სრულფასოვან, დამოუკიდებელ გამოცდილებად.
სიმართლე: ორმხრივი მასტურბაცია არ არის დროებითი ჩანაცვლება — ის არის შეგნებული არჩევანი. ბევრი წყვილი — ნებისმიერი ასაკისა და გამოცდილების მქონე — იყენებს მას, რათა დაახლოვდნენ, მოდუნდნენ ან დატკბნენ სიამოვნებით ზედმეტი წნეხის გარეშე. ის განსაკუთრებით მნიშვნელოვანია მაშინ, როცა ერთ-ერთ ან ორივე პარტნიორს უფრო ნაზი ან არაპენეტრაციული კავშირი სურს.
- იხილეთ აგრეთვე ჩვენი სტატია სექსი პენეტრაციის გარეშე — მნიშვნელობა, ტიპები და დადებითი მხარეები
მითი #3: „საკუთარი ან სხვისი მასტურბაციის ყურება უცნაური და სასირცხვილოა“
მასტურბაციაზე მრავალწლიანმა დუმილმა ბევრ ჩვენგანი მიაჩვია, რომ უნდა გვრცხვენოდეს ან არ ვუყუროთ და არ დავინახოთ მსგავსი რამ.
სიმართლე: თანხმობაზე ორიენტირებულ სექსუალურ და ინტიმურ გამოცდილებებში სირცხვილის ადგილი არ არის. თქვენი პარტნიორის მასტურბაციის ყურება მისი ინტიმური შინაგანი სამყაროს უკეთ დანახვაში დაგეხმარებათ, მისთვის იმავეს ჩვენება კი დიდ სიმამაცეს, ნდობასა და მოწყვლადობას მოითხოვს.
მითი #4: „ეს მხოლოდ ერთი და იმავე სქესის წყვილებისთვის ან კონკრეტული ორიენტაციებისთვისაა შესაფერისი“
ვინაიდან ორმხრივი მასტურბაცია არ შეესაბამება ჰეტერონორმატიულ სექსუალურ სცენარებს, მასზე არსებობს სტერეოტიპი, რომ ის „ყველასთვის არ არის“.
სიმართლე: ორმხრივი მასტურბაცია განკუთვნილია ყველა იმ ადამიანისთვის, ვინც სიამოვნების გაზიარებით ტკბება — განურჩევლად გენდერისა, ანატომიისა და სექსუალური ორიენტაციისა. ერთადერთი, რაც მისთვის საჭიროა, არის ცნობისმოყვარეობა, ნდობა და თანხმობა.
უსაფრთხოება, თანხმობა და ემოციური მზაობა
ორმხრივი მასტურბაცია ხშირად სექსუალური სიამოვნების გაზიარებას ერთ-ერთ ყველაზე უსაფრთხო გზად მიიჩნევა — და ეს შემთხვევითი არ არის. აქ საჭირო არ არის ფიზიკური შეღწევა და თუ ერთმანეთის სხეულის სითხეებს არ ეხებით, სქესობრივი გზით გადამდები ინფექციების (სგგი) გავრცელების რისკი მინიმალურია. თუმცა, უსაფრთხოება მხოლოდ ბიოლოგიას არ ეხება — ის მოიცავს ემოციურ ნდობას და მკაფიო კომუნიკაციასაც.
თანხმობა არის განგრძობითი, ენთუზიაზმზე დაფუძნებული და შექცევადი. ისევე, როგორც ნებისმიერი სხვა სექსუალურ აქტის შემთხვევაში, თანხმობა უნდა იყოს თავისუფლად (ზეწოლის გარეშე) გაცემული, გასაგებად გამოხატული და ნებისმიერ დროს უნდა იყოს შესაძლებელი მისი უკან წაღება. შესაძლოა, ორმხრივი მასტურბაცია უფრო „ნაკლებად სარისკო“ ჩანდეს, მაგრამ მასაც ისევე სჭირდება ცხადი და პირდაპირი კომუნიკაცია, როგორც სხვა სექსუალურ აქტივობებს.
- გადაამოწმეთ დაწყებამდე: „ამის ცდა შენთვის კომფორტული იქნება?“
- გადაამოწმეთ პროცესში: „გინდა, გავაგრძელოთ, თუ რაიმე შევცვალოთ?“
- პატივი ეცით საზღვრებს: განსაკუთრებით მაშინ, როცა საქმე ეხება ყურებას, გადაღებას ან შეხებას.
ემოციური მზაობა მნიშვნელოვანია. თვითსიამოვნების პროცესის ვინმესთვის ჩვენება შეიძლება ძალიან რთული იყოს — ამისთვის ყველა არ არის მზად და ეს სრულიად ნორმალურია. ჰკითხეთ საკუთარ თავს:
- ამ ადამიანის გვერდით თავს უსაფრთხოდ ვგრძნობ? ვგრძნობ პატივისცემას?
- ჩემთვის მისაღებია, თუ ეს აქტივობა ორგაზმამდე არ მიაღწევს? ან თუ პროცესში უხერხულად ვიგრძნობ თავს?
- ამას იმიტომ ვაკეთებ, რომ ნამდვილად მინდა თუ იმიტომ, რომ თავს ვალდებულად ვგრძნობ?
თუ რომელიმე პასუხზე გაურკვევლობა გაქვთ, გააჩერეთ პროცესი. ორმხრივი მასტურბაციის საცდელად რომელიმე ერთი „სწორი“ დრო არ არსებობს — მნიშვნელოვანია მხოლოდ თქვენი და თქვენი პარტნიორის ორმხრივი კომფორტი და სიამოვნება.
საზღვრები ვირტუალური გართობისთვის
თუ ურთიერთობას ვიდეო ან ხმოვანი ზარით ამყარებთ, აუცილებლად წინასწარ დაადგინეთ საზღვრები, მაგალითად:
- უნდა იყოს თუ არა ჩაწერა ან ეკრანის ანაბეჭდის (ე.წ. „სკრინშოტის“) გაკეთება ნებადართული — თუ ამის შესახებ წინასწარ და აშკარად არ შეთანხმდებით, ის არ უნდა იყოს დაშვებული;
- როგორ დაიცავთ კონფიდენციალურობას — დახურული აპლიკაციები, ფიზიკურ თუ ვირტუალურ სივრცეში სხვა ადამიანების არყოფნა და სხვა.
- რა ტიპის მეტყველება ან ვიზუალური დეტალები მოგცემთ კომფორტისა და სითბოს განცდას და არა — პერფორმანსისას.
რჩევები ორმხრივი მასტურბაციისთვის
განურჩევლად იმისა, პირველად აპირებთ ორმხრივი მასტურბაციის ცდას თუ უკვე გამოგიცდიათ ის, მცირე ცვლილებებმა შეიძლება თქვენი გამოცდილება მნიშვნელოვნად გააღრმაოს — ემოციურად, ფიზიკურად და შეგრძნებითად.
შექმენით შესაფერისი ატმოსფერო
შექმენით სივრცე, რომელიც იქნება დამამშვიდებელი, პირადი და წნეხისგან თავისუფალი. მაგალითად, ამისთვის შეიძლება გამოგადგეთ:
- განათების სიკაშკაშის დაწევა ან სანთლების დანთება
- სასურველი მუსიკის ჩართვა (მაგალითად, ინსტრუმენტული ან ემბიენტური)
- სხეულისთვის საყრდენის შექმნა რბილი ქსოვილებით, საბნებით ან ბალიშებით
- მობილურზე შეტყობინებების გამორთვა, რათა სრულად იყოთ ჩართული პროცესში
სივრცის უფრო რიტუალურად გარდაქმნა დაგეხმარებათ დამშვიდებასა და ამ გამოცდილების საკუთარ თავზე მორგებაში, რათა ნაკლებად იგრძნობოდეს ნაჩქარევობა ან უხერხულობა.
სცადეთ სარკისებური მოძრაობები ან სურვილების ილუსტრირება
მორიგეობით აჩვენეთ ან აღუწერეთ ერთმანეთს, რა გსიამოვნებთ. შეგიძლიათ, გაიმეოროთ ერთმანეთის მოძრაობები, თუკი გსურთ ერთმანეთის რიტმის დაჭერა და ორმხრივი კავშირის გაძლიერება. სცადეთ ისეთი ფრაზები, როგორებიცაა:
- „მინდა, ვნახო, როგორ მოგწონს საკუთარი თავისთვის შეხება“
- „შეიძლება, საკუთარ თავს ისე შევეხო, როგორც მგონია, რომ შენ შემეხებოდი?“
- „გინდა, მაჩვენო/მომიყვე, რაზე ფიქრობ ახლა?“
ჩართეთ მეტი შეგრძნება
ორმხრივი მასტურბაცია მხოლოდ დანახვაზე არ უნდა იყოს დამოკიდებული. შეგიძლიათ, უფრო გააღრმაოთ ეს გამოცდილება სხვადასხვა შეგრძნების დამატებით:
- ხმა: კვნესა, სუნთქვა ან სიტყვიერი აღწერები, კითხვები თუ მითითებები (თუკი ეს ორივესთვის კომფორტულია)
- სუნი: ეთერზეთები ან სხეულის ლოსიონები, რომლებიც ორივეს გიყვართ
- შეხება: სექს-სათამაშოები, რბილი ქსოვილები ან თვალების ასახვევი ნაჭერი
- ტემპერატურა: ყინულის ნატეხები, თბილი ხელები ან გამთბარი მასაჟის ზეთი
გამოიყენეთ სექს-სათამაშოები ან სხვა საშუალებები
სექს-სათამაშოები დამატებით სიხალისესა და მრავალფეროვნებას შემოიტანენ, განსაკუთრებით, თუ შორ მანძილზე ხართ ან გსურთ, რაიმე ახალი სცადოთ:
- ვიბრატორები, ხელოვნური ვაგინები ან ანალური საცობები
- ლუბრიკანტები (სუნით, შეგრძნებით ან გემოთი)
- სათამაშოები, რომელთა მართვაც შესაძლებელია დისტანციურად
- ბალიშები ან სპეციალური სადგამები კომფორტისთვის
გამოიკვლიეთ ფანტაზიები (მსუბუქად)
ორმხრივი მასტურბაცია შეიძლება გახდეს ფანტაზიების გაზიარების უსაფრთხო და ბუნებრივი გზა. შეგიძლიათ, სცადოთ როლური თამაში, კოსტიუმები ან სცენარის თხრობა — მაგრამ მხოლოდ იმ შემთხვევაში, თუ ეს ორივესთვის ბუნებრივი და სასიამოვნოა.
► საბოლოოდ, ორმხრივი მასტურბაციის მიზანი არ არის ორგაზმის განცდა, შთაბეჭდილების მოხდენა ან შესრულება. მიზანია ნამდვილი და უსაფრთხო კავშირის შექმნა, რომელიც დაგეხმარებათ იმის აღმოჩენაში, თუ რა აღგაგზნებთ ორივეს.
ხშირად დასმული კითხვები
როდესაც რაღაც ახალს — განსაკუთრებით, ინტიმურს — იკვლევთ, ბუნებრივია, რომ ნერვიულობდეთ და გქონდეთ კითხვები ან შინაგანი წინააღმდეგობა. ეს სრულიად ნორმალურია. დასაწყებად აუცილებელი არ არის, სრულყოფილი თავდაჯერებულობა ან „მზადყოფნა“ გქონდეთ — საკმარისია ცნობისმოყვარეობა, მზრუნველობა და თანხმობა.
მოდით, განვიხილოთ რამდენიმე ხშირი განცდა, რომელიც შეიძლება ამ დროს გაჩნდეს — და შეგახსენოთ: ამაში მარტო არ ხართ.
„რა ვქნა, თუ ვნერვიულობ იმაზე, რომ უნდა მიყურონ?“
ეს აბსოლუტურად ნორმალურია. მასტურბაციის პროცესში საკუთარი თავის ვინმესთვის ჩვენებამ შეიძლება ძალიან დაუცველად გაგრძნობინოთ თავი, განსაკუთრებით, თუ ეს პირველად ხდება. რამდენიმე რჩევა, რომელიც ამის გადალახვაში დაგეხმარებათ:
- დაიწყეთ მსუბუქ, რბილ განათებაში ან კომფორტული საბნით შემოხვეულმა, რათა თავი უფრო დაცულად იგრძნოთ
- თვალის კონტაქტი შეინარჩუნეთ სურვილისამებრ ან, უბრალოდ, დახუჭეთ თვალები
- აუხსენით პარტნიორს, როგორ გრძნობთ თავს და სთხოვეთ მხარდაჭერა
ინტიმურობისთვის მნიშვნელოვანია, იყოთ ნამდვილი, მაშინაც კი, როცა სინამდვილე ნერვიულობას მოიცავს.
„შეიძლება შუქის ჩაქრობა?“
რა თქმა უნდა. არ არის აუცილებლობა, სრულიად ხილული იყოთ. თუ სიბნელე გეხმარებათ მოდუნებაში და მეტი კომფორტის შეგრძნებაში, ეს საუკეთესო არჩევანია.
ზოგი წყვილი სიბნელის გამოყენებით კიდევ უფრო ღრმად აკვირდება ხმებს, შეგრძნებებსა და ერთმანეთის თანაობას.
„შეიძლება, თავიდან, უბრალოდ, ვუყურო?“
დიახ. თქვენი პარტნიორის ყურება, მისი თანხმობით — თუნდაც უშუალო ჩართულობის გარეშე — მაინც შეიძლება იყოს ღრმა, ეროტიკული და კავშირის გამაღრმავებელი გამოცდილება. ამით თქვენ კვლავ უზიარებთ ერთმანეთს სივრცესა და ნდობას.
დროსთან ერთად, შეიძლება, უფრო კომფორტულად იგრძნოთ თავი და თავადაც ისურვოთ ჩართვა, მაგრამ საჩქარო არაფერია. მიეცით საკუთარ თავს უფლება, მიჰყვეთ საკუთარ ტემპს.
„როგორ მოვიქცე, თუ დავიწყებ და გაჩერება მომინდება?“
ესეც სრულიად ნორმალურია. თანხმობა ყოველთვის არის განგრძობითი და შექცევადი. შეგიძლიათ, დროებით ან საერთოდ შეჩერდეთ, გადახვიდეთ სხვა აქტივობაზე ან, უბრალოდ, პარტნიორს ჩახუტება სთხოვოთ. ამის რბილად გამოსახატად შეგიძლიათ თქვათ:
- „მომწონს, რომ დავიწყეთ, მაგრამ, მგონი, მინდა, ცოტა შევანელოთ“
- „შეიძლება, ცოტა ხანს, უბრალოდ, დავწვეთ და ერთმანეთს ჩავეხუტოთ?“
- „ძალიან მომეწონა და მინდა, მომავალში ისევ ვცადოთ.“
ინტიმურობაში „წარუმატებლობა“ არ არსებობს. საკუთარი სხეულის მოსმენა ყოველთვის გამარჯვებაა.
► ეს არის თქვენი გამოცდილება. თქვენ წყვეტთ როდის, როგორ და რა ტემპით იმოძრაოთ. განურჩევლად იმისა, ნელა და ნაბიჯ-ნაბიჯ დაიწყებთ ყველაფერს თუ მთელი თავით გადაეშვებით პროცესში, ყველაზე მნიშვნელოვანია, რომ თავს კომფორტულად გრძნობდეთ.
წყარო: Healthline