რუსული კანონის საწინააღმდეგო აქციების მონაწილეებსა და მათი ოჯახის წევრებთან უცხოური და ქართული ნომრებიდან დარეკვასა და მუქარას ახალგაზრდა იურისტთა ასოციაცია (საია) ეხმიანება და აცხადებს, რომ ამ ზარების სიხშირის, სისტემურობის, კონკრეტული ნიშნით გამოყოფილ ადრესატთა წრის გათვალისწინებით, შესაძლოა მონაცემთა დამუშავება კანონის დარღვევით, შესაბამისი სახელმწიფო უწყებების ბაზების გამოყენებით ხდება.
“2024 წლის 7 მაისიდან აქტიურად მიმდინარეობს როგორც უცხო სახელმწიფოების, ისე ქართული ნომრებიდან, რუსული კანონის წინააღმდეგ საპროტესტო აქციებში ჩართული პირებისა და უფლებადამცველების (ან მათი ოჯახის წევრების) მისამართით სატელეფონო ზარების მიღება. პასუხის შემთხვევაში, ზარის ავტორი იყენებს სიძულვილის და შეურაცხმყოფელ ენას ზარის ადრესატის მისამართით”, — აცხადებენ ორგანიზაციაში.
საია პერსონალურ მონაცემთა დაცვის ინსპექტორს, ლელა ჯანაშვილსა და, ასევე, ამ საკითხზე სამსახურის შესაბამის პასუხისმგებელ პირებს მოუწოდებენ, შეასრულონ კანონმდებლობით დაკისრებული მოვალეობა; დაინტერესდნენ ამ მოვლენით; კომპეტენციის ფარგლებში შეისწავლონ და საზოგადოებას აცნობონ, სახელმწიფო უწყების, პერსონალურ მონაცემთა დაცვის სამსახურის პოზიცია.
რუსული კანონის საწინააღმდეგო აქციების მონაწილეებსა და მათი ოჯახის წევრებს, რომელთა შორის სამოქალაქო აქტივისტები, ჟურნალისტები და პოლიტიკოსებიც არიან, უკვე მეორე დღეა უცხოური და ქართული ნომრებიდან ურეკავენ, აგინებენ, შეურაცხყოფას აყენებენ და მოკვლით ემუქრებიან.
მათ შორისაა მედია აპრილის ჟურნალისტი, გიორგი ბასხაჯაური, რომელსაც გუშინ, 7 მაისს რამდენჯერმე დაურეკეს უცხო პირებმა, ხოლო დღეს, 8 მაისს —კიდევ ერთხელ. მათ ბასხაჯაურს მისი საცხოვრებელი მისამართი დაუსახელეს და დაემუქრნენ.
”თავიდან მკითხა, ვიცნობ თუ არა ნიკოლოზ და ალექსანდრე ადამიებს. ვკითხე, ვინ კითხულობს-მეთქი და დამიწყო გინება. ჩემი კორპუსი რომ ახსენა, მივხვდი, რომ რაღაც სხვაში იყო საქმე. მაგინა, მეც ვაგინე. როცა ვინაობის დასახელება მოვთხოვე, მითხრა უჩინმაჩინის ქუდით იარე, ვერც კი გაიგებ, ისე გავჩნდები და იქვე “ჩაგპიზდავო”. უკრაინული ნომერი იყო, თუმცა ქართულად საუბრობდა”, — განაცხადა ბასხაჯაურმა გუშინ.
ამასთანავე, დღეს, 8 მაისს გავრცელდა მოქალაქეების პოსტები, რომლებშიც ისინი აღნიშნავენ, რომ მათ ამჯერად მოკვლით ემუქრებიან.
სამოქალაქო და ქვიარ აქტივისტის, თამარ ჯაყელის განცხადებით, უცხო ნომერმა მის დედასაც დაურეკა და შეურაცხყოფა მიაყენა.