დღეს გამართულ ბრიფინგზე აშშ-ის სახელმწიფო დეპარტამენტის პრესმდივანმა, მეთიუ მილერმა შეშფოთება გამოხატა რუსული კანონის საწინააღმდეგო აქციებზე მშვიდობიანი დემონსტრანტების წინააღმდეგ გამოყენებული არაპროპორციული ძალის გამო. ასევე აღნიშნა, რომ აშშ-სა და საქართველოს თანამშრომლობისთვის დრო ჯერ კიდევ არის, თუმცა საამისოდ საჭიროა, საქართველოს ხელისუფლებამ მიმდინარე კურსი შეცვალოს.
„ღრმად ვართ შეშფოთებული კანონპროექტისა და მისი წინ წაწევის წინააღმდეგ გამოსული დემონსტრანტების მიმართ გატარებული ქმედებებით. გვაქვს ინფორმაცია სამოქალაქო საზოგადოების, ოპოზიციური აქტივისტებისა და ჟურნალისტების შევიწროებისა და მათზე ფიზიკური თავდასხმის შესახებ. ჩვენ ვგმობთ ამას და მოვუწოდებთ სრული, დამოუკიდებელი და დროული გამოძიების ჩატარებისკენ.
უკვე 30 წელიწადზე მეტია, საქართველოსთან წარმატებული პარტნიორობა გვაკავშირებს და ვისურვებდით ამის გაგრძელებას. ჯერ კიდევ არის დრო თანამშრომლობისთვის, მაგრამ ამისთვის საჭიროა, რომ საქართველოს ხელისუფლებამ შეცვალოს არსებული კურსი“, — განაცხადა მეთიუ მილერმა.
ჟურნალისტის კითხვაზე, ხომ არ არის დრო, აშშ-ის სახელმწიფო მდივანი უშუალოდ ჩაერთოს მოვლენებში და განაცხადოს „კმარა“, მილერმა უპასუხა: „ჩვენ ნათლად განვაცხადეთ, როგორია ჩვენი პოლიტიკა, და წინასწარ არაფერს ვიტყვი იმ ქმედებებზე, რომლებსაც ამ შენობიდან განვახორციელებთ მომავალში“.
შეგახსენებთ, რამდენიმე კვირის წინ მილერმა აღნიშნა, რომ პოტენციური სანქციებისა თუ სხვა ზომების შესახებ დეპარტამენტი წინასწარ არასდროს არ საუბრობს.
„ჩვენ ძალიან მკაფიოდ განვაცხადეთ, რომ შეშფოთებულები ვართ ამ კანონით და მას ვეწინააღმდეგებით. რაც შეეხება ჩვენს შესაძლო ნაბიჯებს, წინასწარ არაფერს ვიტყვი, თუმცა, აღსანიშნავია, რომ ყოველთვის ასეა — ჩვენ წინასწარ არ ვსაუბრობთ ხოლმე პოტენციურ სანქციებზე ან სხვა ზომებზე, რომლებიც შეიძლება დავაწესოთ“, — თქვა მილერმა.