ეწინააღმდეგება საქართველოს ამბიციებს, გახდეს ევროკავშირის წევრი — ევროპარლამენტარები რუსულ კანონზე

„ჩვენ, ევროპული პარლამენტის ქვემორე ხელის მომწერ წევრებს, ძალიან გვამწუხრებს მმართველი „ქართული ოცნების“ პარტიის მცდელობა, ხელახლა წარადგინოს კანონი „უცხოური აგენტების“ შესახებ, რომელიც შარშან ქართულმა საზოგადოებამ მტკიცედ უარყო მასობრივი პროტესტებით.

 

საქართველოს ევროკავშირის წევრობის კანდიდატის სტატუსი 2023 წლის დეკემბერში მიენიჭა იმ პირობით, რომ კომისიის მიერ დასახელებული პუნქტების განსახორციელებლად რელევანტური ნაბიჯები იქნებოდა გადადგმული. შემოთავაზებული კანონი „უცხოური აგენტების შესახებ“, რომელიც ასევე „უცხოური გავლენის გამჭვირვალობის“ კანონის სახელითაა ცნობილი, არღვევს ამ პუნქტებიდან მინიმუმ ორს: პუნქტი 9, რომელიც ითვალისწინებს, რომ სამოქალაქო საზოგადოება უნდა იყოს ჩართული საკანონმდებლო და პოლიტიკის განმსაზღვრელ პროცესებში და უნდა ოპერირებდეს თავისუფლად; და პუნქტი 1, რომელიც მოითხოვს ევროკავშირისა და მისი ღირებულებების წინააღმდეგ არსებული დეზინფორმაციის წინააღმდეგ ბრძოლას.

 

კანონი „უცხოური აგენტებისა“ თუ „უცხოური გავლენის გამჭვირვალობის“ შესახებ არ შეესაბამება ევროკავშირის ღირებულებებსა და დემოკრატიულ პრინციპებს და ის ეწინააღმდეგება საქართველოს ამბიციებს, გახდეს ევროკავშირის წევრი. ჩვენ მოვუწოდებთ საქართველოს ხელისუფლებას, მისდიოს ევროკავშირის პრაქტიკებს სამოქალაქო საზოგადოების ორგანიზაციების, მათ შორის მედიის, გამჭვირვალობისა და ანგარიშვალდებულების შესახებ, ნაცვლად რუსული და სხვა ავტორიტარული ქვეყნების პრაქტიკებისა, რომელთა მიზანიცაა, აკონტროლოს, შეზღუდოს და, საბოლოოდ, გაანადგუროს სამოქალაქო საზოგადოება და თავისუფალი მედია.

 

ევროკავშირი წლიურად საშუალოდ €100 მილიონით უზრუნველყოფს საქართველოს, ტექნიკური და ფინანსური მხარდაჭერის კუთხით. ჩვენი მხარდაჭერა ფოკუსირდება იმაზე, რომ დაეხმაროს საქართველოს საკვანძო პროევროპული რეფორმების დანერგვაში, მათ შორის ქართველი ხალხის ცხოვრების გაუმჯობესებაში, ბიზნესების მხარდაჭერაში, ეკონომიკური განვითარების ხელშეწყობაში, ინფრასტრუქტურის შენებასა და ხარისხიანი საჯარო სერვისების უზრუნველყოფაში. კანონი „უცხოური აგენტებისა“ თუ „უცხოური გავლენის გამჭვირვალობის“ შესახებ საქართველოს სამოქალაქო საზოგადოების აქტორებს „უცხოურ აგენტებად“ და „ქვეყნის მტრებად“ მონიშნავს, თუკი ისინი ევროკავშირის მხრიდან ისეთივე დაფინანსებას მიიღებენ, როგორსაც საქართველოს მთავრობა იღებს მსგავსი აქტივობებისთვის.

 

ჩვენ მოვუწოდებთ საქართველოს ხელისუფლებას, შეასრულოს თავისი შარშანდელი დაპირება იმასთან დაკავშირებით, რომ ის ხელახლა არ წარადგენდა „უცხოური აგენტების“ კანონს, და ნაცვლად ამისა ინვესტიცია გააკეთოს საქართველოს სამოქალაქო საზოგადოებასთან ინკლუზიურ ურთიერთობაში, რომელმაც უკვე დაამტკიცა, თუ რამდენად ეფექტურად შეუძლია ისეთი რეფორმების დანერგვის მონიტორინგი და მხარდაჭერა, რომლებიც საქართველოს ევროკავშირში ინტეგრაციის წინაპირობა გახდება.

 

ჩვენ ასევე მოვუწოდებთ ევროკომისიას, ყურადღებით დააკვირდეს, თუ რამდენად შეესაბამება საქართველოს ხელისუფლების მხრიდან მსგავსი გადაწყვეტილებები კანდიდატი ქვეყნის სტატუსს, და დროულად შეაფასოს ის. ჩვენ გვესმის და მხარს ვუჭერთ იმ ფაქტს, რომ საქართველოს ევროკავშირში გაწევრიანების რეგრესული პროცესის შემთხვევაში, ევროკომისიას შეიძლება მოუწიოს, რომ დაბრუნდეს გაფართოების პროცესის საწყის პოზიციებზე.

 

საქართველოს ადგილი ევროკავშირშია და ამის მიღწევა მხოლოდ ევროკავშირის ღირებულებებისა და დემოკრატიული პრინციპების დაცვითაა შესაძლებელი, მათ შორის აქტიური სამოქალაქო საზოგადოების არსებობით“.