სახალხო დამცველმა, ლევან იოსელიანმა პარლამენტში გენდერული კვოტების გაუქმების საკითხზე მსჯელობისას ქართული ოცნების დეპუტატის, ბექა ოდიშარიას, სექსისტური და შეურაცხმყოფელი განცხადება დაგმო. ოპოზიციონერი ქალების მხრიდან კრიტიკისას ოდიშარია ფეხზე იდგა და იგინებოდა, შემდეგ კი ერთ-ერთ თანაგუნდელს უთხრა: „ესაა მოუ***ელი ქალების სინდრომი, მოუ***ელის“.
„ჩემთვის აბსოლუტურად მიუღებელია, რაც დღეს პარლამენტში ვიხილე, დაუშვებელია უხამსი და შეურაცხმყოფელი ტერმინების გამოყენება ქალი დეპუტატების მიმართ.
მოვუწოდებ ყველა დეპუტატს, თავი შეიკავოს ქალების დამცირებისა და შეურაცხყოფისგან და დაიცვან ეთიკის მინიმალური სტანდარტები! ეს არავის მატებს ღირსებას!“ — განაცხადა ლევან იოსელიანმა.
მანამდე ომბუდსმენმა უარყოფითად შეაფასა კვოტირების კანონის გაუქმების ინიციატივა და თქვა, რომ დაგეგმილი საკანონმდებლო ცვლილება უგულებელყოფს ქალების მრავალწლიანი ბრძოლის შედეგებს და აუარესებს თანასწორობის მისაღწევად არსებულ მექანიზმებს.
ბექა ოდიშარიას და ქართული ოცნების დეპუტატების ქცევები და განცხადებები დაგმო პრეზიდენტმაც.
„მივმართავ საზოგადოებას, მაგრამ ამავე დროს მივმართავ “ოცნებას” და მათ წარმომადგენლებს: გილოცავთ ბატონებო, რამეთუ ქალები თქვენთან ან აღარ ითვლება, ან თუ ითვლება ისე მოიხსენიებთ, რომ ჯობია, არ მოიხსენიოთ. დაკარგეთ ელემენტარული ქართული ზრდილობა, რაც ძალიან სამწუხარო არის თქვენთვის“, — თქვა პრეზიდენტმა.
გენდერული კვოტების გაუქმებაზე კანონპროექტი გირჩის ინიციირებულია და ცნობილია, რომ მას საპარლამენტო უმრავლესობაც დაუჭერს მხარს. აღსანიშნავია, რომ კვოტები ქართულმა ოცნებამ 2020 წელს მიიღო. ამ კანონპროექტის ინიციატორები საქართველოს პარლამენტის შემდეგი წევრები იყვნენ: არჩილ თალაკვაძე, ირაკლი კობახიძე, ანრი ოხანაშვილი, დავით მათიკაშვილი.
კვოტირების მხარდამჭერი იყო გენდერული თანასწორობის საბჭოს თავმჯდომარე, ნინო წილოსანი. მან გირჩი 2021 წელს ღიად გააკრიტიკა, როდესაც გენდერული კვოტირების პრინციპებს გვერდი აუარეს და მათი სიით, დეპუტატებს შორის, აბსოლუტურად ყველა კაცი აღმოჩნდა. ახლა კი წილოსანი ამბობს, რომ კვოტები „პოზიტიური დისკრიმინაციის ფორმაა, რომელმაც გარკვეულწილად უკვე მიაღწია თავის მთავარ ამოცანას“.
ინიცირებულ ცვლილებებს ქალთა მოძრაობაც გამოეხმაურა და განაცხადა, რომ კვოტირების გაუქმების მსგავსი ინიციატივები არის ბრძოლა არამხოლოდ პოლიტიკოსი ქალების, არამედ ამ ქვეყანაში მცხოვრები ყველა ქალის წინააღმდეგ.