მას შემდეგ, რაც ცნობილი გახდა, რომ ქართული ოცნება 2028 წლის ბოლომდე ევროკავშირთან მოლაპარაკებების გახსნის საკითხს დღის წესრიგში არ დააყენებს, ასევე, უარს ამბობს ყოველგვარ საბიუჯეტო გრანტზე ევროკავშირის მხრიდან ამავე პერიოდამდე, თბილისსა და რეგიონებში უწყვეტი საპროტესტო აქციები დაიწყო.
ძალოვანი უწყებების მხრიდან მშვიდობიანი აქციების ძალადობრივი დაშლისა და დარბევის, მოქალაქეების გატაცების, ცემისა და დაკავებების შემდეგ, საპროტესტო ტალღა უფრო მასშტაბური გახდა და, ქუჩების გარდა, მოიცვა საგანმანათლებლო დაწესებულებები, სამუშაო სივრცეები, საჯარო თუ კერძო სექტორი. საპროტესტო ტალღა შეეხო წინასაახალწლოდ დაგეგმილ ღონისძიებებსაც.
“Fabrika-ში მოქმედი ბიზნეს სუბიექტების გადაწყვეტილებით, ყოველწლიური საშობაო ბაზრობა უქმდება”, “საშობაო ბაზრობა შატო მუხრანმაც გააუქმა” — გასულ კვირაში ეს და მსგავსი განცხადებები კეთდებოდა მსხვილი, საშუალო და მცირე ბიზნესის წარმომადგენლების მხრიდან ერთმანეთის მიყოლებით. კომერსანტის ინფორმაციით, მერიის მიერ ორგანიზებულ საახალწლო ბაზრობებზე უარი ოფიციალურად 300-ზე მეტმა ბიზნესმა თქვა.
ბევრი მეწარმისთვის წინასაახალწლო სავაჭრო პერიოდი ბიზნესის შესანარჩუნებლად გადამწყვეტია და ბაზრობაში მონაწილეობაზე უარი მათ ფინანსურად აზარალებს.
ამ კომპანიების მხარდასაჭერად ონლაინ სივრცეში გაჩნდა პლატფორმა, რომელიც მეწარმეებს ევროპული ახალი წლისთვის გააერთიანებს. ვებგვერდის სახელია: happyeuyear.ge.
“მიგვაჩნია, რომ წელს დედაქალაქის ქუჩებში პროტესტის ხმა ყველგან უნდა ისმოდეს. ასეულობით მეწარმემ ქვეყანაში მიმდინარე უწყვეტი პროტესტის მხარდასაჭერად უარი თქვა მერიის მიერ ორგანიზებულ საშობაო ბაზარში მონაწილეობასა და წლის ყველაზე მნიშვნელოვან სავაჭრო პერიოდში შემოსავლის მიღებაზე, ჩვენ კი ისინი პლატფორმა Happy EU Year-ზე გავაერთიანეთ”, — წერია ვებ-გვერდის საინფორმაციო ველში.
ტკბილეული, საბავშვო, სამკაულები, სათამაშოები, ტანსაცმელი, დეკორი, ჩანთები, ღვინო და სხვა — პლატფორმაზე სულ 12 კატეგორიაა და ამ ეტაპისთვის 120-ზე მეტი მეწარმეა დარეგისტრირებული, თუმცა სია განახლებადია და მსურველებს კვლავ შეუძლიათ ბიზნესის დარეგისტრირება ამ ფორმის შევსებით.
“პლატფორმის დახმარებით, შეგიძლიათ კატეგორიების მიხედვით მარტივად შეარჩიოთ საახალწლო საჩუქრები თქვენი საყვარელი ადამიანებისთვის და სოლიდარობა გამოუცხადოთ ამ მეწარმეების პროტესტს. მხოლოდ ერთად დგომით შევძლებთ დავიბრუნოთ თავისუფალი, დემოკრატიული და სამართლიანი ახალი წელი”, — ვკითხულობთ Happy EU Year-ის ვებგვერდზე.