დღეს ევროკომისია გააკეთებს შეთავაზებას, რომ შეაჩეროს ევროკავშირისა და საქართველოს შეთანხმების ნაწილი ვიზის გაცემის გამარტივების შესახებ. მანამდე, 16 დეკემბერს, ევროკავშირის უმაღლესმა წარმომადგენელმა საგარეო საქმეთა და უსაფრთხოების საკითხებში, კაია კალასმა, საგარეო საქმეთა მინისტრების სხდომის შემდეგ გამოაცხადა, რომ ქართული დიპლომატიური პასპორტებისთვის უვიზო მიმოსვლა შეჩერდებოდა.
თუკი საბჭო მიიღებს ამ შეთავაზებას, ქართველ დიპლომატებს, ოფიციალურ პირებსა და მათ ოჯახებს, რომლებიც ფლობენ დიპლომატიურ და ოფიციალურ პასპორტებს, ევროკავშირში მოგზაურობისთვის დასჭირდებათ ვიზა 90 დღემდე ხანმოკლე ვიზიტისთვის ნებისმიერი 180-დღიანი პერიოდის განმავლობაში.
საქართველოს დიპლომატიური და ოფიციალური პასპორტების მფლობელებზე ასევე აღარ გავრცელდება სავიზო რეჟიმის გამარტივების გზები, როგორებიცაა განაცხადის მოკლე დროში განხილვა, დაბალი სავიზო მოსაკრებელი და ნაკლები დამხმარე დოკუმენტის წარდგენის საჭიროება.
ეს გადაწყვეტილება უარყოფითად არ იმოქმედებს ადამიანთა შორის კონტაქტებზე, რადგან საქართველოს მოქალაქეები, რომლებსაც ჩვეულებრივი პასპორტი აქვთ, კვლავ ისარგებლებენ უვიზო რეჟიმით ევროკავშირში ხანმოკლე ვიზიტით მოგზაურობისას.
„ახლა უკვე საბჭომ უნდა მიიღოს გადაწყვეტილება დღევანდელი შეთავაზების შესახებ, რომ ნაწილობრივ შეჩერდეს სავიზო რეჟიმის გამარტივების შეთანხმება. თუკი საბჭო მიიღებს ამ შეთავაზებას და როდესაც ის ძალაში შევა, წევრი ქვეყნები ვალდებულნინ იქნებიან, მიიღონ შესაბამისი ზომები. ეს ნიშნავს, რომ გულწრფელი თანამშრომლობის პრინციპის მიხედვით, ისინი ვალდებულნი იქნებიან, სავიზო მოთხოვნა დაუწესონ საქართველოს დიპლომატიური, სამსახურებრივ/ოფიციალური და სპეციალური პასპორტების მფლობელებს და ამ ზომების შესახებ შეატყობინონ კომისიის სხვა წევრ სახელმწიფოებს. გარდა ამისა, წევრ ქვეყნებს მოუწევთ, შეწყვიტონ დიპლომატიური და ოფიციალური პასპორტების ქართველი მფლობელებისთვის უკვე არსებული გამარტივების მექანიზმის გამოყენება, როგორებიცაა განაცხადის განხილვის მოკლე დრო, დაბალი სავიზო მოსაკრებლები და ნაკლები დამხმარე დოკუმენტების წარდგენის შესაძლებლობა“, — წერია ევროკომისიის პრესრელიზში.
როგორც ევროკომისიის განცხადებაშია აღნიშნული, ეს შეთავაზება არის პასუხი იმ ძალადობრივ რეპრესიებზე, რომლებსაც საქართველოს ხელისუფლება იყენებს მშვიდობიანი დემონსტრანტების, პოლიტიკოსებისა და დამოუკიდებელი მედიის წინააღმდეგ, რაც დაიწყო მას შემდეგ, რაც ხელისუფლებამ 28 ნოემბერს გამოაცხადა, რომ აღარ აპირებს ევროკავშირთან მოლაპარაკებების გახსნას 2028 წლამდე.
ევროკომისია ასევე აღნიშნავს, რომ რუსული და სიძულვილის კანონები ძირს უთხრის ფუნდამენტურ უფლებებს, რომლებიც ევროკავშირის ღირებულებების საძირკველია. ფუნდამენტური უფლებების დაცვა, მათ შორის ანტიდისკრიმინაციული პოლიტის ეფექტური დანერგვა, აუცილებელია მოთხოვნაა ვიზალიბერალიზაციის მისანიჭებლად.