9 არასამთავრობო ორგანიზაცია ერთობლივ განცხადებას ავრცელებს და მოუწოდებს სპეციალური საგამოძიებო სამსახურის უფროსს, კოკა კაციტაძეს, წარმოადგინოს ინფორმაცია 16-17 აპრილს სამართალდამცავების მიერ ძალის გადამეტებაზე. ამასთან, ორგანიზაციები ჟურნალისტების მიმართ ფიზიკურ ანგარიშსწორებას საგანგაშოდ მიიჩნევენ.
“24 საათზე მეტი გავიდა, რაც 2024 წლის 16-17 აპრილს რუსული კანონის წინააღმდეგ მიმდინარე აქციის დაშლისას საპოლიციო ძალები ფიზიკურად გაუსწორდნენ მშვიდობიანი დემონსტრანტების ნაწილს. საჯარო წყაროებზე დაყრდნობით იდენტიფიცირებულია სულ მცირე 10-ზე მეტი შემთხვევა, რომელიც სპეციალური საგამოძიებო სამსახურის მიერ არის გამოსაძიებელი, მათ შორის, 3 ადამიანი ჰოსპიტალიზებულია მიღებული დაზიანებების გამო. გარდა ამისა, სახალხო დამცველის ცნობით, 17 აპრილს პოლიციის მხრიდან პარლამენტის წევრის ალექსანდრე ელისაშვილის მიმართ განხორციელდა სავარაუდო არასათანადო მოპყრობა.
ამ დრომდე უცნობია, თუ რა არის სპეციალური საგამოძიებო სამსახურის პოზიცია, დაიწყო თუ არა გამოძიება ან რა საგამოძიებო მოქმედებები ჩატარდა. საზოგადოებას შევახსენებთ, რომ სპეციალური საგამოძიებო სამსახური შექმნილია, როგორც დამოუკიდებელი სახელმწიფო ორგანო, რომელიც სამართალდამცავების მიერ ჩადენილ დანაშაულებს იძიებს. არსებითად მნიშვნელოვანია სპეციალურმა საგამოძიებო სამსახურმა მყისიერი ნაბიჯების გადადგმით აჩვენოს საზოგადოებას, რომ საპოლიციო ძალების მიერ ღირსების შემლახავი ქმედებები არ იქნება შეწყნარებული სახელმწიფო ინსტიტუტების მიერ”, — აღნიშნულია განცხადებაში.
ორგანიზაციები ჟურნალისტების მიმართ ფიზიკურ ანგარიშსწორებასაც ეხმიანებიან და აცხადებენ, რომ იმგვარი ღონისძიებები, რომლებითაც ჟურნალისტებს ხელი ეშლებათ სამუშაო პროცესში, საერთაშორისო სტანდარტებს არღვევს.
“საგანგაშოა, რომ, გარდა დემონსტრანტებისა, 16 აპრილის ღამის საათებში პარლამენტის მიმდებარე ტერიტორიაზე ფიზიკურად გაუსწორდნენ მედიის წარმომადგენლებსაც, რომლებიც ადგილზე სამსახურებრივ მოვალეობას ასრულებდნენ. მსგავსი ღონისძიებები, რომლებითაც ჟურნალისტებს ხელი ეშლებათ სამუშაო პროცესში, არღვევს საერთაშორისო სტანდარტებს, მათ შორის, ადამიანის უფლებათა ევროპული კონვენციის მე-10 მუხლით დაცულ გამოხატვის თავისუფლებას, ჟურნალისტისათვის პროფესიულ საქმიანობაში უკანონოდ ხელის შეშლა კი, ასევე, არის სისხლის სამართლის დანაშაული”, — აღნიშნულია განცხადებაში.
ორგანიზაციები სპეციალურ საგამოძიებო სამსახურის უფროსს, კოკა კაციტაძეს მოუწოდებენ, დაუყოვნებლივ გააკეთოს განცხადება და სწორი სამართლებრივი შეფასება მისცეს საპოლიციო ძალების წარმომადგენელთა მხრიდან აქციის მიმდინარეობისას აქციის მონაწილეების და ჟურნალისტების მიმართ განხორციელებულ ძალადობრივ ქმედებებს; ასევე, მაღალი საზოგადოებრივი ინტერესიდან გამომდინარე საზოგადოებას მიაწოდოს ინფორმაცია გამოძიების დაწყებისა და ჩატარებული საგამოძიებო მოქმედებების შესახებ.
ხელმომწერი ორგანიზაციები:
- საქართველოს ახალგაზრდა იურისტთა ასოციაცია (GYLA)
- საერთაშორისო გამჭვირვალობა – საქართველო (TI)
- საქართველოს დემოკრატიული ინიციატივა (GDI)
- უფლებები საქართველო (RG)
- სამართლიანი არჩევნებისა და დემოკრატიის საერთაშორისო საზოგადოება (ISFED)
- პარტნიორობა ადამიანის უფლებებისთვის (PHR)
- სამოქალაქო საზოგადოების ფონდი (CSF)
- ქალთა ინიციატივების მხარდამჭერი ჯგუფი (WISG)
- ინფორმაციის თავისუფლების განვითარების ინსტიტუტი (IDFI)
რუსული კანონის საწინააღმდეგო აქციაზე 16 აპრილს სპეცრაზმელებმა მშვიდობიანი მოქალაქეების წინააღმდეგ წიწაკის სპრეი გამოიყენეს და ფიზიკურად გაუსწორდნენ, მათ შორის, ჟურნალისტებს, რომლებიც პროფესიულ მოვალეობას ასრულებდნენ. ნაცემია როგორც მედია აპრილის ჟურნალისტი, გიორგი ბასხაჯაური, ასევე, პუბლიკისა და ტაბულას ჟურნალისტები, ალექსანდრე ქეშელაშვილი და გიორგი ბადრიძე. ასევე, ცნობილია, რომ დაშავებულებს შორის არის სირცხვილიას აქტივისტი მარიამ დოლიძე და პარლამენტარი ალეკო ელისაშვილი, რომელსაც ნეკნი აქვს გატეხილი.