ვატიკანის დოქტრინული ოფისის განცხადების თანახმად, ტრანსგენდერ ადამიანებს შეუძლიათ რომაულ-კათოლიკურ ეკლესიაში მოინათლონ. ასევე, გახდნენ ნათლიები და საქორწინო მოწმეები.
განცხადება რწმენის დოქტრინის დიკასტერიამ გუშინ, 8 ნოემბერს გაავრცელა. ის ბრაზილიელ ეპისკოპოსის, ხოსე ნეგრი სანტო ამაროს კითხვებს ეხმიანებოდა, რომლებითაც მან ვატიკანს მიმართა. ეპისკოპოსი დაინტერესებული იყო, შეეძლო თუ არა ერთსა და იმავე სქესიან წყვილს ნაშვილები ან სუროგაციის მეშვეობით გაჩენილი ბავშვის ნათლობა რომაულ-კათოლიკურ ეკლესიაში აღესრულებინა.
კითხვა-პასუხის 3-გვერდიან დოკუმენტს ხელს დეპარტამენტის ხელმძღვანელი, არგენტინელი კარდინალი, ვიქტორ მანუელ ფერნანდესი აწერს და ის დამტკიცებულია რომის პაპის ფრანცისკეს მიერ.
განცხადებაში აღნიშნულია, რომ ტრანსგენდერ ადამიანებს შეუძლიათ იყვნენ, როგორც ნათლიები, ადგილობრივი მღვდლის შეხედულებისამებრ, ასევე მოწმეები ქორწილში. თუმცა, მღვდელმა უნდა გამოიჩინოს “პასტორალური წინდახედულობა” ამ გადაწყვეტილების მიღებისას.
საპასუხოდ კითხვაზე, შეიძლება თუ არა ტრანსგენდერი ადამიანების მონათვლა, დოქტრინული ოფისი აღნიშნავს, რომ ტრანსგენდერ ადამიანებს შეუძლიათ მონათვლა, გარკვეული პირობების გათვალისწინებით, სანამ არ არსებობს “საზოგადოებრივი სკანდალის ან მორწმუნეთა დეზორიენტაციის გამოწვევის რისკი”.
დოკუმენტში აღნიშნულია, რომ ერთსა და იმავე სქესიან ურთიერთობაში მყოფ პირებს შეუძლიათ იყვნენ მოწმეები ქორწილში. ეს კი განმარტებულია ეკლესიის მიმდინარე კანონიკური კანონმდებლობით, რომელიც არ შეიცავს მსგავს აკრძალვას. ამასთან, განცხადება დასძენს, რომ ამ ადამიანებმა “რწმენის შესაბამისი ცხოვრებით” უნდა იცხოვრონ.
მიუხედავად იმისა, რომ განცხადების ზოგიერთი ნაწილი ბუნდოვანი ხასიათისაა, მას დადებითი გამოხმაურება მოჰყვა ქვიარ აქტივისტებსა და რელიგიურ წრეებს შორის.
“ტრანსგენდერი ადამიანების აღქმა, არა როგორც მხოლოდ ადამიანებისა, არამედ როგორც კათოლიკეებისა (ეკლესიაში, რომელშიც ზოგი ამბობს, რომ ტრანსგენდერი ადამიანები სინამდვილეში არ არსებობენ), მნიშვნელოვანი წინგადადგმული ნაბიჯია ეკლესიაში”, — წერს მამა ჯეიმს მარტინი, ცნობილი იეზუიტი მღვდელი და ლგბტ უფლებების მხარდამჭერი.
ლგბტ ადამიანთა უფლბების ადვოატირების ორგანიზაცია GLAAD-ის პრეზიდენტის, სარა ქეით ელისის განცხადებით, პაპი ფრანცისკე იმ ბარიერების ჩამოშლას განაგრძობს, რომლებმაც ლგბტქ კათოლიკეები რომის კათოლიკური ეკლესიის წევრების სრულფასოვან მონაწილეობას ჩამოაცილა და ამის ნაცვლად, მსოფლიო ლიდერებს მოუწოდებს, შექმნან კეთილგანწყობილი და მეტად მიმღებელი ადგილები ლგბტქ ადამიანებისთვის.
“რომის პაპის ბოლო ლგბტქ აღიარება ცალსახა მესიჯს უგზავნის პოლიტიკურ და კულტურულ ლიდერებს მთელს მსოფლიოში, რომ დაასრულონ მათი დევნა და ტრანსგენდერი ადამიანების გარიყვა/გამორიცხვა”, — აცხადებს ელისი.
რომის პაპის ფრანცისკესა და ვატიკანის ეს ნაბიჯი, რომ რომაულ-კათოლიკური ეკლესია მეტად ინკლუზიური სივრცე გახადონ, პირველი არაა. 86 წლის პაპმა საჯაროდ აღნიშნა, რომ ერთსა და იმავე სქესის მიზიდულობა ცოდვა არ არის. ასევე, მიმდინარე წლის 2 ოქტომბერს ფრანცისკემ განაცხადა, რომ ზოგიერთ კათოლიკე მღვდელს შეუძლია, ერთი და იმავე სქესის ადამიანების კავშირი დალოცოს. პაპმა ასეთი გადაწყვეტილება კათოლიკური ეკლესიის ისტორიაში პირველად მიიღო.
წყაროები: