“Glory to Ukraine! Glory to Georgia! Fu*k Russia” — ისმის ომახიანი შეძახილი და მილენიალებისა და Gen Z-სთვის თანაბრად საყვარელი სიმღერის, World in my eyes-ის მისამღერი იწყება. თუ უკვე აღიღინდი, ესე იგი ბოლო დროის ერთ-ერთ ყველაზე პოპულარულ TikTok ტრენდს კარგად იცნობ და არაერთი ვიდეო გაქვს ნანახი, სადაც დროშებით, აირწინაღებით და ფერადი საწვიმრებით შემოსილი გოგო-ბიჭები ჩანან.

მუსიკა იცვლება, ახლა კიდევ უფრო ომახიანად და ხმამაღლა ისმის “გაუმარჯოს, გაუმარჯოს, ჩვენს სამშობლოს გაუმარჯოს”. კადრებში იმავეს ხედავ — ფერად ხალხს, რომელიც ხმამაღლა აპროტესტებს, ქუჩა-ქუჩა დადის, ორიგინალურ პოსტერებს აფრიალებს. და უცებ, თითქოს არაფერ შუაშია ისე, უფრო მინორული, მაგრამ რიტმული მელოდია ანაცვლებს სიტყვებით: “სევდა ჰყვება თავის სევდას”. ახლა კადრებში წეროებს, წრეში ბურთს, ჯეირანს და კიდევ ათასგვარ თამაშს ხედავ.

არ გაგიკვირდეს, ეს მხოლოდ შენი TikTok ფიდი არ არის, ეს უკვე თბილისის ქუჩების “ფლეილისთია”. უფრო ზუსტად, არამხოლოდ თბილისის — ყველა იმ ქალაქისა და ქუჩის, სადაც საპროტესტო აქციები იმართება და ხალხის მდინარე მიედინება. ამ მასალაში სწორედ იმ სიმღერებზე ვისაუბრებთ, რომლებიც აქციის მონაწილეებმა განსაკუთრებით შეიყვარეს და პროტესტის ჰიმნებად აქციეს.

ჯგუფი ყველა — სამშობლო

ჯგუფი ყველას ეს სიმღერა უკვე 10 წლისაა და აქამდეც არაერთ ფესტივალსა თუ აქციაზე გვიმღერია ერთად, მაგრამ არსად იმხელა მუხტითა და ენერგიით, როგორც რუსთაველზე. მიუხედავად იმისა, გვაქვს თუ არა მაღალი ტემბრი იმისთვის, რომ “შავ ზღვაზე” ნოტი სწორად დავიჭიროთ, ეს სიმღერა უკვე ყველასია და ყველას გვიხდება.

ირაკლი ჩარკვიანი — საქართველო

აქციებზე “საქართველოს” ყოველ 5 წუთში ერთხელ ვსკანდირებთ, მაგრამ ჩარკვიანის რიტმით ნათქვამი “საქართველო” სულ სხვანაირად ჟღერს. ალბათ, იმიტომ, რომ ყველამ ვიცით “მოვიდა დრო, რომ კიდევ ერთხელ მოვერიოთ თავს”.

ნიაზ დიასამიძე — გაუმარჯოს

შეიძლება, პირდაპირი გაგებით მიწას არ ვდარაჯობთ და სამხედროს ფორმა არ გვაცვია, მაგრამ რუსული კანონის მოწინააღმდეგეებიმა ზუსტად ვიცით, რომ მშვიდობას და სამშობლოს ვიცავთ. ამ სიმღერის წყალობით, ოდესღაც ბანალურ სადღეგრძელოდ ქცეული “საქართველოს გაუმარჯოს”, ახლა სულ სხვანაირად ჟღერს.

ბაკური ბურდული — საქართველო

“ჩვენი გრძნობები აალდებიან დღეს” — ამ სიტყვებით ვიწყებთ ღიღინს და ვცდილობთ მომდევნო ფრაზები გავიხსენოთ. შესაძლოა, სრული ტექსტი არ ვიცოდეთ, თუმცა იმ ნაწილს სულმოუთქმელად ველით, სადაც “გამარჯვება სულ უფრო ახლოს ჩანს” და იმასაც, სადაც ერთხმად ვყვირით: “და ეს სიტყვები სულ გვინდა ვიმღეროთ: ჩვენ სულ ერთად ვართ, ჩვენ ვართ საქართველო”.

მე ვარ საქართველო

ამ სიმღერის რიტმებზე აყოლა აქციებამდე დავიწყეთ, როცა ისტორიაში პირველად ჩვენი ეროვნული ნაკრები ფეხბურთის ევროპის ჩემპიონატზე მოხვდა. ამ სიმღერასთან ერთად, იმ დღეებიდან შეძახილიც შემოვინახეთ: “სად მივდივართ? — ევროპაში”.

LIO with ILA – IAWO

არ ვიცი, ვინ და რატომ გადაწყვიტა, რომ ეს სიმღერა აქციების კადრებს მოუხდებოდა, მაგრამ არ შემცდარა და როგორც ერთ-ერთმა მომხმარებელმა აღნიშნა, უკვე თავისუფლებისთვის ბრძოლასთან ასოცირდება.

ფსკერი | ძუკი & ბაძუ – ძუნწი ბიძინა

ამის გაპოპულარულების მიზეზს ახსნა ნამდვილად არ სჭირდება.

Qaji Todia – PARTIA

ამ ტრეკის პირველი წუთების მოსმენისას თქვენს გვერდით მდგომი ადამიანების გაოცებული მზერა თუ შენიშნეთ, არ გაგიკვირდეთ. შესავალი ბევრისთვის მტკივნეულ გამოცდილებასთან ასოცირდება. ავტორის მიზანიც სწორედ იმ საბჭოთა წარსულის გახსენება და შესაბამისი შეფასებაა.

მერაბ სეფაშვილი — ზღაპრის ბოლო კეთილია

ეს კიდევ ერთი სიმღერაა, რომელიც ნაკრების გულშემატკივრობისას ხელს გამოვაყოლეთ და საპროტესტო აქციების ჰიმნად ვაქციეთ. მიუხედავად იმისა, რომ იყო მცდელობა, ამისთვის ხელი შეეშალათ, არ გამოვიდა, რადგან ზღაპრის ბოლო ამ შემთხვევაშიც კეთილია.

“Stand Up” — Performed by Cynthia Erivo

Harriet-ის საუნდტრეკი, რომელიც ჩვენს ხალხთან ერთად ბრძოლაზე გვიამბობს, ყველამ ნამდვილად არ ვიცით სრულად, თუმცა მისამღერი ვისწვლეთ და სულისკვეთებაც ვიგრძენით.

The Hanging Tree

The Hunger Games-ში დიქტატურის წინააღმდეგ მებრძოლი კეტნის ევერდინის ნამღერი The Hanging Tree არამხოლოდ ქართული, არამედ მსოფლიო საპროტესტო აქციების სიმბოლოდ იქცა.

MAO — FU

განსაკუთრებულ ყურადღებას იმსახურებს ბოლო პერიოდში გამოსული ნამუშევრები, რომელიც მიმდინარე მოვლენებს ეხმაურება. მაოს მთელი ტექსტი ჯერ ვერ დავიზეპირეთ, თუმცა ეს ნამდვილად არ გვავიწყდება: “ფუ მოგი**ან რომანტიკა და აეროდინამიკა”.

Outsider — გამოდი

როცა რობი კუხიანიძე მუსიკალური “ქამბექით” გარეთ გასვლისკენ მოგვიწოდებს, 2 სიტყვაც კი საკმარისია, რომ სიმღერამ ქართულ საპროტესტო ჰიმნებში ღირსეული ადგილი დაიმკვიდროს.

LOUDspeakers — როგორ გავძლებთ აქ?

ამ სიაში მოხვედრას LOUDspeakers-ის არაერთი მუსიკა იმსახურებს, მაგრამ დღეს ყურადღებას ამაზე გავამახვილებთ, რომელიც სულ რამდენიმე დღისაა და თან იმიტომაცაა განსაკუთრებული, რომ ჯგუფი იშვიათად გვანებივრებს ქართულენოვანი ნამუშევრებით.

Stephane — შენ თუ ასე მოგინდება

და ბოლოს, მაგრამ არა მნიშვნელობის მიხედვით, სტეფანეს ახალი სიმღერა, რომლის დასასრულს ჩნდება ერთდროულად პესიმისტური, მაგრამ მაინც იმედიანი კითხვა: “მამულო საყვარელო, შენ როსღა აყვავდები”.