საფრანგეთის იუსტიციის მინისტრი კანონმდებლებს ხვდება, რათა თანხმობის გარეშე სექსი განისაზღვროს, როგორც გაუპატიურება, ამის შესახებ გამომცემლობა POLITICO წერს.
გაუპატიურების ლეგალური განმარტების შეცვლა ფრანგმა სენატორმა, მელანი ვოგელმა პირველად თითქმის ერთი წლის წინ შესთავაზა კანონმდებლებს. თუმცა საბოლოოდ, ამ რეფორმაზე დისკუსიას წინ უძღოდა ცნობა დანაშაულის შესახებ, რომელმაც ფრანგი საზოგადოება ღრმად შეაშფოთა.
საფრანგეთი პრაქტიკულად მთელ მსოფლიოსთან ერთად ადევნებდა თვალყურს ჟიზელ პელიკოს გაუპატიურების საქმეს. როგორც სასამართლოს წინაშე წარდგენილი მტკიცებულებებით ირკვევა, 71 წლის პენსიონერი, ჟიზელ პელიკო 10 წლის განმავლობაში სექსუალური ძალადობის მსხვერპლი იყო.
ბრალდების მიხედვით, ჟიზელის უკვე ყოფილი ქმარი, დომინიკ პელიკო ნარკოტიკული საშუალებებით წლების განმავლობაში აძინებდა მას, ონლაინ უკავშირდებოდა უცნობ კაცებს, რომლებიც უგონოდ მყოფ ჟიზელს აუპატიურებდნენ. ძალადობის აქტს პელიკოს ყოფილი მეუღლე ესწრებოდა და იღებდა. ბრალი პელიკოს ყოფილი ქმრის გარდა, ათობით კაცს ედება, რომელთა ასაკიც 22-დან 67 წლამდე მერყეობს.
ბრალდებულების ნაწილის მტკიცებით, ისინი ფიქრობდნენ, რომ “შეთანხმებულ სექსუალურ თამაშში” და “წყვილის მიერ გაზიარებულ ფეტიშში” მონაწილეობდნენ. ბრალდებულების ადვოკატებმა დაცვის მხარე სწორედ იმ ფაქტზე ააგეს, რომ გაუპატიურების საკანონმდებლო განმარტებაში ნათლად არ არის ჩაწერილი თანხმობის მიღების საჭიროება ყველა მხრიდან.
ფრანგული კანონმდებლობა ამ ეტაპისთვის გაუპატიურებას განმარტავს, როგორც “სექსუალური პენეტრაციის ნებისმიერი აქტს, ან ორალურ-გენიტალურ აქტს ჩადენილს… ძალადობით, იძულებით, მუქარით, ან მოულოდნელობით”.
“ჩადენის განზრახვის გარეშე, არ არსებობს გაუპატიურება” — ამტკიცებდა პროცესზე ექვსი ბრალდებულის ადვოკატი. “საფრანგეთში განზრახვის დადასტურება აუცილებელია” — აღნიშნავდა ის.
როგორც ფრანგი სენატორი — მელანი ვოგელი POLITICO -ს ეუბნება, თუნდაც მცდელობა ამ დეტალის, როგორც დაცვის ტაქტიკის გამოყენების, ხაზს უსვამს გაუპატიურების განმარტების ცვლილების აუცილებლობას და თანხმობის ჩამატებას.
“პროცესის მედია გაშუქებამ და ასევე ბრალდებულების ადვოკატის დაცვის ტაქტიკამ აჩვენა, რომ ეს არის ნაკლი და დღეს საზოგადოება აღარ აიტანს მსგავს ხარვეზს” — ამბობს ვოგელი.
POLITICO-ს თანახმად, ვოგელის თანამოაზრე კანონმდებლობაში ცვლილების შეტანაზე საფრანგეთის იუსტიციის მინისტრი, დიდიე მიგოა. ჯერ კიდევ სექტემბრის თვეში მიგომ განაცხადა, რომ მომხრეა კანონის გადაწერის, თუმცა არ დაუზუსტებია დეტალები, თუ როგორი იქნება ეს ცვლილებები.
საფრანგეთში ამ თემაზე დისკუსია გრძელდება. საკითხით დაინტერესებული პირები ხაზგასმით აღნიშნავენ, რომ პელიკოს სასამართლო პროცესი გადამწყვეტი მომენტი იქნება იმ მხრივ, თუ როგორ აღიქვამს საფრანგეთი ქალთა მიმართ ძალადობას.
წყარო: POLITICO