კლუბი ბასიანის განცხადებით, ქართულ საზოგადოებასა და მოწყვლად ჯგუფებს, პირველ რიგში, სჭირდებათ დაცვა უთანასწორო, გულგრილი და არაადამიანური სოციალური და ეკონომიკური პოლიტიკისგან, რომელმაც მოსახლეობის უდიდესი ნაწილი ტანჯვისთვის გაწირა და ქვეყნიდან გაქცევა აიძულა. ასე ეხმაურება კლუბი ქართული ოცნების ჰომოფობიურ ინიციატივას. ბასიანი ხაზს უსვამს, რომ ამგვარი კანონი პირველად რუსეთში შეიქმნა და მისი მიღება მხოლოდ რამდენიმე ქვეყანაში გახდა შესაძლებელი, რომელსაც ულტრამემარჯვენე, ფაშისტური მთავრობები მართავენ.
“ჰომოფობიური ინიციატივა წარმოადგენს პირდაპირ, აგრესიულ შეტევას ქვიარ ადამიანებზე, რომლებიც წლების განმავლობაში განიცდიან ინსტიტუციონალიზებულ ზეწოლას პოლიტიკური და რელიგიური ისტებლიშმენტის მიერ, რომლებიც ხელოვნურად აღვივებენ კონფლიქტებს, საზოგადოებრივი ჯგუფების დაყოფისა და ამ გზით, მათზე სრული კონტროლის მოპოვების მიზნით. ეს არის ხელისუფლების ამაო მცდელობა, ჩაახშოს ყველა კრიტიკული ხმა.
კანონი სრულად ზღუდავს ადამიანის ფუნდამენტურ უფლებებს, მათ შორის გამოხატვისა და შეკრების თავისუფლებას, აწესებს ცენზურას საჯარო და თავისუფალი სახელოვნებო საქმიანობის ფაქტობრივად ყველა სფეროზე. საფრთხის ემუქრება საკლუბო კულტურას, ქვიარ წვეულებებსა და ბოლო წლების განმავლობაში შექმნილ დრეგ კულტურას, რომელიც თანამედროვე ქართული ალტერნატიული კულტურის მონაპოვარია. საზოგადოებრივი მორალისა და ოჯახის ღირებულებების დაცვის მოტივით ამ კანონის მიღება არის პოპულისტური აბსურდი. ქართულ საზოგადოებას და მოწყვლად ჯგუფებს დღეს დაცვა სჭირდებათ პირველ რიგში უთანასწორო, გულგრილი და არაადამიანური სოციალური და ეკონომიკური პოლიტიკისგან, რომელმაც მოსახლეობის უდიდესი ნაწილი ტანჯვისთვის გაწირა და ქვეყნიდან გაქცევა აიძულა, და რომლის შემქმნელიც არის დღეს ჩვენს ქვეყანაში არსებული პოლიტიკური კლასი”, — აღნიშნავენ ბასიანში.
კლუბის განცხადებაში ასევე ვკითხულობთ, რომ 2023 წლის მარტის აქციები, როდესაც ხალხის რისხვამ ხელისუფლებას რუსული კანონის მიღების შესაძლებლობა არ მისცა, უნდა იყოს გაკვეთილი მათთვის, ვინც მუდმივად ცდილობს, უგულებელყოს ჩვენი მტკიცე და ურყევი მიზანი, შექმნას თავისუფლებაზე, თანასწორობასა და სოლიდარობის იდეებზე დაფუძნებული საზოგადოება.
“ხელისუფლება კიდევ ერთხელ ცდილობს, ქვეყნის პოლიტიკური და კულტურული გარემო რუსულ რეპრესიულ მეთოდებს დაუქვემდებაროს. მოვუწოდებთ ხელისუფლებას და პარლამენტის წევრებს, უარი თქვან საკონსტიტუციო ცვლილების მიღებასა და განხორციელებაზე, რომლის მიღებას, გვჯერა, რომ ჩვენი საზოგადოება არ დაუშვებს”, — აღნიშნავენ კლუბში და იმედს გამოთქვამენ, რომ საზოგადოება უკომპრომისოდ დაუდგება ქვიარ ადამიანებს გვერდში ამ მძიმე დროს და გამოხატავს სოლიდარობას, “რომელიც ახლაც, როგორც ყოველთვის, ყველაზე დიდი ძალაა რეპრესიული სისტემის შესაჩერებლად”.
ქართულმა ოცნებამ ჰომოფობიური ინიციატივა წარადგინა, რომელიც საკონსტიტუციო ცვლილებებსაც ითვალისწინებს. მამუკა მდინარაძის თქმით, გაიწერება “ოჯახურ ღირებულებათა და არასრულწლოვანთა დაცვის გარანტიები”, რის შემდეგაც, ახლო მომავალში დააინიცირებენ უფრო კონკრეტულ ცვლილებებს, რომელიც რამდენიმე ათეულ კანონს მოიცავს.
ვრცლად ამ თემაზე წაიკითხეთ: ქართული ოცნების ჰომოფობიური ინიციატივა საკონსტიტუციო ცვლილებებსაც ითვალისწინებს — დეტალები