შინაგან საქმეთა სამინისტროს ცნობით, რუსთავში ოჯახის ორი წევრის მიმართ დამამძიმებელ გარემოებაში ჩადენილი განზრახ მკვლელობის ბრალდებით 1997 წელს დაბადებული გ.ფ. დააკავეს.
“გამოძიებით დადგინდა, რომ ბრალდებულმა ქალაქ რუსთავში, დუმბაძის ქუჩაზე, მეუღლე, 2003 წელს დაბადებული მ.ს. და მეუღლის დედა, 1976 წელს დაბადებული ი.ბ. თოფიდან გასროლით მოკლა”, — აღნიშნულია განცხადებაში.
უწყების ცნობით, სამართალდამცველებმა გ.ფ. შემთხვევის ადგილზე დააკავეს. პოლიციამ დანაშაულის ჩადენის იარაღი — სანადირო თოფი ნივთმტკიცებად ამოიღო.
შსს-ის ინფორმაციით, ოჯახის ორი წევრის მიმართ დამამძიმებელ გარემოებაში ჩადენილ განზრახ მკვლელობის ფაქტზე გამოძიება საქართველოს სისხლის სამართლის კოდექსის 11 პრიმა 109-ე მუხლის “კ” და “ლ” ქვეპუნქტებით მიმდინარეობს. დანაშაული 16-დან 20 წლამდე ან უვადო თავისუფლების აღკვეთას ითვალისწინებს.