პრეზიდენტი სალომე ზურაბიშვილი ევროკავშირში გაწევრიანების პროცესის შეჩერებაზე პასუხისმგებლობას მთავრობას აკისრებს და აცხადებს, რომ ეს არის პასუხი მათ უგუნურ, მტრულ პოლიტიკასა და ანტიდასავლურ რიტორიკასა და ქმედებაზე.
“ახლა ნიშნის მოგების დრო არაა, მხოლოდ დიდი წუხილის. აშშ-ის მიერ წვრთნების გაუქმებას მოჰყვა ევროკავშირის გადაწყვეტილება თავდაცვის ძალებისთვის გამიზნული 30 მილიონი ევროს გაყინვა.
ეს პასუხია ამ ხელისუფლების ანტიევტოპულ და ანტიდასავლურ რიტორიკასა და ქმედებაზე. პასუხი იმაზედაც, რომ მათი ყველა რჩევა თუ გაფრტხილება დარჩა რეაგირების გარეშე: თუნდაც სიმბოლურად ერთი — არაფრისთვის და არავისთვის საჭირო რუსული კანონის უკან გაწვევა ან გაყინვა”, — წერს ზურაბიშვილი.
პრეზიდენტი აღნიშნავს იმასაც, რომ ამის საპირწონედ ხელისუფლებისა და მისი რუპორებისგან ისმის, რომ მაინც შევალთ ევროკავშირში და უტიფრად ამტკიცებენ იმასაც, თითქოს წვრთნები ორივე ქვეყნის სასარგებლოდ ტარდებოდა. პრეზიდენტი ხაზს უსვამს, რომ ეს ძალიან მძიმე გზავნილები ჩვენი უახლოესი მეგობრებისგან ყურადსაღებია.
“მართალია, ეს პასუხია მმართველი პარტიის უგუნურ და მტრულ პოლიტიკაზე მათ მიმართ. ამავე დროს, გაფრთხილებაა საზოგადოებისთვის. ჩვენი პარტნიორები გვეუბნებიან, რომ “არჩევანი თქვენია” ევროპული, დაცული მომავლის მქონე და იზოლირებულ, რუსეთის ორბიტაზე გადასულ საქართველოს შორის. გვეუბნებიან, რომ ეს კანონები და ეს არამეგობრული ქცევა თავსებადი არაა ევროპულ და ამერიკულ აქამდე უწყვეტ მხარდაჭერასთან. ან, ან!
ეს იმათთვის, ვინც ჯერ კიდევ ჯიურად და უარგუმენტოდ იმეორებს ზემოდან ნაკარნახებ კითხვას — “რატომაა ეს კანონი რუსული?” რატომ?… და იმიტომ”, — წერს ზურაბიშვილი.
საქართველოს ევროკავშირში გაწევრიანების პროცესი ამჟამად გაჩერებულია. ამის შესახებ ევროკავშირის ელჩმა განაცხადა და განმარტა, რომ გადაწყვეტილება EU-ს წევრი ქვეყნის ლიდერებმა 10 დღის წინ, 27 ივნისს გამართულ ევროპული საბჭოს ბოლო სხდომაზე მიიღეს.
გარდა ამისა, ევროკავშირმა შეაჩერა 30-მიოლიონიანი მხარდაჭერა ევროპული სამშვიდობო ფონდიდან და სიტუაციის შემდგომი გაუარესების შემთხვევაში სხვა ზომების მიღებასაც განიხილავს. ელჩმა აღნიშნა, რომ საქართველოში მოვლენების ნეგატიურ განვითარებას ხედავენ, მათ შორის, სამოქალაქო საზოგადოების დაშინებას და დეზინფორმაციას ევროკავშირის ღირებულებების შესახებ.
“თვეების განმავლობაში ჩვენ ვაგზავნიდით მკაფიო სიგნალს, რომ თუკი კანონი [უცხოური გამჭვირვალობის შესახებ / რუსული კანონი] მიღებული იქნებოდა, ამას მოჰყვებოდა შედეგები. კანონი მიღებული იქნა და დადგა შედეგების დრო. მინისტრები ასევე შეთანხმდნენ, რომ შეცვალონ ფინანსური მხარდაჭერა, რომელსაც ჩვენ ვუწევდით საქართველოს ყველა მთავრობას და ახლა ეს დახმარება წავიდეს სამოქალაქო საზოგადოებისა და თავისუფალი მედიისკენ.
როგორც იცით, ჩვენი ფინანსური მხარდაჭერა საქართველოს მთავრობისადმი იყო 10-ჯერ მეტი, ვიდრე სამოქალაქო საზოგადოებისადმი, ამ ცვლილებების პირველი მსხვერპლი იქნება საქართველოს თავდაცვის ძალები. ეს ჩვენთვის განსაკუთრებით გულსატკენია, რადგან მე ყოველთვის ვცდილობდი და ვმუშაობდი იმ მიმართულებით, რომ საქართველო ევროპული სამშვიდობო ფონდის ერთ-ერთი მსხვილი ბენეფიციარი ყოფილიყო. ყველაზე საწყენი ის არის, რომ ეს ფინანსური დახმარება ყოველწლიურად იზრდებოდა, ახლა კი შეჩერდა. მაგრამ ეს მხოლოდ პირველი ნაბიჯია და იქნება შემდგომი ნაბიჯებიც. ჩვენ არ გვინდა, რომ ვანანოთ სამოქალაქო საზოგადოებას, არ გვინდა რომ ვანანოთ ქართველ ხალხს და ჩვენი ბევრი პროგრამა მიმართულია ყველაზე დაუცველი ჯგუფებისკენ”, — განაცხადა ჰერჩინსკიმ.
