ქართული ოცნების დეპუტატი და გენდერული თანასწორობის საბჭოს თავმჯდომარე, ნინო წილოსანი აცხადებს, რომ ბექა ოდიშარიას შეურაცხმყოფელი განცხადება უხამსი შინაარსისაა და ბოდიშს იხდის მის გამო.
“ძალიან სამწუხაროა და წარმოუდგენელი ფორმულირება არის. ვერაფერს ვერ ვიტყვი. ბოდიშს ვიხდი ჩემი კოლეგის ნაცვლად”, — განუცხადა მან მთავარ არხს.
ჟურნალისტის კითხვაზე, რა რეაგირება ექნება ეთიკის საბჭოს, წილოსანმა განაცხადა რომ ეს მისი კომპეტენცია არ არის. ხოლო კითხვაზე, რა უნდა იყოს რეაგირება, ასე უპასუხა:
“რეაგირების მექანიზმები ყველა დეპუტატს შეუძლია, თავისით გამოიყენოს, ამიტომ, რა თქმა უნდა, შეუძლიათ, რომ გამოიყენონ. კიდევ ერთხელ, ძალიან ვწუხვარ ამ ძალიან უხამსი კომენტარის გამო”.
როგორც მთავარი არხი წერს, თავად ოდიშარიამ განაცხადა, რომ არავის მითითებით ბოდიშს არ მოიხდის.
“ჩემი აღშფოთება დაკავშირებული იყო და ის არ იყო დამისამართებული არც ერთი კონკრეტული ფიზიკური პირის მიმართ – არც ქალის, არც კაცის და მათ შორის, თქვენ ვერ ნახავთ სადმე, რომ მე რომელიმე კონკრეტული სახელი, ან გვარი, ან ჩემი კოლეგა მითუმეტეს ვახსენე. თქვენი მითითებით ბოდიშს არ მოვიხდი”, — ციტირებს დეპუტატს მთავარი არხი.
დღეს, 3 მარტს პარლამენტში გენდერული კვოტების გაუქმების საკითხზე მსჯელობისას, ოპოზიციონერი ქალების მხრიდან კრიტიკისას ოდიშარია ფეხზე იდგა და იგინებოდა, შემდეგ კი ერთ-ერთ თანაგუნდელს უთხრა: „ესაა მოუ***ელი ქალების სინდრომი, მოუ***ელის“
სახალხო დამცველმა, ლევან იოსელიანმა სექსისტური და შეურაცხმყოფელი განცხადება დაგმო.
„ჩემთვის აბსოლუტურად მიუღებელია, რაც დღეს პარლამენტში ვიხილე, დაუშვებელია უხამსი და შეურაცხმყოფელი ტერმინების გამოყენება ქალი დეპუტატების მიმართ.
მოვუწოდებ ყველა დეპუტატს, თავი შეიკავოს ქალების დამცირებისა და შეურაცხყოფისგან და დაიცვან ეთიკის მინიმალური სტანდარტები!”, — თქვა იოსელიანმა.
ბექა ოდიშარიას და ქართული ოცნების დეპუტატების ქცევები და განცხადებები გააკრიტიკა პრეზიდენტმაც.
„მივმართავ საზოგადოებას, მაგრამ ამავე დროს მივმართავ “ოცნებას” და მათ წარმომადგენლებს: გილოცავთ ბატონებო, რამეთუ ქალები თქვენთან ან აღარ ითვლება, ან თუ ითვლება ისე მოიხსენიებთ, რომ ჯობია, არ მოიხსენიოთ. დაკარგეთ ელემენტარული ქართული ზრდილობა, რაც ძალიან სამწუხარო არის თქვენთვის“, — თქვა პრეზიდენტმა.
გენდერული კვოტების გაუქმებაზე კანონპროექტი გირჩის ინიციირებულია და ცნობილია, რომ მას საპარლამენტო უმრავლესობაც დაუჭერს მხარს. აღსანიშნავია, რომ კვოტები ქართულმა ოცნებამ 2020 წელს მიიღო. ამ კანონპროექტის ინიციატორები საქართველოს პარლამენტის შემდეგი წევრები იყვნენ: არჩილ თალაკვაძე, ირაკლი კობახიძე, ანრი ოხანაშვილი, დავით მათიკაშვილი.
კვოტირების მხარდამჭერი იყო გენდერული თანასწორობის საბჭოს თავმჯდომარე, ნინო წილოსანი. მან გირჩი 2021 წელს ღიად გააკრიტიკა, როდესაც გენდერული კვოტირების პრინციპებს გვერდი აუარეს და მათი სიით, დეპუტატებს შორის, აბსოლუტურად ყველა კაცი აღმოჩნდა. ახლა კი წილოსანი ამბობს, რომ კვოტები „პოზიტიური დისკრიმინაციის ფორმაა, რომელმაც გარკვეულწილად უკვე მიაღწია თავის მთავარ ამოცანას“.
ინიცირებულ ცვლილებებს ქალთა მოძრაობაც გამოეხმაურა და განაცხადა, რომ კვოტირების გაუქმების მსგავსი ინიციატივები არის ბრძოლა არამხოლოდ პოლიტიკოსი ქალების, არამედ ამ ქვეყანაში მცხოვრები ყველა ქალის წინააღმდეგ.
დღეს პარლამენტმა ცვლილებები პირველი მოსმენით მიიღო.