არასამთავრობო ორგანიზაციები ერთობლივ განცხადებას ავრცელებენ, რომელშიც სპეციალურ საგამოძიებო სამსახურს მოუწოდებენ, მაქსიმალურად მოკლე დროში გამოიძიოს პოლიციელთა მიერ ჩადენილი სავარაუდო დანაშაულები, ხოლო — პოლიციას, შეწყვიტოს გამოხატვისა და შეკრების თავისუფლებაში უკანონო ჩარევა, უკანონო დაკავებები და მოქალაქეებზე ფიზიკური ძალადობა.
განცხადებაში აღნიშნულია, რომ გუშინ, 16 აპრილს, პოლიციამ 13 მშვიდობიანი ადამიანი დააკავა. ამასთან, ქართული არასამთავრობო ორგანიზაციები, დაკავებულებს მთელი ღამის განმავლობაში იზოლატორებში ეძებდნენ, ხვდებოდნენ მათ, ესაუბრებოდნენ და მათი უფლებების დარღვევის ფაქტებს აღწერდნენ. დაკავებულთა უმეტესობას ფიზიკური დაზიანების ნიშნები აქვს, ხოლო 3 მათგანი ამჟამად ჰოსპიტალიზებულია.
“ისინი [ჰოსპიტალიზებული მოქალაქეები] აცხადებდნენ, რომ მიუხედავად დაკავებისა თუ დაზიანებისა, გააგრძელებენ ბრძოლას რუსული კანონის წინააღმდეგ, საქართველოს ევროპული მომავლისთვის. კიდევ ერთხელ ვაცხადებთ, რომ ჩვენ ვიცავთ და დავიცავთ ყველა დაკავებულის უფლებას. ჩვენ ვემსახურებით ქართველ ხალხს. არც ერთი ადამიანი, რომელიც კანონიერად სარგებლობს გამოხატვის თავისუფლებით, არ დარჩება სამართლებრივი მხარდაჭერის გარეშე. არა რუსულ კანონს!” — აღნიშნულია განცხადებაში.
ხელმომწერი ორგანიზაციები:
- საქართველოს ახალგაზრდა იურისტთა ასოციაცია (GYLA)
- საერთაშორისო გამჭვირვალობა – საქართველო (TI)
- სოციალური სამართლიანობის ცენტრი (SJC)
- საქართველოს დემოკრატიული ინიციატივა (GDI)
- უფლებები საქართველო (RG)
- სამართლიანი არჩევნებისა და დემოკრატიის საერთაშორისო საზოგადოება (ISFED)
- ადამიანის უფლებათა ცენტრი (HRC)
- პარტნიორობა ადამიანის უფლებებისთვის (PHR)
- სამოქალაქო საზოგადოების ფონდი (CSF)
რუსული კანონის საწინააღმდეგო აქციაზე გუშინ, 16 აპრილს სპეცრაზმელებმა მშვიდობიანი მოქალაქეების წინააღმდეგ წიწაკის სპრეი გამოიყენეს და ფიზიკურად გაუსწორდნენ, მათ შორის, ჟურნალისტებს, რომლებიც პროფესიულ მოვალეობას ასრულებდნენ. ნაცემია როგორც მედია აპრილის ჟურნალისტი, გიორგი ბასხაჯაური, ასევე, პუბლიკისა და ტაბულას ჟურნალისტები, ალექსანდრე ქეშელაშვილი და გიორგი ბადრიძე. ასევე, ცნობილია, რომ დაშავებულებს შორის არის სირცხვილიას აქტივისტი მარიამ დოლიძე.