ენის შემსწავლელმა აპლიკაციამ, Duolingo-მ რუსეთში წაშალა ლგბტქ რეპრეზენტაციის გამომხატველი ყველა ტერმინი მას შემდეგ, რაც კრემლმა გააფრთხილა, რომ მსგავსი შინაარსის მქონე კონტენტის გამოქვეყნება “ექსტრემიზმის აქტად” ჩაითვლებოდა.
როსკომნადზორმა, რუსეთის კომუნიკაციების მარეგულირებელმა, პიტსბურგში დაფუძნებულ კომპანიას განუცხადა, რომ მათ “არატრადიციული სექსუალური ურთიერთობების” ხელშემწყობი მასალები და “ლგბტ პროპაგანდა” უნდა წაეშალათ.
როგორც რუსული გამოცემები იუწყებიან, Duolingo-მ საპასუხოდ რუსეთის კომუნიკაციების მარეგულირებელს წერილი გაუგზავნა, რომელშიც დაადასტურა, რომ მათ “არატრადიციული სექსუალური ურთიერთობების ხელშემწყობი მასალები” თავიანთი სასწავლო აპლიკაციიდან უკვე ამოიღეს.
“ჩვენ მხარს ვუჭერთ LGBTQ+ უფლებებს და გვჯერა ლგბტქ+ რეპრეზენტაციის ნორმალიზებისა ჩვენს კონტენტში. სამწუხაროდ, რუსეთში არსებული ადგილობრივი კანონმდებლობა გარკვეული კონტენტის ჩართვას გვიკრძალავს”, — განაცხადა აპლიკაციის ერთ-ერთმა წარმომადგენელმა NY Post-თან საუბრისას.
მისივე განცხადებით, Duolingo-ს მისიაა, გააფართოოს ხარისხიან განათლებაზე ხელმისაწვდომობა მთელს მსოფლიოში და აპლიკაციის წარმომადგენლობა მზადაა, შეინარჩუნონ წვდომა მათ პროდუქტზე ყველგან, სადაც ამის გაკეთება ლეგალურია.
რუსეთში ლგბტქია+ თემის უფლებები უკიდურესად შეზღუდულია და ეს გააძლიერა “ლგბტ პროპაგანდის საწინაღმდეგო” კანონმაც, რომელიც გასულ წელს კიდევ უფრო გამკაცრდა. კანონის ძალაში შესვლის შემდეგ რუსეთის სასამართლომ უკვე წაუყენა ბრალი და დააჯარიმა ონლაინ ფილმების ის დისტრიბუტორები, რომლებმაც “ლგბტ პროპაგანდის” კანონი დაარღვიეს. 2023 წლის 30 კი ნოემბერს უზენაესმა სასამართლომ არარსებული “ლგბტ ადამიანების საერთაშორისო საზოგადოებრივი მოძრაობა” ექსტრემისტულად ცნო და მათი სიმბოლიკის გამოყენება აკრძალა. ვინაიდან, მსგავსი ორგანიზაციის შესახებ არანაირი ინფორმაცია არ იძებნება, ექსპერტები ფიქრობენ, რომ ადამიანის უფლებათა ნებისმიერი მოძრაობა და აქტივისტები, რომლებიც იყენებენ LGBTQ+ სიმბოლოებს, აკეთებენ შემოწირულებებს ან სხვაგვარად მხარს უჭერენ თემს, სისხლისსამართლებრივი დევნის რისკის ქვეშ არიან. მათივე შეფასებით, სწორედ ასე აიღო სტარტი ვლადიმერ პუტინის საარჩევნო კამპანიამ.
პუტინი წლების განმავლობაში ახდენს ლგბტქია+ თემის სტიგმატიზაციას, დისკრიმინაციას. “პროპაგანდასთან” ბრძოლის სახელით, თემის წევრებს დევნიან, ჩაგრავენ, “გარყვნილების”, ოჯახისა და მორალის მოწინააღმდეგეების იარლიყს აკრავენ. რუსეთის ხელისუფლება ლგბტქია+ უფლებებს დასავლეთთან ბრძოლის ინსტრუმენტად იყენებს და აქტიურად აწარმოებს დეზინფორმაციული პროპაგანდას, თითქოს დასავლეთი ლგბტქია+ უფლებების ადვოკატირების გზით ტრადიციებს ებრძვის.
რამდენიმე თვის წინ, სწორედ საარჩევნო წელს “პროპაგანდასთან” ბრძოლის სახელით ჰომოფობიური კანონი წარადგინა საქართველოს ხელისუფლებამაც. კანონპროექტი ითვალისწინებს ჯარიმებს ადმინისტრაციულ სამართალდარღვევათა კოდექსით და პატიმრობას — სისხლის სამართლის კოდექსით. “ლგბტ პროპაგანდა” ან მისი “მუშაობის” დამადასტურებელი რაიმე მტკიცებულება არ არსებობს და ვინც საწინააღმდეგოს ამტკიცებს, საქართველოში რუსული დეზინფორმაციული პროპაგანდის გავრცელებას ცდილობს, რომლის მიზანიც LGBTQIA+ ადამიანების წინააღმდეგ აგრესიისა და სიძულვილის ჩამოყალიბება და ნამდვილი პრობლემებიდან მოსახლეობის ყურადღების გადატანაა. ასე რუსული პროპაგანდა ცდილობს ქვიარები წარმოაჩინოს საშიშებად, “გარყვნილებად” და საზოგადოებიდან გარიყოს. აქვე, მნიშვნელოვანია აღინიშნოს, რომ თუ მოქალაქეს რაღაცისგან დაცვას ჰპირდები, ეს რაღაც უნდა იყოს უარყოფითი, სახიფათო. შესაბამისად, გარდა იმისა, რომ “ლგბტ პროპაგანდა” არ არსებობს, თავად ეს ტერმინი დისკრიმინაციული და ჰომოფობიურია.
ამ თემაზე მეტის გასაგებად წაიკითხეთ მედია აპრილის სტატიები: