საქართველოს პროკურატურამ თერჯოლის ერთ-ერთი სოფლის სკოლის პედაგოგს ბრალი სისხლის სამართლის კოდექსის 151-ე პრიმა მუხლის პირველი ნაწილით წარუდგინა — ადევნება, რომელმაც დაზარალებულის ფსიქიკური ტანჯვა და ძალადობის გამოყენების შიში გამოიწვია.
გამოძიების თანახმად, თერჯოლის ერთ-ერთ სოფელში საჯარო სკოლის პედაგოგი თავის კოლეგასთან სისტემატურად ამყარებდა არასამსახურებრივ და არასასურველ კომუნიკაციას 2 წლის განმავლობაში, 2021 წლიდან 2023 წლამდე პერიოდში.
“კერძოდ, ბრალდებული დაზარალებულს დაჟინებით სთხოვდა სქესობრივ ურთიერთობას და კატეგორიული უარის მიუხედავად, მასთან დაახლოების მცდელობებს მაინც განაგრძობდა. დაზარალებული იძულებული გახდა მნიშვნელოვნად შეეცვალა ცხოვრების ჩვეული წესი და სამსახურიდან ხანგრძლივ უხელფასო შვებულებაში გასვლის შესახებ გადაწყვეტილება მიეღო”, — აღნიშნულია პროკურატურის განცხადებაში.
უწყება მოითხოვს, რომ ბრალდებულს აღკვეთის ღონისძიების სახით, თანამდებობიდან გადაყენება და პატიმრობა შეეფარდოს. ამასთან, აცხადებს, რომ ფაქტის შესწავლისა და შესაბამისი სამართლებრივი ზომების გატარების მიზნით, განათლების, მეცნიერებისა და ახალგაზრდობის სამინისტროს შესაბამის რესურსცენტრს მიმართავს.