“ჯერ კიდევ შემოდგომაზე, თბილისი პრაიდის გუნდმა მივიღეთ გადაწყვეტილება, რომ ამ ზაფხულს ფიზიკური ღონისძიებები არ დაგვეგეგმა”, — აღნიშნულია თბილისი პრაიდის განცხადებაში. ორგანიზაციის თქმით, წინასაარჩევნო ზაფხულში ხელისუფლების მიერ წახალისებული ფიზიკური ძალადობის, სიძულვილისა და ზიზღის შემცველი რიტორიკის მოლოდინის გამო მიიღეს გადაწყვეტილება.
“ახლა, ივნისის თვეში, მას შემდეგ, რაც “ქართულმა ოცნებამ” მიიღო რუსული კანონი და დააანონსა სიძულვილზე დაფუძნებული ანტი-ლგბტქ საკანონმდებლო პაკეტი, საკონსტიტუციო ცვლილებების პარალელურად, ჩვენს გადაწყვეტილებაში კიდევ უფრო დარწმუნებული ვართ. ჩვენ ვიჩენთ უმაღლეს სამოქალაქო პასუხისმგებლობას და ვაცნობიერებთ, რომ დღეს ქვიარ უფლებებისთვის ბრძოლა განუყოფელია საერთო სახალხო ბრძოლისგან რუსული რეჟიმის წინააღმდეგ. ეს ბრძოლა კი აუცილებლად ხალხის სასიკეთოდ დასრულდება 26 ოქტომბერს”, — ვკითხულობთ განცხადებაში.
თბილისი პრაიდი აცხადებს, რომ შემდეგ თვეებს გამოიყენებენ იმისთვის, რომ ქვიარ ადამიანების სათქმელი კიდევ უფრო მეტი ადამიანის გულამდე მიიტანონ, ვიდრე ოდესმე და ყველას აუხსნიან, რომ ჰომოფობია რუსული პოლიტიკური იარაღია ქართული საზოგადოების, საქართველოს სახელმწიფოებრიობის წინააღმდეგ.