„თბილისი პრაიდი“ საქართველოში მოქმედი ქვიარ ორგანიზაციაა, რომელიც ლგბტქ+ ადამიანებისთვის თანასწორი და თავისუფალი გარემოს შექმნაზე მუშაობს თემის გამოწვევების პოლიტიკურ დღის წესრიგში დაყენების, თემის გაძლიერებისა და საზოგადოებრივი აზრის ცვლილების გზით. დასახული მისიისა და მიზნების მისაღწევად თბილისი პრაიდი მთავარ ინსტრუმენტად ხილვადობის პოლიტიკას იყენებს.
წარმოგიდგენთ თბილისი პრაიდის 2023 წლის დეკემბრის მიმოხილვას:
- „ამაყი ოჯახების“ გასვლითი ტრენინგი — პროექტს შეუერთდა 15-მდე ახალი მშობელი, რომლებმაც მონაწილეობა მიიღეს 3-დღიან გასვლით ტრენინგში. ტრენინგი მოიცავდა თერაპიულ სესიებს ფსიქოლოგებთან ერთად და საგანმანათლებლო სესიებს ლგბტქი აქტივისტების მონაწილეობით — ახალმა მშობლებმა გაიცნეს ერთმანეთი, გააზიარეს საკუთარი გამოცდილებები და გაიგეს მეტი LGBTQI+ საკითხებზე.
- რეგიონული აქტივისტების გასვლითი შეხვედრა — ორგანიზაციამ დაიწყო ლგბტქი საკითხებით დაინტერესებული რეგიონალური აქტივისტების ქსელის მშენებლობა. ერთ-ერთი პირველი ნაბიჯი 9 რეგიონიდან 20-მდე აქტივისტის შეკრება იყო. შეხვედრაზე შეფასდა რეგიონებში არსებული რეალობა, თითოეულ რეგიონში ლგბტქი საკითხებთან მიმართებით არსებული გამოწვევები, შესაძლებლობები და რესურსები.
- The Drag Ball – All Stars — 29 დეკემბერს „თბილისი პრაიდმა“ დრეგ ბოლის საინიციატივო ჯგუფთან ერთად კიდევ ერთ, წლის შემაჯამებელ ღამეს უმასპინძლა, რომელსაც 1700-მდე სტუმარი დაესწრო. ღონისძიება Creams-მა და Kordz-მა გახსნეს, მეჯლისის დაწყებამდე კი სტუმრებმა ნანი ბრეგვაძის ვიდეომიმართვა იხილეს.
- სათემო შეხვედრები — ორგანიზაციამ დეკემბერში 2 სათემო შეხვედრა გამართა: ტრივია საღამო და საშობაო ქვიარ ფილმის ჩვენება.