საქართველოს დემოკრატკული ინიციატივის (GDI) იურისტის, გიორგი ტაბატაძის ინფორმაციით, რუსული კანონის საწინააღმდეგო აქციაზე დაკავებულები სასტიკად არიან ნაცემები, ერთ ადამიანს კი ტვინის შერყევა აქვს.
“დაკავებულები არიან სასტიკად ნაცემები. შემოვიარეთ იზოლატორები პოლიციის დაწესებულებები და მათ უმრავლესობას ვერ ვპოულობთ. ერთერთი ვიპოვე ახლა საავადმყოფოში, ტვინის შერყევა აქვს და საშინლად ნაცემია. არ მიშვებენ სანახავად. პოლიციის ნებართვაა საჭიროო. ადამიანებს მასობრივად ურღვევენ დაცვის უფლებას. ადვოკატს არ ახვედრებენ”, – წერს ის Facebook-ზე და ადვოკატთა ასოციაციასა და სახალხო დამცველს რეაგირებისკენ მოუწოდებს.
რუსული კანონის საწინააღმდეგო აქციაზე სპეცრაზმელები მოქალაქეებს ფიზიკურად გაუსწორდნენ, მათ შორის, ჟურნალისტებს, რომლებიც პროფესიულ მოვალეობას ასრულებდნენ. ნაცემია მედია აპრილის ჟურნალისტი გიორგი ბასხაჯაური, ასევე, პუბლიკისა და ტაბულას ჟურნალისტები, ალექსანდრე ქეშელაშვილი და გიორგი ბადრიძე. ასევე, ცნობილია, რომ დაშავებულებს შორის არის სირცხვილიას აქტივისტი მარიამ დოლიძე.