სპეციალურმა საგამოძიებო სამსახურმა ყოფილი ცოლის მიმართ ჯანმრთელობის დაზიანების მუქარის ფაქტზე შინაგან საქმეთა სამინისტროს სასაზღვრო პოლიციის თანამშრომელი დააკავა.
უწყების ცნობით, როგორც გამოძიებით დადგინდა, ბრალდებული “ეჭვიანობის ნიადაგზე”, ცოლის მიმართ აგრესიას გამოხატავდა, სიტყვიერ შეურაცხყოფას აყენებდა და სამსახურისათვის თავის დანებებას სთხოვდა. სწორედ ამის საფუძველზე დაზარალებული ქალი ბრალდებულ კაცთან განქორწინდა.
სპეციალურ საგამოძიებო სამსახურში აცხადებენ, რომ 2024 წლის 24 ივლისს, ღამის საათებში, ქობულეთის მუნიციპალიტეტის ერთ-ერთი სოფელში, საავტომობილო გზაზე, ბრალდებული ყოფილ ცოლს მანქანით დაედევნა და შეჩერება მოსთხოვა.
“ავტომანქანაში მყოფ დაზარალებულთან მივიდა და პირსინგის ახევით და ჯანმრთელობის დაზიანებით დაემუქრა, რის შემდეგაც ქალს მუქარის განხორციელების საფუძვლიანი შიში გაუჩნდა”, — აღნიშნულია საგამოძიებო სამსახურის განცხადებაში.
უწყების ინფორმაციით, გამოძიება დაზარალებული ქალის მიმართვის შედეგად დაიწყეს.
“გამოიკითხა დაზარალებული, დაზარალებულის ოჯახის წევრები და საქმესთან შემხებლობაში მყოფი სხვა პირები, ჩატარებული იქნა საგამოძიებო ექსპერიმენტი და მოპოვებული იქნა დანაშაულში მამხილებელი სხვა მტკიცებულებები, რის შემდეგაც სასამართლოს განჩინების საფუძველზე სამართალდამცავი დაკავებული იქნა”, — აცხადებენ უწყებაში.
სპეციალური საგამოძიებო სამსახური საქმეზე გამოძიებას საქართველოს სისხლის სამართლის კოდექსის 11 პრიმა 151-ე მუხლის მე-2 ნაწილის “დ” ქვეპუნქტით აგრძელებს. დანაშაული 3 წლამდე თავისუფლების აღკვეთას ითვალისწინებს.