“არც იოცნებონ! საუბრები, გადატრიალება, შევარდნა, გამოვარდნა… გადატრიალდნენ, გადმოტრიალდნენ საკუთარ ოფისებში თუ უნდათ და დაანებონ პარლამენტსა და სახელმწიფო უწყებების შენობებს თავი”, — ასე ეხმაურება შინაგან საქმეთა მინისტრი, ვახტანგ გომელაური სახელმწიფო უსაფრთხოების მიერ გავრცელებულ ინფორმაციას “რევოლუციური სცენარის” შესახებ. აღსანიშნავია, რომ ხელისუფლების პროპაგანდისტული მედიის მიერ გავრცელებულ არც ერთ ჩანაწერში არ ჩანს “რევოლუცირი” სცენარი და ადამიანები განიხილავენ აქციის სამომავლო გეგმებს.
გომელაურის თქმით, ფარული ჩანაწერების საკითხზე დაიწყება გამოძიება და დადგინდება ავთენტურობა.
“თუ ჩვენი ქვემდებარე იქნება, ჩვენ დავიწყებთ ამ საკითხზე მოკვლევას ან თუ გამოიკვეთა დანაშაულის ნიშნები — გამოძიებას. ავთენტურობა დასადგენია. არ მინდა პირდაპირ მტკიცებულების ფორმაში ვთქვა, რომ ეს ასეა ნამდვილად. რასაც ვისმენდით, საშინელებაა. ჩვენ პირდაპირ ეთერებში ვნახეთ, რას აკეთებდნენ, აქედან გამომდინარე ზუსტი ინფორმაციაა. პირველი შემთხვევა არაა, სამწუხაროდ”, — აცხადებს გომელაური.
შს მინისტრი ასევე ამტკიცებს, რომ პირველი მაისის ღამეს, აქციის დარბევისას, მათ აქციის მშვიდობიანი მონაწილეების წინააღმდეგ რეზინის ტყვიები არ გამოუყენებიათ. აღსანიშნავია, რომ არსებობს ტყვიებისა და დაზარალებული მოქალაქეების კადრები.
“იმ დღეს არ გვისვრია, რა თქმა უნდა, განცხადება გავაკეთეთ, თუმცა, სრული უფლება გვაქვს, კანონიერი, ეს გამოვიყენოთ”, — დასძინა გომელაურმა.
მან ჟურნალისტებთან საუბრისას კიდევ ერთხელ განაცხადა, რომ საპოლიციო ძალები გადამზადებულები არიან ევროპის სხვადასხვა ქვეყანასა და აშშ-ის სხვადასხვა დანაყოფთან ერთად. გომელაურმა ხაზი გაუსვა, რომ პოლიცია გაწვრთნილი და აღჭურვილია იმგვარად, როგორც — ევროპულ ქვეყნებში. მისი თქმით, შსს-წყლის ჭავლის, გაზის, მხუთავი აირის, წიწაკის სპრეისა თუ რეზინის ტყვიების გამოყენების კანონიერი უფლება აქვს, თუმცა მინისტრის მტკიცებით, უწყებას ბოლო წლების განმავლობაში აქციებზე საკუთარი შესაძლებლობების 20%-იც არ გამოუყენებია.
“მოვუწოდებ ამ ბავშვების მშობლებს, გამოხატონ, სიტყვის თავისუფლება ჩვენთან დაცულია, აქცია ჩაატარონ, თუმცა არ უნდა გადავიდნენ ზღვარს. მაქსიმალურად ვცდილობთ, რომ ამ ბავშვებს გავუფრთხილდეთ. ქართველები არ ვართ ბევრი, ცოტა ვართ ძალიან და ეს ჩვენი ახალგაზრდობაა და მაქსიმალურად ვცდილობთ, გავუფრთხილდეთ და არ გამოვიყენოთ ის საშუალებები, რისი გამოყენებაც შეგვიძლია კანონით. მერწმუნეთ, ბოლო წლების განმავლობაში 20%-იც არ გამოგვიყენებია”, — განაცხადა გომელაურმა.
გომელაური ასევე აცხადებს, რომ უწყებამ მოქალაქეებზე თავდასხმის ფაქტებზე გამოძიება დაიწყო. ის ჟურნალისტებს მხოლოდ “ცალ მხარეს ყოფნასა” და მხარდაჭერაში ადანაშაულებს.
“გამოძიება გუშინ მყისიერად დავიწყეთ ყველა ფაქტზე, რაც მოხდა და მივყვებით გამოძიებას. ვნახავთ, რა იყო, რა მოხდა, ვინ დაესხა თავს. არ შემიძლია პირდაპირ ვილაპარაკო, ან ეს მოხდა, ან ის. თავდასხმა მოხდა, სამწუხაროდ, ადამიანებმა მიიღეს დაზიანებები, დაწყებულია გამოძიება […] რა თქმა უნდა, არავის მოსწონს ძალადობა – არც პოლიციელზე, არც ოპოზიციონერზე, არც მოქალაქეებზე, რომელსაც მომიტინგეები ახორციელებდნენ. არც ჟურნალისტებზე. მე არ მინახავს თქვენს ეთერში, რაც “პოსტივის“ ჟურნალისტს გაუკეთეს დაგეგმოთ და გამოსულიყავით და გეთქვათ, “ბატონო ვახტანგ, არ გრძნობ პასუხისმგებლობას, რომ ჟურნალისტზე [ზეწოლა იყო]”. მარტო ცალ მხარეს ნუ ხართ. ყველანაირ თავდასხმას ვგმობ”. — განაცხადა გომელაურმა.