მედია აპრილის ფოტორეპორტიორ ვახო ქარელს შინაგან საქმეთა სამინისტრო 26 იანვარს გზის გადაკეტვას ედავება. ვახო ქარელი ამ და სხვა აქციებზეც ასრულებდა და ასრულებს თავის პროფესიულ მოვალეობას.
მას შსს-დან დღეს, 5 თებერვალს, დაახლოებით 17:00 საათზე დაურეკეს და კითხვაზე, სად შეუძლია ადმინისტრაციული საქმის მასალების ნახვა, უპასუხეს, რომ 18:00 საათამდე თუ მივა განყოფილებაში, შეძლებს გაეცნოს დოკუმენტებს.
შსს-ს წარმომადგენლის თქმით, “დადგენილი ფაქტია”, რომ ვახო ქარელი 26 იანვარს იმყოფებოდა რუსთაველის მოედანზე. ფოტორეპორტიორის რეპლიკას, რომ ნამდვილად იქნებოდა, რადგან ჟურნალისტია, შსს-ს წარმომადგენელმა ასე უპასუხა: “ეს თქვენ უნდა ამტკიცოთ, შესაბამისი დოკუმენტაცია უნდა წარმოადგინოთ, რის მიხედვითაც უკვე სასამართლო მიიღებს გადაწყვეტილებას”.
26 იანვარს ვახო ქარელი თავდაპირველად პოლიციური რეჟიმის წინააღმდეგ მარშზე იმყოფებოდა, რომელიც დიდუბის მეტროსადგურიდან დაიწყო. მოგვიანებით მან გადაინაცვლა დამკვირვებლების მარშზე, შემდეგ კი რუსთაველის გამზირზე მიმდინარე აქციაზე. გარდა იმისა, რომ ასრულებდა თავის მოვალეობას, ვახო ქარელს თან ჰქონდა პრესის ბარათი, რომელიც ადასტურებს, რომ ის მედია აპრილის ფოტორეპორტიორია.
მედია ომბუდსმენის იურისტი, ჯანო ჭკადუა ამბობს, რომ როცა ადამიანის იდენტიფიცირება ხდება, როგორც წესი, ვინაობასთან ერთად, დასაქმების ადგილსაც ადგენენ, შესაბამისად, შსს-სთვის იმის გარკვევა, რომ ვახო ქარელი იქ სამსახურებრივ მოვალეობას ასრულებდა, რთული არ უნდა ყოფილიყო.
“პარადოქსია, რომ ჟურნალისტურ საქმიანობაში ხელშეშლის სპეციალურ საგამოძიებო სამსახურში მიმდინარეობს სისხლის სამართლის საქმის გამოძიება და პარალელურად, შსს-ში მიმდინარეობს ადმინისტრაციული საქმის წარმოება გზის გადაკეტვის გამო”, — აღნიშნავს ის.
მედია აპრილი დაუკავშირდა შსს-ს პრესსამსახურს. ამ დროისთვის უწყებიდან პასუხს ველოდებით.
განახლება: ვახო ქარელს რამდენიმე წუთის წინ კვლავ დაურეკეს შსს-დან და უთხრეს, რომ მიიტანოს ჟურნალისტის დამადასტურებელი ცნობა და დანარჩენს მერე მოახსენებენ.