სახალხო დამცველის რწმუნებულების ცნობით, ბლოგერი უჩა აბაშიძე ძალოვანთა მხრიდან ფსიქოლოგიურ ზეწოლასა და სიტყვიერ შეურაცხყოფაზე მიუთითებდა. ამის შესახებ სპეციალური საგამოძიებო სამსახური უკვე ინფორმირებულია.
“დაკავებულმა, სახალხო დამცველის რწმუნებულთან გასაუბრებისას აღნიშნა, რომ მისი სახლის ჩხრეკის პერიოდში იგი სისტემატურად ითხოვდა ადვოკატების შეშვებას, თუმცა უშედეგოდ”, — აღნიშნულია განცხადებაში.
სახალხო დამცველი მიუთითებს, რომ დაკავებულს დაუყოვნებლივ უნდა მიეცეს ადვოკატთან შეხვედრის შესაძლებლობა, რათა სრულყოფილად მოხდეს მისი დაცვის უფლების რეალიზება. სახალხო დამცველი შეისწავლის ადვოკატის საქმიანობისთვის ხელშეშლის ფაქტის ეპიზოდსაც.
“არასათანადო მოპყრობაზე საუბრობდა ასევე დაკავებულთა ნაწილიც, რომელთა შესახებ სახალხო დამცველის აპარატმა დაუყოვნებლივ ჩააყენა საქმის კურსში სპეციალური საგამოძიებო სამსახური”, — ვკითხულობთ განცხადებაში.
აპარატის განცხადების თანახმად, რწმუნებულებმა 8 პირი, მათ შორის, უჩა აბაშიძე, გასულ ღამეს მოინახულეს.
უფლებადარღვევის შემთხვევებზე შეტყობინებისთვის, ისარგებლეთ სახალხო დამცველის აპარატის ცხელი ხაზით, რომელიც 24-საათიანი რეჟიმით მუშაობს: 1481
უჩა აბაშიძე სამხედრო ჟურნალისტი და ბლოგერია, რომელიც აქტიურად გამოხატავდა თავის პოზიციას რუსული კანონის წინააღდეგ. მის სახლში პოლიცია გუშინ, მაისს შევიდა და ჩხრეკა დაიწყო. ოჯახის ახლობლები ამბობდნენ, რომ ბინაში არ უშვებდნენ, აბაშიძეს კი ტელეფონის გამოყენების უფლებას არ აძლევდნენ.
საიას განცხადებით, ადგილზე მივიდა ადვოკატიც, რათა საგამოძიებო მოქმედებებს დასწრებოდა, თუმცა, უწყებამ არ მისცა არც ამის და არც მისი დაცვის ქვეშ მყოფ პირთან შეხვედრის შესაძლებლობა, რაც სისხლის სამართლის დანაშაულია.
რამდენიმესაათიანი ჩხრეკის შემდეგ უჩა აბაშიძე დააკავეს. ადვოკატის ინფორმაციით, ის სისხლის სამართლის კოდექსის 236-ე მუხლითაა დაკავებული, რაც იარაღის შეძენა-შენახვას გულისხმობს.
