განურჩევლად იმისა, მარტო ხართ, პარტნიორთან ერთად თუ, უბრალოდ, ცნობისმოყვარეობამ მოგიყვანათ აქ — სექს-სათამაშოები შეიძლება გახდეს ძლიერი ხელსაწყო სიამოვნების, ინტიმურობისა და საკუთარი თავის უკეთ შეცნობის გზაზე. ნაზი ვიბრაციებით დაწყებული და მძაფრი შეგრძნებებით დამთავრებული, როცა საქმე სექს-სათამაშოებს ეხება, აქ იპოვით რაღაცას ყველა სხეულის, სურვილისა თუ გემოვნებისთვის.

თუმცა, როცა არჩევანი ამხელაა, რთულია, გაიგო, საიდან დაიწყო ან რა არის რეალურად უსაფრთხო. ამ სტატიაში განვიხილავთ ყველაზე გავრცელებულ სათამაშოებს, ასევე იმას, თუ როგორ ავარჩიოთ ხარისხიანი მასალები და რა უნდა ვიცოდეთ, რომ სექს-სათამაშოებით სარგებლობა იყოს უსაფრთხო და სიამოვნებით სავსე.

სექს-სათამაშოების ტიპები

ქვემოთ ჩამოთვლილია ყველაზე გავრცელებული სექს-სათამაშოები, რომლებსაც თითქმის ყველა ზრდასრულთა მაღაზიაში ნახავთ. სია არ მოიცავს სათამაშოებს, რომლებიც სპეციფიკურ სექსუალურ ფანტაზიებს ან უფრო თამამ და უჩვეულო პრაქტიკებს ეხება — მსგავსი სათამაშოების რაოდენობა ერთი სტატიაში ჩასატევად მეტისმეტად დიდია.

დილდოები განკუთვნილია პენეტრაციისთვის (შეღწევისთვის) და ხშირად ფალოსის ფორმისაა. არსებობს ზომების ფართო არჩევანი და სხვადასხვა ფორმა სხვადასხვა მიზნისთვის: სხეულის შიგნით კონკრეტული ადგილების (მაგალითად, G წერტილის) სტიმულაციისთვის (ხშირად მოღუნული ფორმით), ანალური პენეტრაციისთვის (გაფართოებული ძირით) და ორმაგი შეღწევისთვის — მარტო ან პარტნიორთან ერთად (ორმაგი დაბოლოებით, ერთი და იმავე ან საწინააღმდეგო მიმართულებით).

ზოგ დილდოს მოჰყვება ქამარი ან შეიძლება მისი ქამარში ჩასმა. ეს კომბინაცია „სტრაპონის“ (ინგლ. Strap-on) სახელითაა ცნობილი და ის სხეულზე ისე მაგრდება, რომ დილდო იმავე პოზიციაში იყოს, როგორშიც რეალური პენისი. არსებობს ღრუ სტრაპონები (რომლებშიც შეიძლება პენისის მოთავსება), უქამრო სტრაპონები (რომლებიც მეორე მხრიდან შეიძლება ვაგინაში მოთავსდეს) და სხვა მრავალი ვარიანტი.

ვიბრატორები ელექტრონული სათამაშოებია, რომლებიც პულსაციითა და ვიბრაციით ასტიმულირებენ ეროგენულ ზონებს. მათი სიმძლავრე, ზომა, ხმა და სიჩქარეებისა თუ ტემპების პარამეტრები მნიშვნელოვნად განსხვავდება ტიპის, ხარისხისა და დანიშნულების მიხედვით. არსებობს ვიბრირებადი დილდოები, მცირე ზომის კვერცხის ან ტყვიის ფორმის ვიბრატორები, ორალური ვიბრატორები (კლიტორზე ენით შეხების შეგრძნების სიმულაციისთვის), პროსტატის ვიბრატორები და ვიბრატორი პენისის რგოლები.

ზოგი ვიბრატორი დისტანციურადაც იმართება, რაც მოსახერხებელია როგორც სოლო თამაშისთვის, ასევე პარტნიორთან ერთად გამოყენებისას. არსებობს ელემენტზე მომუშავე და პირდაპირ დენის წყაროზე დასაერთებელი ვარიანტები, სამგზავრო ზომის ვიბრატორები, წყალგამძლე მოდელები და უამრავი სხვა დიზაინი ყველა გემოვნებისთვის.

ანალური საცობები (იგივე „ბათფლაგები“; ინგლ. Butt-plug) შედარებით მცირე ზომის ანალური დილდოებია, რომლებიც ანუსში მოთავსებისთვისა და დატოვებისთვისაა განკუთვნილი, რისთვისაც მათ გაფართოებული ძირი, მის ზემოთ კი ჩაღრმავება აქვთ, რათა ის მოთავსების შემდეგ უძრავად დაფიქსირდეს და არ ამოვარდეს. არსებობს მისი ვიბრირებადი ვარიანტებიც, ზოგჯერ კი ანალურ საცობებს თან მოჰყვება ცხოველის ყალბი კუდი.

ანალური მძივები (ინგლ. Anal beads) შედგება ერთმანეთთან დაკავშირებული გლუვი ბურთების რამდენიმე რგოლისგან, რომლებიც ერთიანი თოკითაა შეერთებული და ბოლოში სახელურით სრულდება. ეს სათამაშო სიამოვნებას იწვევს როგორც ანუსში მოთავსების, ასევე გამოღების პროცესში — რაც აუცილებლად ფრთხილად უნდა გაკეთდეს, რადგან სწორი ნაწლავი ადვილად ზიანდება. არსებობს მძივების სხვადასხვა ზომა, ინდივიდუალური გამოცდილებისა და კომფორტის მიხედვით. თოკი, როგორც წესი, დრეკადია, თუმცა არსებობს ხისტი ვარიანტებიც.

► გახსოვდეთ: არასდროს გამოიყენოთ ანალური სათამაშო, თუკი მას არ აქვს გაფართოებული ძირი, თოკი ან სახელური. ეს უსაფრთხოების მახასიათებლები აუცილებელია იმისთვის, რომ სათამაშო სრულად არ შეიწოვოს სწორი ნაწლავის უნებლიე კუნთოვანმა შეკუმშვებმა. თუ ეს მაინც მოხდა, შესაძლოა, სათამაშოს ამოსაღებად სამედიცინო ჩარევა გახდეს საჭირო.

საშოს ბურთულები (ასევე ცნობილია, როგორც Ben Wa balls) ან კეგელის ბურთულები სხვადასხვა ზომის მძიმე ბურთულებია, რომლებიც თავსდება საშოში მენჯის ფსკერის კუნთების სავარჯიშოდ, რაც ამავდროულად მსუბუქ სიამოვნებასაც იწვევს.

ხელოვნური ვაგინები, როგორც სახელიდან ჩანს, შექმნილია იმისთვის, რომ გარკვეულწილად იმიტაცია გაუწიოს ვაგინაში შეღწევის შეგრძნებას. სათამაშოს გარე ნაწილი ხშირად ვულვის ვიზუალურ მოდელზეა შექმნილი, დეტალიზაციის სხვადასხვა დონით. ბევრ ხელოვნურ ვაგინას აქვს მოძრავი ნაწილები დამატებითი სტიმულაციისთვის, ზოგს კი სპეციალური ადგილი პატარა ტყვიისებრი ვიბრატორისთვის.

პენისის რგოლები (ინგლ. Cock rings) შექმნილია იმისთვის, რომ შეზღუდოს სისხლის ნაკადი ერეგირებულ პენისში, რაც ხელს უწყობს ერექციის გახანგრძლივებას, ორგაზმის დაყოვნებასა და სიამოვნების გაძლიერებას. არსებობს როგორც მყარი, ისე მოქნილი ვერსიები, ასევე სხვადასხვა დიზაინი სხვადასხვა საჭიროებისთვის — მაგალითად, ზოგს ურჩევნია რგოლის ტარება პენისსა და სათესლეებზე ერთდროულად (ინგლ. Cock and Ball ring).

პენისის რგოლი არ უნდა იყოს გამოყენებული ერთდროულად 30-წუთიან სესიაზე მეტხანს, რადგან სისხლის ნაკადის ხანგრძლივი შეზღუდვა შეიძლება საშიში იყოს და გამოიწვიოს პრიაპიზმი (არასასურველი, ნორმაზე ხანგრძლივი ერექცია, რომელიც არ არის გამოწვეული აღგზნებით ან სტიმულაციით) ან ნერვული დაზიანება. ასევე არ შეიძლება ზედმეტად მჭირდო რგოლების გამოყენება, იმავე მიზეზით.

ხელბორკილები და ბონდაჟის თოკები განკუთვნილია იმ ადამიანებისთვის, ვისაც სიამოვნებას ანიჭებს დაბმულობა ან სხვების დაბმა — ისინი სექსში ძალაუფლების დინამიკას დამატებით ხიბლს ჰმატებენ. ვინმეს დაბმისას აუცილებლად გაითვალისწინეთ, რომ მნიშვნელოვანია, არ შეუშალოთ ხელი სისხლის მიმოქცევას, რადგან ეს შეიძლება სწრაფად იქცეს დისკომფორტად.

ძუძუსთავების მომჭერები (ინგლ. Nipple clamps) განკუთვნილია ძუძუსთავების სტიმულაციისთვის — მოჭერითა და სისხლის ნაკადის დროებითი შეზღუდვით იქმნება ტკივილისა და სიამოვნების კომბინაცია, განსაკუთრებით მომჭერების მოხსნის მომენტში. მომჭერები ხშირად ერთმანეთთან ჯაჭვითაა დაკავშირებული — მისი წონა კიდევ უფრო ამძაფრებს შეგრძნებას. ასევე არსებობს რეგულირებადი მომჭერები უფრო ზუსტი და ინდივიდზე მორგებული გამოცდილებისთვის.

მათრახები, შოლტები, წკეპლები, როზგები და ბრტყელი კეტები განკუთვნილია იმ ადამიანებისთვის, ვისაც სიამოვნებს ტკივილზე ორიენტირებული BDSM, თუნდაც ყველაზე მსუბუქი ფორმით. ისინი გამოიყენება ტკივილის მისაყენებლად და ხშირად კლასიფიცირდება იმის მიხედვით, თუ რამდენად ძლიერი ტკივილის გამოწვევა შეუძლია. მიუხედავად იმისა, რომ ეს სექს-სათამაშოები სიამოვნებისთვის არის განკუთვნილი, ისინი მხოლოდ იმ შემთხვევაში გამოიყენეთ, თუ კარგად იცით, რას აკეთებთ, და მხოლოდ იმ ადამიანებზე, ვინც თვითონაც აცნობიერებს, რაში მონაწილეობს. არ დაგავიწყდეთ უსაფრთხო სიტყვაზე წინასწარ შეთანხმება.

► გაითვალისწინეთ: ადამიანებს განსხვავებული სურვილები და ტოლერანტობის ზღვარი აქვთ, რაც აუცილებლად უნდა გაითვალისწინოთ ნებისმიერი BDSM აქტივობის დაგეგმვისას. მასში მონაწილე ყველა მხარეს უნდა ჰქონდეს გააზრებული პოტენციური რისკები და ისინი სრულად უნდა იყვნენ თანახმა იმაზე, რომ ამ სცენასა თუ დინამიკაში მიიღონ მონაწილეობა. მეტი ინფორმაციისთვის იხილეთ ჩვენი სტატია რა არის BDSM? — როლები, ტიპები და ძირითადი წესები

სექს-სათამაშოების მასალები და უსაფრთხოება

სექს-სათამაშოები არც თუ ისე იაფიანი სიამოვნებაა, თუმცა თუ მათ ყიდვას გეგმავთ, უმჯობესია, თანხა ააგროვოთ და ისეთი პროდუქტი შეიძინოთ, რომელიც ნამდვილად სანდო ხარისხისაა. მწარმოებლები, რომლებიც საკუთარ პროდუქტს სერიოზულად ეკიდებიან, როგორც წესი, უფრო მეტად ზრუნავენ მომხმარებელზე და დამატებით ინფორმაციასაც იძლევიან სათამაშოს სწორად გამოყენების შესახებ. იაფფასიან სათამაშოებს შეიძლება ჰქონდეთ ტოქსიკური შემადგენლობა, ისინი შეიძლება სწრაფად დაიშალოს ან ჰქონდეთ უხეში ნაკერები, რომლებიც გამოყენებამდე გასასწორებელი იქნება.

განსაკუთრებული სიფრთხილით უნდა მიუდგეთ იმ მასალების არჩევას, რომლებიც უშუალოდ გენიტალიებთან იქნება კონტაქტში. აუცილებლად მოიძიეთ ინფორმაცია როგორც სათამაშოზე, ისე მის მწარმოებელ თუ გამყიდველ კომპანიაზეც. მოერიდეთ ნივთებს, რომლებსაც აქვთ მძაფრი ან საეჭვო სუნი/გემო ან რომლებიც ტოვებენ ნარჩენებს შეხების შემდეგ, და აუცილებლად განასხვავეთ ფოროვანი და არაფოროვანი მასალები ერთმანეთისგან.

არაფოროვანი მასალები უფრო უსაფრთხოა, მარტივად იწმინდება და, როგორც წესი, უფრო გამძლეც არის. გამოყენებამდე ყოველთვის ყურადღებით შეამოწმეთ თქვენი სექს-სათამაშოები ბზარების, ნახლეჩებისა და სხვა დაზიანებების არსებობაზე. თუკი სათამაშო უნაკლო მდგომარეობაში არ არის, ის არ გამოიყენოთ. არაფოროვანი სათამაშოების სტერილიზაცია შესაძლებელია, თუმცა აჯობებს, გადაამოწმოთ მწარმოებლის რეკომენდაციები კონკრეტულად თქვენი სათამაშოსთვის. არაფოროვან მასალებს შორისაა:

• სილიკონი ერთ-ერთი ყველაზე პოპულარული არჩევანია. ის უსაფრთხოა, რბილი და სათუთი, ძალიან გამძლეა და შეიძლება იყოს როგორც მყარად, ისე რბილად და მოქნილად დამზადებული. სილიკონი, როგორც ნივთიერება, ქიმიურ ბმას ამყარებს საკუთარ თავთან, ამიტომ სილიკონის სექს-სათამაშოსთან არასდროს გამოიყენოთ სილიკონის საფუძველზე დამზადებული ლუბრიკანტი (მათ შორის პრეზერვატივებში არსებული ლუბრიკანტი);
• მინა ვიზუალურად მიმზიდველია თავისი გამჭვირვალობის გამო, ზოგი მინის სათამაშოს გამოყენებამდე კი მისი გათბობაც შეიძლება (თუმცა, აუცილებლად შეამოწმეთ, რომ ის ზედმეტად ცხელი არ იყოს). მინა უსაფრთხოა სხეულისთვის, მაგრამ განსაკუთრებით მნიშვნელოვანია ბზარების შემოწმება ყოველი გამოყენების წინ, რათა შემთხვევით კანი არ დაიზიანოთ;
• უჟანგავი ფოლადი და ალუმინი ორივე უსაფრთხოა და თავსებადია ყველა ტიპის ლუბრიკანტთან. თუკი ასეთი სათამაშოს სტერილიზაციას დუღილით აკეთებთ, აუცილებლად მოათავსეთ სათამაშოსა და ქვაბს შორის სუფთა პირსახოცი, რათა ზედაპირი არ დაზიანდეს;
• ABS მყარი პლასტმასი არატოქსიკურია და სხეულისთვის უსაფრთხოა, მაგრამ გასათვალისწინებელია, რომ საღებავმა შეიძლება დროთა განმავლობაში დაიწყოს დაშლა. არასოდეს აადუღოთ მყარი პლასტმასის სათამაშო;
• ხის მასალა — თუ მას აქვს სამედიცინო კლასის, წყალგაუმტარი და სხეულისთვის უსაფრთხო საფარი — შესანიშნავი მასალაა დილდოსთვის. ის მსუბუქია და თითქმის ნებისმიერი ფორმის მიღება შეუძლია. მაგრამ თუ სათამაშო სწორად არ არის დამუშავებული, შეუძლია ტენი შეიწოვოს, დეფორმირდეს და დისკომფორტი გამოიწვიოს — ამიტომ კარგად დარწმუნდით, რომ მაღალხარისხიან პროდუქტს ყიდულობთ.

ფოროვანი მასალები უფრო მოქნილია, მაგრამ მათი სწორად გაწმენდა ბევრად რთულია და მათში შეიძლება დაგროვდეს ბაქტერიები, რომლებიც სხვადასხვა ტიპის ინფექციას — მათ შორის სქესობრივი გზით გადამდებ ინფექციას (სგგი) — იწვევს. ფოროვან სათამაშოებთან ყოველთვის გამოიყენეთ პოლიურეთანის პრეზერვატივი და წყლის საფუძველზე დამზადებული ლუბრიკანტი. ფოროვანი სათამაშოების გაზიარება არ არის რეკომენდებული, რადგან შეიძლება პარტნიორებს შორის ინფექციები გადაიცეს. გარდა ამისა, ფოროვანი სათამაშოები ყოველთვის შეინახეთ ცალ-ცალკე, რადგან ისინი შეიძლება დროთა განმავლობაში დაიშალოს და სხვა სათამაშოებსაც კი შეერწყას. ფოროვან მასალებს შორისაა:

• თერმოპლასტიკური რეზინისა (TPR) და თერმოპლასტიკური ელასტომერის (TPE) სათამაშოები არატოქსიკურია. შენახვამდე კარგად გააშრეთ და ყურადღება მიაქციეთ სუნსა და ფერს (მაგალითად, ლაქებს, რომლებიც შეიძლება იყოს ობის ნიშანი);
• ნეილონი და ტყავი კარგია ისეთი ნივთებისთვის, როგორიცაა თოკები, ნიღბები და ხელბორკილები — იმ შემთხვევაში, თუ ისინი სწორად იწმინდება და ინახება. მაგრამ მათი სხეულის შიგნით გამოყენება არ არის რეკომენდებული;
• ლატექსი, ჟელე/რეზინა, პოლივინილ-ქლორიდი (PVC), კიბერკანი (ინგლ. Cyberskin; და „კანის მსგავსი“ სხვა მასალები) შეიძლება ტოქსიკური იყოს. თუ აპირებთ ისეთი სათამაშოს გამოყენებას, რომელიც ამ მასალებისგანაა დამზადებული (მაგალითად, ხელოვნური ვაგინის), აუცილებლად გამოიყენეთ პრეზერვატივი — თუმცა, გაითვალისწინეთ, რომ ეს ტოქსიკურობისგან სრულად დაცვას ვერ უზრუნველყოფს;

► განურჩევლად იმისა, თუ რა მასალისგანაა თქვენი სექს-სათამაშო დამზადებული, ყოველთვის შეინახეთ ის მწარმოებლის ინსტრუქციის მიხედვით. სექს-სათამაშოების, უბრალოდ, ერთიანად უჯრაში ჩაყრა არ არის რეკომენდებული და ამან შეიძლება გამოიწვიოს სათამაშოების დაზიანება, რამაც მათი შემდგომი გამოყენება შეიძლება პრობლემური ან სხეულისთვის საზიანო გახადოს.

ლუბრიკანტები სექს-სათამაშოებისთვის

ინტიმური ლუბრიკანტი (საცხი) სექს-სათამაშოების გამოყენების ერთ-ერთი ყველაზე მნიშვნელოვანი ნაწილია — ეს არის სპეციალური სითხე ან გელი, რომელიც სექსუალური აქტივობის დროს ხახუნისა და გაღიზიანების შესამცირებლად გამოიყენება. სექსის დროს ყოველთვის თან იქონიეთ მაღალი ხარისხის ლუბრიკანტი, განსაკუთრებით პენეტრაციით დაკავებისას — და განსაკუთრებით მაშინ, როცა საქმე ეხება სხეულის იმ ნაწილებს, რომლებიც თვითონ არ სველდებიან (მაგალითად, ანალური პენეტრაციისას).

► დაივიწყეთ ვაზელინი ან ნებისმიერი სხვა საყოფაცხოვრებო პროდუქტი, რომელსაც სხვა დანიშნულება აქვს — შედეგი, დიდი ალბათობით, არასასიამოვნო იქნება.

არსებობს სექსისთვის განკუთვნილი ლუბრიკანტის ოთხი ტიპი:

• წყლის საფუძველზე დამზადებული ლუბრიკანტი თავსებადია ყველა სახის პრეზერვატივთან, სხეულის ნაწილსა და სექს-სათამაშოსთან. ის არ ტოვებს ლაქებს, არსებობს სხვადასხვა სიმკვრივის და, როგორც წესი, იაფია. თუმცა, ის სწრაფად შრება და შეიძლება ჰქონდეს მწარე გემო;
• სილიკონის საფუძველზე დამზადებული ლუბრიკანტი თავსებადია ყველა პრეზერვატივსა და სხეულის ნაწილთან, ასევე სექს-სათამაშოების უმრავლესობასთან (გარდა სილიკონის სათამაშოებისა). ის შეიძლება იყოს ძვირადღირებული, მაგრამ ძალიან სრიალაა, არ ტოვებს ლაქებს და წყლის ლუბრიკანტზე ბევრად დიდხანს ძლებს. სილიკონის ლუბრიკანტების უმეტესობა ჰიპოალერგენულია (ნაკლებად სავარაუდოა, რომ გამოიწვევს ალერგიულ რეაქციას);
• ჰიბრიდული ლუბრიკანტი არის წყლის საფუძველზე დამზადებული ლუბრიკანტი, რომელსაც დამატებული აქვს მცირე რაოდენობით სილიკონის ლუბრიკანტი, რაც მას უფრო სრიალას ხდის. სილიკონის სათამაშოებთან ერთად არც მისი გამოყენებაა რეკომენდებული, თუმცა ეს დამოკიდებულია კონკრეტულ პროდუქტზე;
• ზეთის საფუძველზე დამზადებული ლუბრიკანტი ძალიან ხანგრძლივი მოქმედებისაა და ძალიან სრიალაა, მაგრამ მან შეიძლება დააზიანოს ლატექსის პრეზერვატივები, დატოვოს ლაქები ქსოვილზე და გამოამწყვდიოს ბაქტერიები სხეულში, რაც ვაგინალური გამოყენებისთვის არ არის უსაფრთხო, თუმცა ზეთის ლუბრიკანტი კარგად ერგება ანალურ სექსს.

► თუმცა, ყველაფერი არ შემოიფარგლება მხოლოდ ამ ოთხი ტიპის ლუბრიკანტიდან ერთ-ერთის არჩევით. ბევრი კომერციული პროდუქტი შეიცავს ინგრედიენტებს, რომლებიც მავნებელია სხეულისთვის. მოერიდეთ იმ ლუბრიკანტებს, რომლებიც შეიცავს გლიცერინს, პროპილენგლიკოლს, პოლიკვატერნიუმის ნაერთებს, პარაბენებს, ნონოქსინოლ-9-ს, ქლორჰექსიდინს, პეტროლიუმის ზეთებს, ბენზოკაინს ან/და შარდოვანას.

საგულისხმოა ასევე ლუბრიკანტის ოსმოლარობა — ანუ რამდენად აიძულებს ის სხეულის უჯრედებს, შთანთქონ (ჰიპოოსმოსური) ან გამოათავისუფლონ წყალი (ჰიპეროსმოსური). იდეალური ლუბრიკანტი იქნება იზოოსმოსური, რაც ნიშნავს, რომ იგი არცერთი ამ ეფექტით არ იმოქმედებს უჯრედებზე.

სხეულის სითხეების ოსმოლარობა მერყეობს 250-380 მოსმ/კგ-ს შორის, ხოლო წყალზე დაფუძნებული ლუბრიკანტების ოსმოლარობა შეიძლება მერყეობდეს დაახლოებით 100 მოსმ/კგ-დან 10,000 მოსმ/კგ-მდე. რაც უფრო მაღალია ეს მაჩვენებელი, მით მეტი შანსია, რომ ლუბრიკანტმა გამოაშროს უჯრედები, გამოიწვიოს გენიტალიების გაღიზიანება და ქსოვილების დაზიანება. თუ ოსმოლარობა სხეულის მაჩვენებელზე მნიშვნელოვნად დაბალია, შეიძლება უჯრედებმა ზედმეტად შეიწოვონ წყალი და გასკდნენ — თუმცა კომერციულ ლუბრიკანტებში ამის რისკი საკმაოდ დაბალია.

► სილიკონისა და ზეთის საფუძველზე დამზადებული ლუბრიკანტები იზოოსმოსურია. თუკი ირჩევთ წყლის ლუბრიკანტს, აირჩიეთ ისეთი, რომლის ოსმოლარობაც ყველაზე ახლოსაა სხეულის ბუნებრივ მაჩვენებელთან. ჯანმრთელობის მსოფლიო ორგანიზაციის რეკომენდაციაა, რომ ლუბრიკანტის ოსმოლარობა არ აღემატებოდეს 1200 მოსმ/კგ-ს.

და ბოლო, მაგრამ არანაკლებ მნიშვნელოვანი — ლუბრიკანტის pH მაჩვენებელი (მჟავიანობა). ვაგინის ნორმალური pH მერყეობს 3.8-4.5-ს შორის, ხოლო სწორ ნაწლავში ეს მაჩვენებელი არის დაახლოებით 6-8. აირჩიეთ ისეთი ლუბრიკანტი, რომლის მჟავიანობის დონეც მაქსიმალურად ახლოსაა იმ ღრუს ბუნებრივ pH-თან, რომლისთვისაც აპირებთ გამოყენებას. ეს განსაკუთრებით მნიშვნელოვანია ვაგინისთვის, რადგან ვაგინალური ფლორა ბევრად უფრო მგრძნობიარეა, ვიდრე სწორ ნაწლავში არსებული შედარებით გამძლე ბაქტერიული გარემო.

ზოგადი რჩევები უსაფრთხოებისთვის

• ყოველთვის შეამოწმეთ სათამაშოები გამოყენებამდე ბზარების, ნახლეჩების ან ნებისმიერი სხვა დაზიანების ნიშნებზე. უმნიშვნელო დეფექტმაც კი შეიძლება გამოიწვიოს გაღიზიანება ან ტრავმა;
• მოერიდეთ ისეთ ანალურ სათამაშოებს, რომლებსაც არ აქვთ გაფართოებული ძირი, სახელური ან თოკი. სწორი ნაწლავის კუნთებმა შეიძლება სათამაშო შიგნით შეიწოვოს ისე, რომ მის ამოსაღებად საჭირო გახდეს სამედიცინო ჩარევა;
• გამოიყენეთ მხოლოდ სხეულისთვის უსაფრთხო მასალები — სასურველია არაფოროვანი (მაგალითად, სილიკონი, მინა ან უჟანგავი ფოლადი), რათა მინიმუმამდე დაიყვანოთ ინფექციის ან ალერგიის რისკი;
• არასდროს გააზიაროთ ფოროვანი სათამაშოები, რადგან მათში შეიძლება დაგროვდეს ბაქტერიები და გაწმენდის შემდეგაც კი დარჩეს სგგი-ების გავრცელების რისკი. თუ მაინც გიწევთ ასეთი სათამაშოს გაზიარება, აუცილებლად გამოიყენეთ პრეზერვატივი და წყლის ლუბრიკანტი;
• ინტიმური ლუბრიკანტი გამოიყენეთ უხვად, განსაკუთრებით შეღწევისას და ანალური თამაშის დროს. მოერიდეთ საყოფაცხოვრებო საშუალებებს, როგორებიცაა ვაზელინი — ისინი აზიანებენ პრეზერვატივს და იწვევენ კანის გაღიზიანებას;
• იცოდეთ, რა მასალისგან არის დამზადებული სათამაშო. ზოგი პროდუქტი შეიძლება შეიცავდეს სხეულისთვის ტოქსიკურ კომპონენტებს. მოერიდეთ სათამაშოებს, რომლებსაც აქვთ ძლიერი ქიმიური სუნი ან ტოვებენ ნარჩენს ხელზე შეხებისას;
• შეინახეთ სათამაშოები სწორად — არ ჩაყაროთ ისინი ერთად უჯრაში, სადაც შეიძლება მათი დნობა, დაშლა ან დაკაწვრა მოხდეს. შეინახეთ ისინი ინდივიდუალურ პარკებში ან სპეციალურ შესანახ ჩანთებში;
• არ გადააჭარბოთ დროის ლიმიტებს იმ სათამაშოებთან, რომლებიც სისხლის მიმოქცევას ზღუდავს — როგორიცაა პენისის რგოლები ან მკერდის კლამპები. დაიცავი მწარმოებლის რეკომენდაციები და მოუსმინე შენს სხეულს.

► და გახსოვდეთ: ნებისმიერი სექსუალური აქტივობა ყოველთვის უნდა იყოს თანხმობაზე დაფუძნებული და გააზრებული, განსაკუთრებით BDSM აღჭურვილობის გამოყენების შემთხვევაში. წინასწარ შეთანხმდით უსაფრთხო სიტყვაზე, საზღვრებზე და დარწმუნდით თქვენი და თქვენი პარტნიორის კომფორტსა და უსაფრთხოებაში.

წყარო: WomanLog