„მედიაჩეკერის“ ცნობით, ტელეკომპანია „იმედი“ სამმა ტელეწამყვანმა დატოვა: ზურაბ ბალანჩივაძემ, ნათია ორველაშვილმა და ეკატერინე ამირეჯიბმა. გამოცემა აცხადებს, რომ ამ ამბავს რამდენიმე წყარო ადასტურებს. გარდა ამისა, ვრცელდება ასევე ინფორმაცია, რომ „იმედის“ დატოვება სხვა წამყვანებმაც გადაწყვიტეს.
სამი ჟურნალისტის მიერ “იმედის” დატოვების შესახებ ინფორმაციას ავრცელებს News.On.ge-ც. გამოცემა აცხადებს, რომ ესაუბრნენ ერთ-ერთ მათგანს, თუმცა მან უთხრა, რომ გადაწყვეტილების შესახებ საჯაროდ ჯერ ვერ ისაუბრებს. On.ge ასევე აღნიშნავს, რომ აქვთ ინფორმაცია არხიდან ნინი ბადურაშვილისა და სალომე ღვინიაშვილის წამოსვლის შესახებაც. აღსანიშნავია, რომ რამდენიმე დღის წინ ნინი ბადურაშვილი და სალომე ღვინიაშვილი რუსული კანონის საწინააღმდეგო აქციაზე მშვიდობიანი დემონსტრანტების დარბევას კრიტიკულად გამოეხმაურნენ.
შეგახსენებთ, რომ დღეს თავის სახლში დააკავეს ბლოგერი და სამხედრო ჟურნალისტი უჩა აბაშიძე. დაკავების დროს მის სახლთან მიმდინარეობდა საპროტესტო აქცია, რომელმაც მოგვიანებით ჭავჭავაძის გამზირზე გადაინაცვლა, სადაც პოლიციამ ძალადობრივად დააკავა რამდენიმე დემონსტრანტი.
პარალელურად, უცნობი პირები სახლთან დახვდნენ და ფიზიკურად გაუსწორდნენ „გირჩი — მეტი თავისუფლების“ წევრ ბორის ჩელე ყურუას და პარტია „ახალის“ წევრ ნოდარ ჩაჩანიძეს.