ევროკავშირის უმაღლესი წარმომადგენელი ჯოზეფ ბორელი და სამეზობლო პოლიტიკისა და გაფართოების საკითხებში ევროკავშირის კომისარი ოლივერ ვარჰეი რუსულ კანონთან დაკავშირებით ერთობლივ განცხადებას აკეთებენ და მოუწოდებენ საქართველოს ხელისუფლებას, „თავი შეიკავოს ისეთი კანონპროექტის მიღებისგან, რომელმაც შეიძლება საფრთხეში ჩააგდოს საქართველოს მსვლელობა ევროკავშირისკენ“.
„დღეს საქართველოს პარლამენტმა პირველი მოსმენით მხარი დაუჭირა „უცხოური გავლენის გამჭვირვალობის“ კანონს მიუხედავად ევროკავშირის განმეორებითი მოწოდებისა, უკან გაეხმო მსგავსი კანონმდებლობა, და მიუხედავად მასობრივი პროტესტებისა.
ეს მოვლენების ძალიან შემაშფოთებელი განვითარებაა და კანონმდებლობის საბოლოოდ მიღება უარყოფითად აისახება ევროკავშირისკენ მიმავალ გზაზე საქართველოს პროგრესზე. ეს კანონი არ შეესაბამება ევროკავშირის ძირეულ ნორმებსა და ღირებულებებს.
საქართველოს ძალიან აქტიური სამოქალაქო საზოგადოება ჰყავს, რომელსაც წვლილი შეაქვს ქვეყნის წარმატებულ პროგრესში ევროკავშირის წევრობისკენ. შემოთავაზებული კანონპროექტი შეზღუდავს სამოქალაქო საზოგადოებისა და მედია ორგანიზაციების შესაძლებლობას, იმუშაონ თავისუფლად. მან ასევე შეიძლება შეზღუდოს გამოხატვის თავისუფლება და უსამართლოდ მოახდინოს იმ ორგანიზაციების სტიგმატიზაცია, რომლებიც საქართველოს მოქალაქეებს სარგებელს აძლევენ.
ევროკავშირი მოუწოდებს საქართველოს, თავი შეიკავოს ისეთი კანონპროექტის მიღებისგან, რომელმაც შეიძლება საფრთხეში ჩააგდოს საქართველოს მსვლელობა ევროკავშირისკენ — გზა, რომელსაც მხარს უჭერს საქართველოს მოქალაქეების აბსოლუტური უმრავლესობა“, — წერია ევროკავშირის მაღალჩინოსნების განცხადებაში.
დღეს პარლამენტმა რუსულ კანონს პირველი მოსმენით მხარი დაუჭირა.
კენჭისყრაზე კანონპროექტს 83-მა დეპუტატმა დაუჭირა მხარი, 0-ის წინააღმდეგ. ამ დროს ოპოზიციის დეპუტატებს დარბაზი უკვე დატოვებული ჰქონდათ.
იმისთვის, რომ კანონპროექტი კანონად იქცეს, საჭიროა სამი მოსმენა და, საბოლოოდ, მესამე მოსმენაზე კანონის მხარდაჭერა.
აღსანიშნავია, რომ გასულ წელს საპროტესტო აქციების შემდეგ ქართულ ოცნებას რუსული კანონის მიღებაზე უარის თქმა პირველი მოსმენით მხარდაჭერის შემდეგ მოუწია.