ამერიკის შეერთებულმა შტატებმა დაასანქცირა ქართული ოცნების წარმომადგენლები და მათი ოჯახის წევრები. ამის შესახებ სახელმწიფო დეპარტამენტის პრესსპიკერმა, მეთიუ მილერმა განაცხადა. მისი განმარტებით, ეს არის სანქციების პირველი ტალღა, რომელიც რამდენიმე ათეულ ადამიანზე ვრცელდება, 20-დან 30-მდე. დღეს გამოცხადებული სანქციები სავიზო შეზღუდვებს გულისხმობს.
“ამერიკის შეერთებული შტატები ღრმად შეშფოთებულია საქართველოში “ქართული ოცნების” როგორც ანტიდემოკრატიული ქმედებებით, ასევე ბოლოდროინდელი განცხადებებითა და რიტორიკით. ეს ქმედებები ხელს უშლის საქართველოს ევროპულ მომავალსა და წინააღმდეგობაში მოდის საქართველოს კონსტიტუციასა და ქართველი ხალხის სურვილებთან. მდივანმა ბლინკენმა ცოტა ხნის წინ დააანონსა ორმხრივი ურთიერთობების ყოვლისმომცველი გადახედვა საქართველოსა და ამერიკის შეერთებულ შტატებს შორის. ამ გადახედვის ფარგლებში, დეპარტამენტმა ვიზის შეზღუდვის ახალი პოლიტიკა დააანონსა, რათა პასუხი გასცეს ამ ქმედებებს 212 (a)(3)(c) იმიგრაციისა და ნაციონალობის აქტის ფარგლებში. ამ აქტის ფარგლებში, დღეს ვდგამთ ნაბიჯებს, რომ გავატაროთ ვიზის შეზღუდვის პოლიტიკა მრავალ ქართველზე. ეს მოიცავს ადამიანებსა და მათ ოჯახის წევრებს, ვინც პასუხისმგებელნი ან თანამონაწილენი არიან დემოკრატიისთვის ძირის გამოთხრაში საქართველოში, მათ შორის, მშვიდობიანი შეკრებისთვის ძირის გამოთხრაში, ძალადობრივად თავდასხმაში მშვიდობიან დემონსტრანტებზე, სამოქალაქო საზოგადოების წარმომადგენლების დაშინებაში და განზრახ ყალბი ინფორმაციის გავრცელებაში საქართველოს ხელისუფლების მხრიდან.
სავიზო შეზღუდვების პირველი ტრანში შეეხება ქართული ოცნების წევრებს, პარლამენტის წევრებს, სამართალდამცავებსა და კერძო პირებს. ვინარჩუნებთ იმედს, რომ საქართველოს ლიდერები გადახედავენ საკუთარ ქმედებებს. თუკი ასე არ მოხდება, ამერიკის შეერთებული შტატები მზადაა დამატებითი ქმედებების განსახორციელებლად”, — განაცხადა მეთიუ მილერმა.
კონკრეტული სახელები და გვარები ამ დროისთვის ცნობილი არ არის. მეთიუ მილერის თქმით, ეს კონფიდენციალურია, თუმცა დასანქცირებული ადამიანები ამის შესახებ გაიგებენ.
“როგორც წესი, ჩვენ არ ვატყობინებთ ხოლმე, მაგრამ როდესაც შეეცდებიან ამერიკაში ჩამოსვლას, ამას გაიგებენ. თუკი აქვთ მოქმედი ვიზა, მათ შეატყობინებენ”, — აღნიშნა სახელმწიფო დეპარტამენტის პრესსპიკერმა.
მიუხედავად ფართომასშტაბიანი პროტესტებისა, ქართულმა ოცნებამ დაამტკიცა რუსული კანონი, რომლის მსგავსმა კანონმა ავტორიტარულ ქვეყნებში გააქრო თავისუფალი მედია და ყველა დემოკრატიული ინსტიტუტი. ორი თვის განმავლობაში, ფაქტობრივად, არ დარჩენილა სფერო, რომლის წარმომადგენლებმაც კანონპროექტის საწინააღმდეგო პოზიცია არ გამოთქვეს. კრიტიკულია ქვეყნის პარტნიორების განცხადებებიც, მათ შორის, კითხვის ნიშნის ქვეშ დგება ევროკავშირში ინტეგრაციის პროცესი. ამასთან, ამერიკის შეერთებულმა შტატებმა ქართული ოცნების წარმომადგენლებისა და მათი ოჯახის წევრების მიმართ სანქციები დააანონსა. აშშ ამ დროისთვის სანქციების კიდევ რამდენიმე პაკეტს განიხილავს.
აღსანიშნავია, რომ ფართომასშტაბიან აქციებზე შეკრებილი მშვიდობიანი მოქალაქეების წინააღმდეგ ხელისუფლებამ არაერთხელ გამოიყენა როგორც უხეში ფიზიკური ძალა, ასევე ცრემლსადენი გაზი, წიწაკის სპრეი თუ წყლის ჭავლი. ფიზიკურად გაუსწორდნენ ჟურნალისტებს და აქციის არაერთ მონაწილეს. გარდა ამისა, მოქალაქეებს, რომლებიც რუსულ კანონს აპროტესტებენ, ფარული ნომრებიდან ურეკავდნენ, ემუქრებოდნენ და აგინებდნენ. რამდენიმე ადამიანს უცნობი პირები სახლებთან დახვდნენ და ფიზიკურად გაუსწორდნენ. ადამიანების შეშინების კიდევ ერთი მეთოდი იყო საცხოვრებელ სახლებთან თუ ოფისებთან შეურაცხმყოფელი და სიძულვილის წარწერების გაკეთება, პლაკატების გაკვრა.