არაპენეტრაციული სექსი გულისხმობს სექსუალურ აქტივობებს პენეტრაციის, ანუ სხეულში შეღწევის გარეშე. ისევე, როგორც სექსუალობის სხვა ელემენტები, არაპენეტრაციული სექსიც სხვადასხვა რამეს ნიშნავს სხვადასხვა ადამიანისთვის. ბევრისთვის ეს მოიცავს ყველაფერს, გარდა ვაგინალური პენეტრაციისა („პენისი ვაგინაში“ ტიპის სექსი). სხვებისთვის არაპენეტრაციული სექსი მთლიანად გამორიცხავს პენეტრაციას, მათ შორის თითების, სექს-სათამაშოებისა და ანალური სექსის გარეშე. ზოგმა ადამიანმა შეიძლება საზღვარი დააწესოს იმ ნებისმიერ აქტივობაზე, რომლის შედეგიც შეიძლება ორსულობა ან სქესობრივი გზით გადამდები ინფექციების (სგგი) გავრცელება იყოს.

Contents

არაპენეტრაციული სექსით დაკავება შეუძლია ნებისმიერი გენდერული იდენტობისა თუ სექსუალური ორიენტაციის მქონე ადამიანს. ვინაიდან არაპენეტრაციული სექსის მნიშვნელობა სხვადასხვაგვარია, სხვადასხვა ადამიანისთვის ის შეიძლება მოიცავდეს: კოცნას, მასაჟს, ე.წ. „მშრალად ხახუნს“, ორმხრივ მასტურბაციას, სექს-სათამაშოებს, ხელით სტიმულაციას და ორალურ სექსს.

არაპენეტრაციული სექსის ტიპები

ყოველთვის კარგი იდეაა, რომ სექსუალური აქტივობით დაკავებამდე თქვენი მოლოდინები პარტნიორთან განიხილოთ. ასე აქტში მონაწილე ყველა ადამიანი იქნება ინფორმირებული და ყველას ეცოდინება, რა არის პარტნიორ(ებ)ის საზღვრები და სურვილები.

არაპენეტრაციული სექსის ტიპებს შორის შეიძლება იყოს:

კოცნა: ბევრისთვის კოცნა ერთ-ერთი ყველაზე ინტიმური და სექსუალური აქტია. ვნებიან კოცნას შეუძლია გამოიწვიოს სასიამოვნო შეგრძნებები მთელს სხეულში, სექსუალური აღგზნება, სიახლოვის შეგრძნება, მოტივაცია და ეიფორიაც კი. გარდა ამისა, კოცნით ხშირად შეიძლება მნიშვნელოვანი ინფორმაცია გაიგო ურთიერთობას მიმდინარე სტატუსზე ან მომავალზე;
მასაჟი: ხელებით პარტნიორის სხეულის დაზელა და მასაჟის (შესაძლოა, ლოსიონით ან სასიამოვნო სურნელის მქონე მასაჟის ზეთით) არაპენეტრაციული სექსის უსაფრთხო და სასიამოვნო ფორმაა. ხელებით პარტნიორის სხეულის შეგრძნება ან, პირიქით, პარტნიორის ხელების შეგრძნება საკუთარ სხეულზე შეიძლება ძალიან ეროტიკული და ინტიმური სიამოვნება იყოს;
მშრალი სექსი ან ე.წ. „მშრალად ხახუნი“ (ინგლ. Dry humping): არაპენეტრაციული სექსის ეს ტიპი გულისხმობს სასქესო ორგანოების (გენიტალიების) ხახუნს პარტნიორის სასქესო ორგანოებზე ან სხეულზე, ხშირ შემთხვევაში ჩაცმულზე. ის ასევე შეიძლება მოიცავდეს პენისის ან კლიტორის ხახუნს პარტნიორის დუნდულებს ან ბარძაყებს შორის, რაც პენეტრაციული სექსის ერთგვარი სიმულაციაა. ეს აქტი შეიძლება ძალიან სასიამოვნო იყოს და მას პენეტრაციულ სექსთან შედარებით სგგი-ების გავრცელებისა და ორსულობის დადგომის ბევრად ნაკლები შანსი აქვს;

► საცვლებით მშრალად ხახუნით დაკავება უფრო უსაფრთხოა, თუმცა ის ვერ მოახდენს სასქესო ორგანოების კანით კანზე შეხების პრევენციას და ვერც სხეულის სითხეების მიმოცვლას შეუშლის ხელს. გარდა ამისა, ზოგიერთი სგგი შეიძლება ბუდობდეს იმ უბნებში, რომლებსაც საცვალი ბოლომდე ყოველთვის არ ფარავს (მაგალითად, ბარძაყის ზედა ნაწილი ან დუნდულები).

ორმხრივი მასტურბაცია: ეს შეიძლება ორ სხვადასხვა რამეს გულისხმობდეს. ერთი მხრივ, ორმხრივი მასტურბაცია შეიძლება ნიშნავდეს იმას, რომ პარტნიორები ერთმანეთის სასქესო ორგანოებს ეხებიან ერთდროულად, თუმცა, მეორე მხრივ, ის შეიძლება გულისხმობდეს, რომ პარტნიორები დამოუკიდებლად მასტურბირებენ ერთად ყოფნის დროს, ხშირად ერთმანეთის ყურების პარალელურად. ეს უკანასკნელი შეიძლება ძალიან აღმგზნები აქტივობა იყოს და მას სგგი-ების გავრცელების ძალიან დაბალი შანსი აქვს. ამის გაკეთება მობილურიდან ან კომპიუტერიდანაც შეგიძლიათ, მაგალითად, ვიდეოზარით;
კიბერსექსი ან ვირტუალური სექსი: კიბერსექსი არის ნებისმიერი სექსუალური აქტივობა, რომელიც ხდება ვირტუალურად ორ ან მეტ ადამიანს შორის, მათ შორისაა ე.წ. „სექსტინგი“ (ინგლ. Sexting; სექს-მიმოწერა), სექსუალური სურათების ან ვიდეოების გაზიარება პარტნიორისთვის ან ვიდეოზარით სექსი. ეს ასევე მარტივი საშუალებაა ბევრი ისეთი სექსუალური ფანტაზიის ასრულების, რომელთა გამოცდასაც რეალობაში ვერ ახერხებთ;
ხელით სტიმულაცია: არაპენეტრაციული სექსის ერთ-ერთი ფორმაა ხელით პენისის (ე.წ. „ჰენდჯობი“; ინგლ. Handjob), ვულვის (ე.წ. „თითაობა“ ან „ფინგერინგი“; ინგლ. Fingering) ან ანუსის სტიმულაცია. თუმცა, ზოგჯერ ასეთი სტიმულაცია შეიძლება თითებით პენეტრაციასაც გულისხმობდეს, რაც ზოგი ადამიანისთვის შეიძლება პენეტრაციული სექსის კატეგორიაში გადიოდეს;
ორალური სექსი: ორალური სექსი გულისხმობს ტუჩებისა და ენის გამოყენებით პენისის (მინეტი), ვულვის (კუნილინგუსი) ან ანუსის (ანილინგუსი) სტიმულაციას. ზოგისთვის ესეც პენეტრაციული სექსის კატეგორიაში გადის, ვინაიდან ზოგჯერ ის შეიძლება მოიცავდეს ენით პენეტრაციას. ორალური სექსი სექსის უფრო მეტად უსაფრთხო ფორმაა, თუმცა მის დროს მაინც არის გარკვეული სგგი-ების გავრცელების რისკი და თავის დაცვის მიზნით უმჯობესია პრეზერვატივის ან სტომატოლოგიური კაშხლის გამოყენება;

რატომ შეიძლება გქონდეს სექსი პენეტრაციის გარეშე?

არაპენეტრაციული სექსით დაკავებისთვის ბევრი მიზეზი არსებობს. ამ სიის სათავეშია ჯანმრთელობა. არაპენეტრაციული სექსი ბუნებრივი და ეფექტური გზაა არასასურველი ორსულობისა და სქესობრივი გზით გადამდები ინფექციების (სგგი) თავიდან აცილებისთვის, პარალელურად კი სექსუალური სიამოვნების მიღებისა და ინტიმურობის გაზრდისთვის.

► უნდა აღინიშნოს, რომ ზოგიერთი სგგი-ის გავრცელება მაინცაა შესაძლებელი არაპენეტრაციული სექსის გარკვეული ფორმებით, მაგალითად, ორალური სექსით, ამიტომ სექსამდე და სექსის შემდეგ ჰიგიენის დაცვა და ბარიერული კონტრაცეფციის (მაგალითად, პრეზერვატივის) გამოყენება მაინც აუცილებელია. მეტი ინფორმაციისთვის იხილეთ ჩვენი სტატია პრეზერვატივი და უსაფრთხო სექსი — როგორ და რატომ უნდა დავიცვათ თავი?

არაპენეტრაციული სექსით დაკავებისთვის ხშირ მიზეზებს შორის შეიძლება იყოს:

ჰორმონალური კონტრაცეფციის გამოყენების სურვილის ან შესაძლებლობის არქონა: კონტრაცეფციაზე, შესაძლო ორსულობასა თუ სქესობრივი გზით გადამდებ ინფექციებზე დარდმა ზოგჯერ შეიძლება განწყობა გააფუჭოს. არაპენეტრაციული სექსის ბევრი ფორმა საშუალებას იძლევა, პარტნიორებმა სექსუალური სიამოვნება ისე მიიღონ, რომ ამაზე დარდი არ მოუწიოთ;
ერთ-ერთ პარტნიორს არ სურს პენეტრაცია: ჰეტერონორმატიული სექსუალობა ძირითად აქცენტს „პენისი ვაგინაში“ ტიპის სექსზე აკეთებს. ადამიანს შეიძლება ბევრი სხვადასხვა მიზეზის გამო არ უნდოდეს პენეტრაცია, იქნება ეს ვაგინალური თუ სხვა ტიპის, მათ შორის ამ მიზეზებს შორის შეიძლება იყოს სხეულის დისმორფია, სექსუალური ტრავმა ან ჯანმრთელობის რაიმე პრობლემა, რომელიც ტკივილს ან დისკომფორტს იწვევს პენეტრაციისას. გახსოვდეთ, რომ სექსუალურ ურთიერთობაში პენეტრაცია არ არის ვალდებულება;
ერთ-ერთ პარტნიორს მენსტრუაცია აქვს: ზოგჯერ მდედრობითი ანატომიის მქონე ადამიანი, რომელსაც მენსტრუაცია აქვს, შეიძლება ფიზიკურად არაკომფორტულად გრძნობდეს თავს ან, უბრალოდ, არ იყოს დაინტერესებული პენეტრაციული სექსით. თუმცა, აღსანიშნავია, რომ ეს არ უკავშირდება გავრცელებულ მცდარ წარმოდგენას მენსტრუაციაზე, თითქოს ის „ბინძურია“, მის დროს სექსი კი — საფრთხის შემცველი. არ არსებობს ამის მეცნიერული მტკიცებულება. მენსტრუაციაში არაფერია არაბუნებრივი, სამარცხვინო თუ ბინძური, ზოგ ადამიანს კი შეიძლება სულაც მოსწონდეს მენსტრუაციის დროს სექსი. მეტიც, ზოგისთვის ეს უფრო სასიამოვნოც კია და ის ამსუბუქებს მენსტრუაციით გამოწვეულ ტკივილებს. როგორც სექსსა და სექსუალობასთან დაკავშირებული ყველა საკითხი, ესეც ინდივიდუალურია და დამოკიდებულია ადამიანის სურვილებსა და პრეფერენციებზე;

► გაითვალისწინეთ, რომ მენსტრუაციის დროს სექსისას ისევეა საჭირო თავის დაცვა, როგორც ნებისმიერ სხვა დროს, რადგან სგგი-ების გავრცელებისა და დაორსულების შანსი კვლავ რჩება.

ნაყოფიერების მონიტორინგი: ნაყოფიერების მონიტორინგი არის კონტრაცეფციის ფორმა, რომლის დროსაც მდედრობითი ანატომიის მქონე ადამიანი ყურადღებით ადევნებს თვალს თავის მენსტრუალურ ციკლს იმ კონკრეტული დღეების გამოსარკვევად, რომელთა დროსაც ყველაზე მაღალია ორსულობის დადგომის რისკი. ამ პერიოდის განმავლობაში მნიშვნელოვანია, რომ ადამიანს არ ჰქონდეს დაუცველი პენეტრაციული სექსი. ზოგისთვის ეს პრეზერვატივის გამოყენებას ნიშნავს, ზოგისთვის კი — სექსის სხვა, არაპენეტრაციული ფორმებით დაკავებას;
ერთ-ერთი ან ყველა პარტნიორი არ არის მზად პენეტრაციული სექსისთვის: ზოგჯერ პარტნიორები შეიძლება სექსთან მიმართებით მზაობისა თუ სურვილის ქონის სხვადასხვა საფეხურზე იყვნენ. შესაძლოა, ურთიერთობა ჯერ საწყის ეტაპზე იყოს, ერთ-ერთი ან ორივე პარტნიორი ასექსუალი (ის, ვისაც სექსუალურად ნაკლებად ან საერთოდ არ იზიდავს სხვა ადამიანები) ან არომანტიკული (ის, ვისაც რომანტიკულად არ იზიდავს სხვა ადამიანები) იყოს, შეიძლება რომელიმე საკუთარ სექსუალობას იკვლევდეს ან ელოდებოდეს, როდის გახდება ურთიერთობა ემოციურად უფრო უსაფრთხო და ა.შ. არაპენეტრაციული სექსი შეიძლება ძალიან კარგი გზა იყოს საიმისოდ, რომ ადამიანი შეიცნო და მასთან სექსუალური სიამოვნება მიიღო პენეტრაციისა თუ იმ სხვა აქტივობების გარეშე, რომლებისთვისაც მზად არ ხართ;

► თანხმობასა და მის მნიშვნელობაზე მეტის გასაგებად შეგიძლიათ წაიკითხოთ ჩვენი სტატიები „მოძალადე შეიძლება შეყვარებულიც აღმოჩნდეს“ — რა არის თანხმობა და რატომ არის ის აუცილებელი და შერცხვენა, ემოციური მანიპულაცია, მუქარა, დაკნინება და სხვა — რა არის სექსის იძულება, ასევე გააკეთოთ ჩვენი ქვიზი: რამდენად კარგად გესმის, რას ნიშნავს თანხმობა სექსში?, რომელიც დაგეხმარებათ, დაფიქრდეთ და გაიღრმავოთ ცოდნა ამ თემაზე.

სიახლის გამოცდის სურვილი: ნებისმიერი სექსუალური ორიენტაციისა თუ გენდერული იდენტობის ადამიანმა შეიძლება სცადოს არაპენეტრაციული სექსი, რათა გაზარდოს პარტნიორთან სექსუალური ან ემოციური ინტიმურობა. შესაძლოა, ზოგჯერ სახალისო იყოს რაღაც ახლის ცდა, რაღაც ისეთის, რითაც დიდი ხანია არ დაკავებულხარ ან რაც არ გამოგიცდია კონკრეტულად ამ პარტნიორთან;
პრელუდიის გაუმჯობესების მცდელობა: პრელუდია არის ინტიმური ფიზიკური სიახლოვის აქტი, რომელიც წინ უძღვის სექსს. პრელუდია ხშირად მოიცავს არაპენეტრაციული სექსის ფორმებს და ის ძალიან მნიშვნელოვანია პარტნიორებს შორის განწყობისა და კომფორტის შესაქმნელად. არაპენეტრაციული სექსით დაკავება საშუალებას მოგცემთ, უკეთ გაიწაფოთ პრელუდიაში და უფრო კარგად მიხვდეთ, რა სიამოვნებს და რა არ სიამოვნებს თქვენს პარტნიორს.

არაპენეტრაციული სექსის დადებითი მხარეები

განურჩევლად იმისა, თუ რა ტიპის სექსუალურ აქტივობას აარჩევთ, ორგაზმი გარანტირებული არასდროსაა. ჰეტერონორმატიული კულტურა მთავარ აქცენტს აკეთებს ორგაზმზე და პენეტრაციაზე, როგორც სექსუალური აქტივობის საკვანძო წერტილზე. მიუხედავად ამისა, არაპენეტრაციული სექსი შეიძლება ტრადიციულ პენეტრაციულ აქტივობებზე უფრო სასიამოვნოც კი აღმოჩნდეს ნებისმიერი გენდერისა თუ სექსუალური ორიენტაციის ადამიანისთვის.

არაპენეტრაციული სექსის დადებით მხარეებს შორისაა:

ორსულობის შემცირებული რისკი — პენეტრაციის არქონა ამცირებს დაორსულების შანსებს, თუმცა გასათვალისწინებელია, რომ მაინც შესაძლებელია, არაპენეტრაციული სექსის ზოგიერთი ფორმის დროს სპერმა მოხვდეს ვაგინაში და, შესაბამისად, იყოს ორსულობის დადგომის რისკიც;
სქესობრივი გზით გადამდები ინფექციების (სგგი-ების) შემცირებული რისკი — სგგი-ებისგან 100%-ით თავდაცვა მხოლოდ სექსის არქონითაა შესაძლებელი, თუმცა ვინაიდან პენისით ვაგინალური ან ანალური პენეტრაცია სგგი-ის გადაცემის უფრო მეტ შანსს ტოვებს, არაპენეტრაციული სექსით დაკავება შედარებით უფრო უსაფრთხოა;

► სგგი-ების გავრცელება დიდწილად გენიტალიების კანით კანზე შეხებით ან სხეულის სითხეების (მაგალითად, სპერმის ან ვაგინის სისველის) მიმოცვლით ხდება. თავის დასაცავად შეგიძლიათ გამოიყენოთ ბარიერული კონტრაცეფცია, როგორიცაა პრეზერვატივი ან სტომატოლოგიური კაშხალი. აუცილებლად დაიცავით ჰიგიენა სექსამდე და სექსის შემდეგ. უფრო მეტი ინფორმაციისთვის იხილეთ ჩვენი სტატია სქესობრივი გზით გადამდები ინფექციები — ტიპები, გავრცელების გზები და ტესტირება

პარტნიორებს შორის ნდობისა და სიახლოვის გაზრდა — როგორც უკვე აღვნიშნეთ, სხვადასხვა მიზეზის გამო ადამიანი შეიძლება არ იყოს დაინტერესებული პენეტრაციით. პარტნიორის გაგება და მისი სურვილი პატივისცემა გააძლიერებს ნდობასა და სიახლოვეს ურთიერთობაში;
სხეულის უკეთ შესწავლა — არაპენეტრაციულმა სექსმა შეიძლება გასწავლოთ, როგორი შეხება მოგწონთ თქვენ (და თქვენს პარტნიორს) და რა განიჭებთ ყველაზე მეტ სიამოვნებას;
მენტალური და ფიზიკური ჯანმრთელობის გაუმჯობესება — სექსის, მათ შორის არაპენეტრაციული სექსის, დადებით მხარეებს შორისაა დეპრესიული და შფოთვითი სიმპტომების შემცირება, გაზრდილი კმაყოფილება საკუთარი მენტალური ჯანმრთელობით, ნდობის, ინტიმურობისა და სიყვარულის გაძლიერება ურთიერთობაში, ასევე ემოციების აღქმის, იდენტიფიცირებისა და გამოხატვის უნარის უკეთ გამომუშავება. რაც შეეხება ფიზიკურ ჯანმრთელობას, სექსუალურ ქცევას შეუძლია წნევის შემცირება, კალორიების წვა, გულის ჯანმრთელობის გაუმჯობესება, კუნთების გაძლიერება და ლიბიდოს გაზრდა.

მოყვება თუ არა არაპენეტრაციულ სექსს პენეტრაციული სექსი?

ადამიანს შეიძლება სრულყოფილი სექსუალური ცხოვრება ჰქონდეს პენეტრაციის გარეშე ან, სულაც, სრულყოფილი ცხოვრება ჰქონდეს ნებისმიერი სექსუალური აქტივობის გარეშე. როგორც უკვე განვიხილეთ, ერთ (ან მეტ) ადამიანთან სექსუალური აქტივობით დაკავების ბევრი სხვადასხვა გზა არსებობს პენეტრაციის გარდა, თუმცა ისევე, როგორც სექსუალობის ყველა სხვა ასპექტი, ესეც ძალიან ინდივიდუალურია და გამართლებულია როგორც პენეტრაციით დაკავების, ისე არდაკავების სურვილი.

თუკი არაპენეტრაციული სექსის დროს პენეტრაციულ სექსზე გადასვლა მოგინდებათ, თქვენი გადასაწყვეტია, ამას იზამთ თუ არა. კარგი იქნება, თუკი თქვენ და თქვენი პარტნიორი წინასწარ განიხილავთ სავარაუდო ვარიანტებს, საზღვრებსა და სხვა საკითხებს, რათა არცერთმა თქვენგანმა აქტის დროს არ იგრძნოს ზეწოლა, დისკომფორტი ან ვალდებულება. გახსოვდეთ, რომ პენეტრაცია არ არის სექსუალური აქტის საბოლოო მიზანი.

წყარო: Choosing Therapy