დღეს, 14 მაისს კავკასიის ეკონომიკის სკოლის ყოფილმა დეკანმა, სოსო ბერიკაშვილმა განაცხადა, რომ კავკასიის უნივერსიტეტიდან სახელმწიფო უსაფრთხოების სამსახურის დავალებით, საკუთარი შეხედულებების გამო, გაათავისუფლეს. ამის შემდეგ უნივერსიტეტთან თანამშრომლობა არაერთმა პროფესორთა გაწყვიტა.
ბერიკაშვილის თქმით, 29 აპრილს დილით, კავკასიის უნივერსიტეტის პრეზიდენტმა კახა შენგელიამ დაიბარა და უთხრა, რომ უსაფრთხოების სამსახურმა მოსთხოვა მისი სამსახურიდან გაშვება, რადგან ბიძინას აგინებდა.
“ეს ტყუილია, არ მიგინებია, უბრალოდ მკაცრად გავაკრიტიკე “ოფშორების კანონის” გამო, თუმცა მაგას არ აქვს არსებითი მნიშვნელობა. როგორც ჩანს, ჩემი გაგდება საჩქარო იყო, 7 მაისს გამოიცა ბრძანება და გამიშვეს სამსახურიდან რეორგანიზაციის საბაბით (პოლიტიკური დევნა ჯერ არ იწერება ბრძანებებში). თუ ამ ხელისუფლებას ეს უმსგავსობა გაუვიდა, რეპრესიები მომავალში საყოველთაო გახდება და შეეხება ყველას”, — აღნიშნავს ბერიკაშვილი.
ლექტორების ნაწილი უარს ამბობს უნივერსიტეტში სწავლების გაგრძელებაზე. მაგალითად, დავით ქაშიაშვილმა განაცხადა, რომ უნივერსიტეტთან თანამშრომლობას ადმინისტრაციის პოზიციისა და გადაწყვეტილებების გამო წყვეტს. ლევან ბერძენიშვილიც წერს, რომ მისთვის აბსოლუტურად მიუღებელია კავკასიის უნივერსიტეტის პრეზიდენტის პოზიცია და დაწესებულებას ტოვებს.
- “კავკასიის უნივერსიტეტის ხელმძღვანელობამ ბოლო დღეებში დაიჭირა პოზიცია, რის გამოც ჩემთვის მათთან ურთიერთობის გაგრძელდება შეუძლებელი ხდება. ჯერ პოლიტიკური ნიშნით სამსახურიდან გააგდო ეკონომიკის სკოლის დეკანი სოსო ბერიკაშვილი, შემდეგ კი ხელი მოაწერა განცხადებას, რომლის სულისკვეთებასაც ეწინააღმდეგება სტუდენტებისა და ლექტორების დიდი ნაწილი”, — წერს ნიკო ნერგაძე.
- “მეც ვერ დავრჩები უნივერსიტეტში, რომელშიც ადამიანებს პოლიტიკური ნიშნით ავიწროებენ”, — წერს დავით ჭუმბურიძე.
- “უნივერსიტეტი არის ადამიანები და არა შენობა. დაუშვებელია, დღეს ნათელ მხარეს არ იდგე. ამიტომ, ვწყვეტ თანამშრომლობას”, — წერს სალომე უგულავა.
- “ვემიჯნები უნივერსიტეტის პრეზიდენტის პოზიციას და ვტოვებ უნივერსიტეტს. ვერ ვიქნები მოღალატე ხელისუფლების პოზიციის გამტარებელი გუნდის ნაწილი”, — წერს მოსეშვილი.
იმ პროფესორებს შორის, რომლებიც კავკასიის უნივერსიტეტს ტოვებენ, ასევე არიან რუსიკო კობახიძე, ლიკა მერაბიშვილი, ნინო რობაქიძე.
მომხდარს კავკასიის უნივერსიტეტის პრეზიდენტი, კახა შენგელია გამოეხმაურა. მისი მტკიცებით, ბერიკაშვილმა ქვეყანაში დაძაბული სიტუაცია თავისი პოლიტიკური კარიერისთვის გამოიყენა. შენგელია უარყოფს, რომ ის ბერიკაშვილს დაემუქრა ან რაიმე ტიპის ზეწოლა განახორციელა მასზე.
“რაც სოსო ბერიკაშვილმა დღეს იკადრა არის ღალატი ყველაფრის, სტუდენტების, უნივერსიტეტის, მისი ოჯახის, რასაც თვითონ აკეთებდა ბოლო რამდენიმე წლის განმავლობაში. მისი საქციელი არის სამარცხვინო, რადგან ამ ძალიან დაძაბულ სიტუაციას ქვეყანაში იყენებს თავისი პოლიტიკური კარიერისთვის.
საჯაროდ ვაცხადებ არანაირი ზარი, მუქარა, თხოვნა არ ყოფილა მისი სამსახურიდან გაშვების გამო. ის იყო ყველაზე სუსტი დეკანი კავკასიის უნივერსიტეტში და ყველაზე ზარმაცი თანამშრომელი. ძალიან დიდი ხნის განმავლობაში, მასთან მქონდა რთული ურთიერთობა მხოლოდ და მხოლოდ უნივერსიტეტის გამო, ბოლოსდაბოლოს იძულებული გავხდი სამსახურიდან გამეშვა, სამწუხაროდ დაემთხვა იმ დროს, რაც მან შესანიშნავად გამოიყენა”, — აცხადებს შენგელია.
ამ განცხადების გამოქვეყნებამდე, შენგელიამ რადიო თავისუფლებასთან კომუნიკაციისას ბერიკაშვილს “არაკაცი” უწოდა და აღნიშნა, რომ მისი გაშვება დიდი ხანია სურდა, რადგან ბერიკაშვილი არ იყო შესაბამისი კვალიფიკაციის დეკანი.
აღსანიშნავია, რომ ბერიკაშვილის გათავისუფლებამდე, 38 უნივერსიტეტის სახელით გამოქვეყნდა წერილი, რომელიც გუშინ, 13 მაისს მთავარი არხის მიერ გავრცელებული დოკუმენტის შინაარს იმეორებს. მთავარი არხი წერდა, რომ დოკუმენტი განათლების სამინისტრომ უნივერსიტეტებში დაგზავნა და მასზე რექტორებისგან ხელმოწერა მოითხოვა. ამ ტექსტში 38 უნივერსიტეტის ადმინისტრაცია სტუდენტებისა და ლექტორების პროტესტს ემიჯნება.
“მიგვაჩნია, რომ ნებისმიერი პოლიტიკური პროცესი აკადემიური სივრცის მიღმა უნდა დარჩეს”, — აღნიშნულია ერთობლივ წერილში, რომელიც ტექნიკური უნივერსიტეტის გვერდზე გამოქვეყნდა.
კავკასიის უნივერსიტეტის მმართველთა საბჭომ, უკან გამოიწვია უნივერსიტეტის ხელმოწერა რექტორთა კონფერეციის განცხადებაზე, რადგან, საბჭოს განცხადების თანახმად, მისი წევრები არ იზიარებენ უნივერსიტეტების კონფერენციის განცხადების სულისკვეთებასა და ხედვას.
“განცხადებაზე ხელმოწერა არ იყო შეთანხმებული მმართველთა საბჭოსთან და ცნობილი გახდა გამოქვეყნების შემდეგ. შესაბამისად, პოლიტიკური პოზიციის შემცველ ამ განცხადებაზე ჩვენი პოზიციის გამოხატვა შევძელით კავკასიის უნივერსიტეტის საბჭოს კვორუმის შედგენისთანავე.
კავკასიის უნივერსიტეტის მმართველი საბჭო რჩება 7 მაისს უნივერსიტეტის მიერ გაკეთებული განცხადების ერთგული, რომლითაც რუსულ კანონთან დაკავშირებით საკუთარი პოზიცია ნათლად კიდევ ერთხელ გამოვხატეთ”, — წერს ნინო ჟიჟილაშვილი.
გარდა ამისა, რამდენიმე უნივერსიტეტი დატოვეს სხვა პროფესორებმაც. გრიგოლ რობაქიძის სახელობის უნივერსიტეტიდან წავიდა პროფესორი ზაზა თავაძე, ხოლო შავი ზღვის საერთაშორისო უნივერსიტეტიდან სალომე აჩბა. ამ უნივეისიტეტების ადმინისტრაციამ ხელი მოაწერა საერთო განცხადებას, რომელიც აკრიტიკებს სტუდენტებისა და ლექტორების გაფიცვას.
“გთხოვთ, შემიწყვიტოთ გრიგოლ რობაქიძის სახელობის უნივერსიტეტის სამართლის პროფესორის სტატუსი”, — წერს თავაძე.