მედია აპრილი წარმოგიდგენთ “უკანონო” პოდკასტს

საქართველო დამოუკიდებლობის მოპოვებიდან მოყოლებული ვერ იქცა სახელმწიფოდ, რომელშიც კანონი უზენაესია, ბოლო დროს კი, ელვის სისწრაფით ცხადდება უკანონოდ ყველაფერი, რაც გუშინ გამოხატვის თავისუფლების ნაწილი იყო. ამ პოდკასტში ხელისუფალთა უკანონობებზე ვისაუბრებთ, იმაზეც, როგორია საზოგადოების რეაქცია რეპრესიებსა და ტერორზე ან როგორ წარმოგვიდგენია, ჩვენი ქვეყნის სახელმწიფოდ გარდაქმნა.

თუ ბოლო ერთ წელში ქვიარ უფლებების მდგომარეობის ცვლილებას ლოკალურად თუ უფრო ფართოდ დავაკვირდებით, ვნახავთ, რომ დინამიკა არც ისე სახარბიელოა. საქართველოში ფაშისტური, ადამიანის უფლებები შემლახავი კანონები გვაქვს, აშშ-ში ტრამპის გაპრეზიდენტებას განვითარებაზე მიმართული რიგი პროექტების გაუქმება, შესაბამისად, განვითარებად ქვეყნებში კრიზისული მდგომარეობა თუ ამის მოლოდინი მოჰყვა. უარესობისკენ იცვლება სიტუაცია ცენტრალურ აზიაშიც, უნგრეთის შემდეგ კი უკვე სლოვაკეთმა მიიღო ქვიარფობიური კანონები და ევროპის შიგნით უთანასწორობის კიდევ ერთ კერად იქცა.

“უკანონო” პოდკასტის მე-9 ეპიზოდში ემიგრაციაში მცხოვრებ ქართველ ქვიარ აქტივისტთან, ნათია გვიანიშვილთან ერთად ვსაუბრობთ, როგორი იყო ქვიარ უფლებების განვლილი წელი, რატომ გვაქვს ამგვარი მოცემულობა და რა პროგნოზები შეიძლება გვქონდეს.